ਕਾਬੁਲ, 3 ਮਈ (ਪੋਸਟ ਬਿਊਰੋ)- ਅਫਗਾਨਿਸਤਾਨ ਦੀ ਰਾਜਧਾਨੀ ਕਾਬੁਲ ਦੇ ਉਤਰੀ ਕੰਢੇ ਉਤੇ ਤੇਲ ਦੇ ਕਈ ਟੈਂਕਰਾਂ ਵਿੱਚ ਅੱਗ ਲੱਗਣ ਕਾਰਨ ਸੱਤ ਜਣਿਆਂ ਦੀ ਮੌਤ ਹੋ ਗਈ ਤੇ 14 ਹੋਰ ਜ਼ਖਮੀ ਹੋ ਗਏ। ਘਟਨਾ ਦੌਰਾਨ ਜ਼ਖਮੀ ਹੋਏ ਲੋਕਾਂ ਨੂੰ ਇਲਾਜ ਲਈ ਸਥਾਨਕ ਹਸਪਤਾਲਾਂ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।
ਗ੍ਰਹਿ ਮੰਤਰਾਲੇ ਦੇ ਬੁਲਾਰੇ ਤਾਰਿਕ ਅਰੀਆਨ ਨੇ ਦੱਸਿਆ ਕਿ ਜਾਂਚਕਰਤਾ ਸ਼ਨੀਵਾਰ ਦੇਰ ਰਾਤ ਵਾਪਰੀ ਘਟਨਾ ਵਿੱਚ ਸੜ ਕੇ ਸੁਆਹ ਹੋਏ ਤੇਲ ਦੇ ਟੈਂਕਰਾਂ ਅਤੇ ਇੱਕ ਗੈਸ ਸਟੇਸ਼ਨ ਦੀ ਚੰਗੀ ਤਰ੍ਹਾਂ ਜਾਂਚ ਪੜਤਾਲ ਕਰ ਰਹੇ ਹਨ। ਇਸ ਗੈਸ ਸਟੇਸ਼ਨ ਵਿੱਚ ਵੀ ਅੱਗ ਲੱਗ ਗਈ ਸੀ।ਇਸ ਗੱਲ ਦਾ ਤੁਰੰਤ ਪਤਾ ਨਹੀਂ ਲੱਗ ਸਕਿਆ ਕਿ ਅੱਗ ਅਚਾਨਕ ਲੱਗੀ ਜਾਂ ਜਾਣਬੁੱਝ ਕੇ ਲਾਈ ਗਈ ਹੈ। ਇਹ ਘਟਨਾ ਉਸ ਸਮੇਂ ਵਾਪਰੀ ਹੈ, ਜਦੋਂ ਅਮਰੀਕਾ ਤੇ ਨਾਟੋ ਦੇ ਇਸ ਦੇਸ਼ ਵਿੱਚ ਬਚੇ ਫੌਜੀਆਂ ਦੀ ਵਾਪਸੀ ਸ਼ੁਰੂ ਹੋਈ ਹੈ, ਜੋ ਲਗਭਗ ਬੀਤੇ 20 ਸਾਲਾਂ ਤੋਂ ਏਥੇ ਹਨ। ਤਾਰਿਕ ਨੇ ਦੱਸਿਆ ਕਿ ਇੱਕ ਚੰਗਿਆੜੇ ਨਾਲ ਤੇਲ ਦੇ ਟੈਂਕਰ ਵਿੱਚ ਅੱਗ ਲੱਗ ਗਈ। ਇਸ ਮਗਰੋਂ ਅੱਗ ਨੇ ਤੇਲ ਦੇ ਕਈ ਹੋਰ ਟੈਂਕਰਾਂ ਨੂੰ ਲਪੇਟ ਵਿੱਚ ਲੈ ਲਿਆ ਅਤੇ ਇਹ ਭਿਆਨਕ ਰੂਪ ਧਾਰਨ ਕਰ ਗਈ। ਕਾਬੁਲ ਦੇ ਉਤਰੀ ਕੰਢੇ ਉਤੇ ਟੈਂਕਰਾਂ ਨੂੰ ਲੱਗੀ ਇਸ ਅੱਗ ਨੇ ਕਈ ਘਰਾਂ ਤੇ ਇੱਕ ਗੈਸ ਸਟੇਸ਼ਨ ਨੂੰ ਵੀ ਆਪਣੀ ਲਪੇਟ ਵਿੱਚ ਲੈ ਲਿਆ। ਇਸ ਕਾਰਨ ਕਈ ਢਾਂਚੇ ਤਬਾਹ ਹੋ ਗਏ ਅਤੇ ਕਾਬੁਲ ਦੇ ਬਹੁਤੇ ਇਲਾਕਿਆਂ ਵਿੱਚ ਬਿਜਲੀ ਗੁਲ ਹੋ ਗਈ। ਇਸੇ ਦੌਰਾਨ ਅੱਗ ਕਾਰਨ ਸੜੇ ਟਰੱਕਾਂ ਦੇ ਚਾਲਕਾਂ ਨੇ ਕੱਲ੍ਹ ਸੜਕ ਜਾਮ ਕਰ ਕੇ ਸਰਕਾਰ ਤੋਂ ਮੁਆਵਜ਼ੇ ਦੀ ਮੰਗ ਕੀਤੀ ਹੈ।ਉਨ੍ਹਾਂ ਦੱਸਿਆ ਕਿ ਇੱਕ ਤੋਂ ਇੱਕ ਬਾਅਦ ਤਿੰਨ ਟਰੱਕਾਂ ਵਿੱਚ ਧਮਾਕੇ ਹੋਏ। ਉਨ੍ਹਾਂ ਕਿਹਾ ਕਿ ਅੱਗ ਕਾਰਨ ਲਗਭਗ 100 ਟਰੱਕ ਸੜਨ ਦਾ ਖਦਸ਼ਾ ਹੈ। ਘਟਨਾ ਮਗਰੋਂ ਮੌਕੇ 'ਤੇ ਪਹੁੰਚੇ ਫਾਇਰ ਬ੍ਰਿਗੇਡ ਅਮਲੇ ਨੇ ਕਾਫੀ ਜੱਦੋਜਹਿਦ ਮਗਰੋਂ ਅੱਗ ਉਤੇ ਕਾਬੂ ਪਾਇਆ। ਸੜ ਕੇ ਸੁਆਹ ਹੋਏ ਸਾਮਾਨ 'ਚੋਂ ਕੱਲ੍ਹ ਸਵੇਰ ਸਮੇਂ ਵੀ ਅੱਗ ਦੀਆਂ ਲਾਟਾਂ ਨਿਕਲ ਰਹੀਆਂ ਸਨ।