ਬੀਜਿੰਗ, 31 ਅਗਸਤ (ਪੋਸਟ ਬਿਊਰੋ): ਦੋ ਚੀਨੀ ਔਰਤਾਂ ਨੇ ਇੱਕ ਅਣਜਾਣ ਵਿਅਕਤੀ ਦੀ 3 ਸਾਲ ਦੀ ਬੱਚੀ ਨੂੰ ਜਹਾਜ਼ ਦੇ ਟਾਇਲਟ ਵਿੱਚ ਬੰਦ ਕਰ ਦਿੱਤਾ। ਦੋਨਾਂ ਨੇ ਇਸ ਘਟਨਾ ਦੀ ਵੀਡੀਓ ਵੀ ਸ਼ੇਅਰ ਕੀਤੀ ਹੈ। ਉਨ੍ਹਾਂ ਨੇ ਦਲੀਲ ਦਿੱਤੀ ਹੈ ਕਿ ਉਨ੍ਹਾਂ ਨੇ ਬੱਚੀ ਨੂੰ ਸਬਕ ਸਿਖਾਉਣ ਲਈ ਅਜਿਹਾ ਕੀਤਾ।
ਜਾਣਕਾਰੀ ਅਨੁਸਾਰ, ਵੀਡੀਓ ਵਿੱਚ ਔਰਤ ਬੱਚੇ ਨੂੰ ਕਹਿੰਦੀ ਹੈ ਕਿ ਉਸਨੂੰ ਉਦੋਂ ਤੱਕ ਬਾਹਰ ਨਹੀਂ ਜਾਣ ਦਿੱਤਾ ਜਾਵੇਗਾ ਜਦੋਂ ਤੱਕ ਉਹ ਰੋਣਾ ਬੰਦ ਨਹੀਂ ਕਰ ਦਿੰਦੀ। ਮਾਮਲਾ 24 ਅਗਸਤ ਨੂੰ ਜੂਨੇਯਾਓ ਏਅਰਲਾਈਨਜ਼ ਨਾਲ ਸਬੰਧਤ ਹੈ, ਜਿਸ ਦਾ ਵੀਡੀਓ ਹੁਣ ਸਾਹਮਣੇ ਆਇਆ ਹੈ। ਜਾਣਕਾਰੀ ਮੁਤਾਬਕ ਲੜਕੀ ਆਪਣੇ ਦਾਦਾ-ਦਾਦੀ ਨਾਲ ਸ਼ੰਘਾਈ ਜਾ ਰਹੀ ਸੀ।
ਇਸ ਦੌਰਾਨ ਉਹ ਲਗਾਤਾਰ ਜਹਾਜ਼ 'ਚ ਰੋ ਰਹੀ ਸੀ। ਇਹ ਦੇਖ ਕੇ ਜਹਾਜ਼ 'ਚ ਸਫਰ ਕਰ ਰਹੀਆਂ ਦੋ ਔਰਤਾਂ ਦਾਦਾ-ਦਾਦੀ ਨੂੰ ਬੱਚੀ ਨੂੰ ਆਪਣੇ ਨਾਲ ਲਿਜਾਣ ਲਈ ਕਹਿੰਦੀਆਂ ਹਨ। ਵੀਡੀਓ ਪੋਸਟ ਕਰਨ ਵਾਲੀ ਔਰਤ ਨੇ ਲਿਖਿਆ ਕਿ ਉਸ ਨੇ ਅਜਿਹਾ ਇਸ ਲਈ ਕੀਤਾ ਤਾਂ ਕਿ ਯਾਤਰਾ ਦੌਰਾਨ ਹੋਰ ਯਾਤਰੀਆਂ ਨੂੰ ਕੋਈ ਦਿੱਕਤ ਨਾ ਆਵੇ।
ਏਅਰਲਾਈਨਜ਼ ਨੇ ਵੀ ਇਸ ਮਾਮਲੇ 'ਚ ਬਿਆਨ ਜਾਰੀ ਕੀਤਾ ਹੈ। ਏਅਰਲਾਈਨ ਦੇ ਗਾਹਕ ਸੇਵਾ ਵਿਭਾਗ ਨੇ ਚਾਲਕ ਦਲ ਦੀ ਲਾਪਰਵਾਹੀ ਲਈ ਮੁਆਫੀ ਮੰਗੀ ਹੈ। ਉਨ੍ਹਾਂ ਮਹਿਲਾ ਯਾਤਰੀਆਂ ਦੀ ਆਲੋਚਨਾ ਕੀਤੀ ਅਤੇ ਭਵਿੱਖ ਵਿੱਚ ਸਾਵਧਾਨ ਰਹਿਣ ਦਾ ਵਾਅਦਾ ਕੀਤਾ।