ਟੋਰਾਂਟੋ, 25 ਸਤੰਬਰ (ਪੋਸਟ ਬਿਊਰੋ): ਸੋਮਵਾਰ ਸ਼ਾਮ ਨੂੰ ਜੰਕਸ਼ਨ ਨੇਬਰਹੁੱਡ ਵਿੱਚ ਹੋਈ ਟੱਕਰ ਵਿੱਚ ਇੱਕ ਔਰਤ ਦੀ ਮੌਤ ਹੋ ਗਈ, ਜਿਸਨੂੰ ਪ੍ਰਤੀਭਾਸ਼ਾਲੀ ਅਤੇ ਸੁੰਦਰ ਇਨਸਾਨ ਦੇ ਰੂਪ ਵਿੱਚ ਯਾਦ ਕੀਤਾ ਜਾ ਰਿਹਾ ਹੈ, ਜੋ ਟੋਰੰਟੋ ਦੇ ਜੈਜ ਕਮਿਊਨਿਟੀ ਦੀ ਇੱਕ ਹਰਮਨਪਿਆਰੇ ਮੈਂਬਰ ਸਨ।
ਬੁੱਧਵਾਰ ਨੂੰ ਨਿਵਾਸੀਆਂ ਨੇ ਏਨੇਟ ਸਟਰੀਟ ਅਤੇ ਪੈਸਿਫਿਕ ਏਵੇਨਿਊ ਦੇ ਕੋਨੇ `ਤੇ ਇੱਕ ਅਸਥਾਈ ਸਮਾਰਕ `ਤੇ ਫੁੱਲ ਚੜਾਏ ਅਤੇ ਮੋਮਬੱਤੀਆਂ ਜਗਾਈਆਂ, ਜਿੱਥੇ ਜੂਲੀਆ ਕਲੀਵਲੈਂਡ ਦੀ ਮੌਤ ਹੋਈ ਸੀ।
ਟੋਰਾਂਟੋ ਪੁਲਿਸ ਨੇ ਕਿਹਾ ਕਿ ਇੱਕ ਹੁੰਡਈ ਏਲਾਂਟਰਾ ਨੇ ਚੁਰਾਹੇ `ਤੇ ਇੱਕ ਹੁੰਡਈ ਟਕਸਨ ਨੂੰ ਟੱਕਰ ਮਾਰੀ ਅਤੇ ਉੱਤਰ-ਪੱਛਮੀ ਕੋਨੇ `ਤੇ ਮੁੜ ਗਈ, ਜਿਸ ਨਾਲ ਕਲੀਵਲੈਂਡ ਅਤੇ ਉਸਦੇ ਸਾਥੀ ਜੌਨ ਨੂੰ ਸੱਟਾਂ ਲੱਗੀਆਂ।
ਉਸਨੂੰ ਘਟਨਾ ਸਥਾਨ `ਤੇ ਹੀ ਮ੍ਰਿਤਕ ਐਲਾਨ ਕਰ ਦਿੱਤਾ ਗਿਆ, ਜਦੋਂਕਿ ਜੌਨ ਅਤੇ ਟਕਸਨ ਦੇ ਚਾਲਕ ਨੂੰ ਮਾਮੂਲੀ ਸੱਟਾਂ ਦੇ ਨਾਲ ਹਸਪਤਾਲ ਲਿਜਾਇਆ ਗਿਆ। ਟੱਕਰ ਦੇ ਕਾਰਨਾਂ ਦਾ ਹਾਲੇ ਪਤਾ ਨਹੀਂ ਲੱਗਾ ਹੈ।
ਕਲੀਵਲੈਂਡ ਦੀ ਭੈਣ ਤਾਰਾ ਨੇ ਦੱਸਿਆ ਕਿ ਉਸਤੋਂ ਬਿਨ੍ਹਾਂ ਦੁਨੀਆਂ ਪਹਿਲਾਂ ਵਰਗੀ ਨਹੀਂ ਰਹੀ। ਉਸਨੇ ਕਿਹਾ ਕਿ ਉਸਦੀ ਭੈਣ ਜੋ ਇੱਕ ਜੈਜ ਸੰਗੀਤਕਾਰ ਅਤੇ ਕੰਪੋਜ਼ਰ ਸੀ, ਕੁੱਝ ਨਵੀਂਆਂ ਰਚਨਾਵਾਂ `ਤੇ ਕੰਮ ਕਰ ਰਹੀ ਸੀ ਅਤੇ ਲੱਗਭੱਗ ਇੱਕ ਮਹੀਨੇ ਵਿੱਚ ਉਨ੍ਹਾਂ ਨੂੰ ਪੇਸ਼ ਕਰਣ ਦੀ ਯੋਜਨਾ ਬਣਾ ਰਹੀ ਸੀ।