ਓਟਵਾ, 19 ਸਤੰਬਰ (ਪੋਸਟ ਬਿਊਰੋ): ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀਰਵਾਰ ਨੂੰ ਕੈਨੇਡਾ ਦੇ ਟਰਾਂਸਪੋਰਟ ਮੰਤਰੀ ਦੇ ਰੂਪ ਵਿੱਚ ਵਾਧੂ ਚਾਰਜ ਸੰਭਾਲਣ ਲਈ ਟਰੇਜ਼ਰੀ ਬੋਰਡ ਦੀ ਪ੍ਰਧਾਨ ਅਨੀਤਾ ਆਨੰਦ ਨੂੰ ਨਿਯੁਕਤ ਕੀਤਾ ।
ਉਨ੍ਹਾਂ ਦੇ ਫਰੰਟ ਬੈਂਚ ਵਿੱਚ ਇਹ ਮਾਮੂਲੀ ਫੇਰਬਦਲ ਲੰਬੇ ਸਮੇਂ ਤੋਂ ਕੈਬਨਿਟ ਮੰਤਰੀ ਰਹੇ ਪਾਬਲੋ ਰੋਡਰੀਗੇਜ ਵੱਲੋਂ ਇਹ ਐਲਾਨ ਕੀਤੇ ਜਾਣ ਤੋਂ ਬਾਅਦ ਹੋਇਆ ਕਿ ਉਹ ਕਿਊਬੇਕ ਲਿਬਰਲ ਪਾਰਟੀ ਦੀ ਲੀਡਰਸਿ਼ਪ ਲਈ ਚੋਣ ਲੜਨ ਲਈ ਮੰਤਰੀ ਅਹੁਦੇ ਤੋਂ ਅਸਤੀਫਾ ਦੇ ਰਹੇ ਹਨ।
ਟਰੂਡੋ ਦੀ ਸਰਕਾਰ ਤੋਂ ਬਾਹਰ ਹੋਣ ਦੇ ਉਨ੍ਹਾਂ ਦੇ ਫੈਸਲੇ ਨੇ ਲਿਬਰਲਜ਼ ਨੂੰ ਕਿਊਬੇਕ ਲੈਫਟੀਨੈਂਟ ਤੋਂ ਬਿਨ੍ਹਾਂ ਵੀ ਛੱਡ ਦਿੱਤਾ। ਪ੍ਰੋਕਿਓਰਮੈਂਟ ਮੰਤਰੀ ਜੀਨ ਯਵੇਸ ਡੁਕਲੋਸ ਉਸ ਅਹੁਦੇ ਨੂੰ ਸੰਭਾਲ ਰਹੇ ਹਨ।
ਵੀਰਵਾਰ ਦੁਪਹਿਰ ਨੂੰ ਰਾਇਡੌ ਹਾਲ ਵਿੱਚ ਇੱਕ ਸਮਾਰੋਹ ਵਿੱਚ ਆਨੰਦ ਨੂੰ ਉਨ੍ਹਾਂ ਦੀ ਨਵੀਂ ਭੂਮਿਕਾ ਲਈ ਸਹੁੰ ਚੁਕਾਈ ਗਈ। ਟਰੂਡੋ ਮੌਜੂਦ ਨਹੀਂ ਸਨ ਪਰ ਗਵਰਨਰ ਜਨਰਲ ਮੈਰੀ ਸਾਇਮਨ ਮੌਜੂਦ ਸਨ ਅਤੇ ਕੁੱਝ ਕਰਮਚਾਰੀ ਅਤੇ ਪਰਿਵਾਰ ਦੇ ਮੈਂਬਰ ਵੀ ਮੌਜੂਦ ਸਨ।