ਟੋਰਾਂਟੋ, 18 ਸਤੰਬਰ (ਪੋਸਟ ਬਿਊਰੋ): ਸਕਾਰਬੋਰੋ ਵਿੱਚ ਮੰਗਲਵਾਰ ਸ਼ਾਮ ਨੂੰ ਹਾਈਰਾਈਜ਼ ਅੱਗ ਵਿਚ ਝੁਲਸਣ ਕਾਰਨ ਇੱਕ ਵਿਅਕਤੀ ਦੀ ਮੌਤ ਹੋ ਗਈ।
ਫਿੰਚ ਏਵੇਨਿਊ ਈਸਟ ਅਤੇ ਵਾਰਡਨ ਏਵੇਨਿਊ ਦੇ ਇਲਾਕੇ ਵਿੱਚ 3131 ਬਰਿਡਲਟਾਊਨ ਸਰਕਲ ਵਿੱਚ ਰਾਤ 8:30 ਵਜੇ ਤੋਂ ਬਾਅਦ ਕਰਮਚਾਰੀਆਂ ਨੂੰ ਬੁਲਾਇਆ ਗਿਆ ਸੀ।
ਟੋਰਾਂਟੋ ਪੁਲਿਸ ਨੇ ਕਿਹਾ ਕਿ ਇਮਾਰਤ ਵਿਚੋਂ ਖਿੜਕੀਆਂ ਟੁੱਟਣ ਅਤੇ ਮਲਬਾ ਡਿੱਗਣ ਦੀਆਂ ਖਬਰਾਂ ਹਨ। ਵਾਇਰਲ ਵੀਡੀਓ ਵਿੱਚ ਇੱਕ ਖਿੜਕੀ ਵਿਚੋਂ ਅਤਗ ਦੀਆਂ ਲਪਟਾਂ ਅਤੇ ਕਾਲ਼ਾ ਧੂੰਆਂ ਨਿਕਲਦਾ ਹੋਇਆ ਵਿਖਾਈ ਦੇ ਰਿਹਾ ਹੈ।
ਡਿਪਟੀ ਫਾਇਰ ਚੀਫ ਲੈਰੀ ਕੋਕੋ ਨੇ ਘਟਨਾ ਸਥਾਨ `ਤੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਸਾਡੇ ਕਰਮਚਾਰੀਆਂ ਨੇ ਸਰਚ ਅਤੇ ਬਚਾਅ ਦੀ ਕੋਸ਼ਿਸ਼ ਕੀਤੀ ਅਤੇ ਨੌਵੀਂ ਮੰਜਿ਼ਲ `ਤੇ ਇਕਾਈ ਵਿੱਚ ਪ੍ਰਵੇਸ਼ ਕੀਤਾ ਅਤੇ ਉੱਥੇ ਲੱਗੀ ਭਿਆਨਕ ਅੱਗ ਵੇਖੀ। ਬਚਾਅ ਕਾਰਜਾਂ ਦੌਰਾਨ ਇੱਕ ਵਿਅਕਤੀ ਮ੍ਰਿਤਕ ਮਿਲਿਆ। ਪੀੜਤ ਦੀ ਪਹਿਚਾਣ ਨਹੀਂ ਹੋ ਸਕੀ।
ਟੋਰਾਂਟੋ ਪੈਰਾਮੇਡਿਕਸ ਨੇ ਦੱਸਿਆ ਕਿ ਇੱਕ ਹੋਰ ਵਿਅਕਤੀ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ ਉਸ ਨੂੰ ਸਥਾਨਕ ਹਸਪਤਾਲ ਲਿਜਾਇਆ ਗਿਆ। ਕੋਕੋ ਨੇ ਦੱਸਿਆ ਕਿ ਅੱਗ ਨੌਵੀਂ ਮੰਜਿ਼ਲ ਦੀ ਇਕਾਈ ਤੱਕ ਹੀ ਸੀਮਿਤ ਸੀ।