ਓਟਵਾ, 29 ਫਰਵਰੀ (ਪੋਸਟ ਬਿਊਰੋ) : ਐਰਾਈਵਕੈਨ ਨਾਲ ਕੰਮ ਕਰਨ ਵਾਲੀ ਕੰਪਨੀ, ਜਿਸ ਨੂੰ ਉਸ ਦੇ ਕੰਮ ਬਦਲੇ 7·9 ਮਿਲੀਅਨ ਡਾਲਰ ਦਿੱਤੇ ਗਏ, ਡੈਲੀਅਨ ਐਂਟਰਪ੍ਰਾਈਜ਼ ਦੇ ਸੀਈਓ ਦੇ ਡਿਪਾਰਟਮੈਂਟ ਆਫ ਨੈਸ਼ਨਲ ਡਿਫੈਂਸ (ਡੀਐਨਡੀ) ਦਾ ਕਰਮਚਾਰੀ ਹੋਣ ਦਾ ਪਤਾ ਲੱਗਣ ਉੱਤੇ ਸਾਬਕਾ ਰੱਖਿਆ ਮੰਤਰੀ ਅਨੀਤਾ ਆਨੰਦ ਨੇ ਹੈਰਾਨੀ ਪ੍ਰਗਟਾਈ।
ਵੀਰਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਖਜ਼ਾਨਾ ਬੋਰਡ ਦੀ ਪ੍ਰੈਜ਼ੀਡੈਂਟ ਨੇ ਆਖਿਆ ਕਿ ਉਨ੍ਹਾਂ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ ਤੇ ਇਹ ਪਤਾ ਲੱਗਣ ਉੱਤੇ ਉਨ੍ਹਾਂ ਨੂੰ ਕਾਫੀ ਹੈਰਾਨੀ ਹੋਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਬੰਧਤ ਮੁਲਾਜ਼ਮ ਡੇਵਿਡ ਯੀਓ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਹੈ ਤੇ ਡੀਐਨਡੀ ਵੱਲੋਂ ਡੇਲੀਅਨ ਨਾਲ ਕੀਤਾ ਗਿਆ ਕਾਂਟਰੈਕਟ ਵੀ ਸਸਪੈਂਡ ਕੀਤਾ ਜਾ ਰਿਹਾ ਹੈ। ਡੀਐਨਡੀ ਨੇ ਇਹ ਵੀ ਆਖਿਆ ਕਿ ਇਸ ਸਬੰਧ ਵਿੱਚ ਅੰਦਰੂਨੀ ਜਾਚ ਕਰਵਾਈ ਜਾਵੇਗੀ।
ਪੱਤਰਕਾਰਾਂ ਵੱਲੋਂ ਆਨੰਦ ਤੋਂ ਇਹ ਵੀ ਪੁੱਛਿਆ ਗਿਆ ਕਿ ਕੀ ਸਰਕਾਰੀ ਮੁਲਾਜ਼ਮਾਂ ਨੂੰ ਕਾਂਟਰੈਕਟ ਦੇਣਾ ਆਮ ਸਰਕਾਰੀ ਰੁਝਾਨ ਹੈ ਤਾਂ ਆਨੰਦ ਨੇ ਆਖਿਆ ਕਿ ਕੌਨਫਲਿਕਟ ਆਫ ਇੰਟਰਸਟਸ ਤੋਂ ਬਚਣ ਲਈ ਕੁੱਝ ਨਿਯਮ ਹਨ।ਇਸ ਦਰਾਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਐਰਾਈਵਕੈਨ ਐਪ ਮਾਮਲੇ ਦੀ ਚੱਲ ਰਹੀ ਜਾਂਚ ਦੇ ਸਬੰਧ ਵਿੱਚ ਆਖਿਆ ਕਿ ਜਿਸ ਕਿਸੇ ਨੇ ਵੀ ਕੋਵਿਡ-19 ਮਹਾਂਮਾਰੀ ਦੇ ਸਮੇਂ ਦੌਰਾਨ ਲਾਹਾ ਖੱਟਣ ਦੀ ਕੋਸਿ਼ਸ਼ ਕੀਤੀ ਹੋਵੇਗੀ ਉਸ ਖਿਲਾਫ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਇਸ ਉੱਤੇ ਪ੍ਰਤੀਕਿਰਿਆ ਪ੍ਰਗਟਾਉਂਦਿਆਂ ਕੰਜ਼ਰਵੇਟਿਵ ਆਗੂ ਪਿਏਰ ਪੌਲੀਏਵਰ ਨੇ ਆਖਿਆ ਕਿ ਯੀਓ ਨੂੰ ਫੌਰੀ ਤੌਰ ਉੱਤੇ ਨੌਕਰੀ ਤੋਂ ਕੱਢ ਦੇਣਾ ਚਾਹੀਦਾ ਹੈ।
ਇਸ ਦਰਮਿਆਨ ਐਨਡੀਪੀ ਆਗੂ ਜਗਮੀਤ ਸਿੰਘ ਨੇ ਆਖਿਆ ਕਿ ਅਸੀਂ ਤਾਂ ਪਹਿਲਾਂ ਹੀ ਐਰਾਈਵਕੈਨ ਐਪ ਬਾਰੇ ਕਾਂਟਰੈਕਟ ਕਿਸੇ ਪ੍ਰਾਈਵੇਟ ਕੰਪਨੀ ਨੂੰ ਦੇਣ ਉੱਤੇ ਇਤਰਾਜ਼ ਪ੍ਰਗਟਾਇਆ ਸੀ ਪਰ ਲਿਬਰਲਾਂ ਨੇ ਸਾਡੀ ਇੱਕ ਨਹੀਂ ਸੀ ਸੁਣੀ। ਇਸ ਮੌਕੇ ਰੱਖਿਆ ਮੰਤਰੀ ਬਿੱਲ ਬਲੇਅਰ ਨੇ ਆਖਿਆ ਕਿ ਜਿਵੇਂ ਹੀ ਉਨ੍ਹਾਂ ਨੂੰ ਇਹ ਜਾਣਕਾਰੀ ਮਿਲੀ ਕਿ ਡੇਲੀਅਨ ਦਾ ਸੀਈਓ ਡੀਐਨਡੀ ਦਾ ਕਰਮਚਾਰੀ ਹੈ ਤਾਂ ਕੰਪਨੀ ਨਾਲੋਂ ਸਾਰੇ ਕਾਂਟਰੈਕਟ ਸਸਪੈਂਡ ਕਰ ਦਿੱਤੇ ਗਏ ਤੇ ਸਬੰਧਤ ਮੁਲਾਜ਼ਮ ਨੂੰ ਵੀ ਸਸਪੈਂਡ ਕਰ ਦਿੱਤਾ ਗਿਆ। ਉਨ੍ਹਾਂ ਇਹ ਵੀ ਆਖਿਆ ਕਿ ਮਾਮਲੇ ਦੀ ਪੂਰੀ ਜਾਂਚ ਕੀਤੀ ਜਾਵੇਗੀ।