ਓਨਟਾਰੀਓ, 26 ਜਨਵਰੀ (ਪੋਸਟ ਬਿਊਰੋ) : ਕਰੌਸਬਾਰਡਰ ਵੈਕਸੀਨ ਨੂੰ ਲਾਜ਼ਮੀ ਕੀਤੇ ਜਾਣ ਦੇ ਸਬੰਧ ਵਿੱਚ ਫੈਡਰਲ ਸਰਕਾਰ ਵੱਲੋਂ ਦਿੱਤੇ ਗਏ ਨਿਰਦੇਸ਼ਾਂ ਦੇ ਖਿਲਾਫ ਦੇਸ਼ ਭਰ ਤੋਂ ਸੈਂਕੜੇ ਟਰੱਕਾਂ ਦਾ ਕਾਫਲਾ ਓਨਟਾਰੀਓ ਪਹੁੰਚ ਗਿਆ ਹੈ। ਇਹ ਕਾਫਲਾ ਐਤਵਾਰ ਨੂੰ ਬੀਸੀ ਤੋਂ ਰਵਾਨਾ ਹੋਇਆ ਸੀ।
ਇਸ ਵੱਡੇ ਕਾਫਲੇ ਨੂੰ ਫਰੀਡਮ ਕੌਨਵੌਏ ਦਾ ਨਾਂ ਦਿੱਤਾ ਗਿਆ ਹੈ। ਇਸ ਵੀਕੈਂਡ ਇਸ ਕਾਫਲੇ ਵੱਲੋਂ ਓਟਵਾ ਵਿੱਚ ਰੈਲੀ ਕੀਤੀ ਜਾਵੇਗੀ। ਇਸ ਕਾਫਲੇ ਵਿੱਚ ਸ਼ਾਮਲ ਡਰਾਈਵਰ ਫੈਡਰਲ ਸਰਕਾਰ ਵੱਲੋਂ ਵੈਕਸੀਨ ਨੂੰ ਲਾਜ਼ਮੀ ਕੀਤੇ ਜਾਣ ਦੇ ਖਿਲਾਫ ਹਨ।ਮੰਗਲਵਾਰ ਸਵੇਰੇ ਇਹ ਕਾਫਲਾ ਰਿਜਾਇਨਾ ਤੋਂ ਤੁਰਿਆ ਤੇ ਦਿਨ ਵੇਲੇ ਵਿੰਨੀਪੈਗ ਵਿੱਚ ਰੁਕਣ ਤੋਂ ਬਾਅਦ ਓਨਟਾਰੀਓ ਪਹੁੰਚ ਗਿਆ। ਇਸ ਕਾਫਲੇ ਦਾ ਵੱਡੀ ਗਿਣਤੀ ਵਿੱਚ ਸਮਰਥਕਾਂ ਵੱਲੋਂ ਸਵਾਗਤ ਕੀਤਾ ਗਿਆ। ਰਿਜਾਇਨਾ ਪੁਲਿਸ ਸਰਵਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ 1200 ਦੇ ਨੇੜੇ ਤੇੜੇ ਟਰੱਕ ਸੋਮਵਾਰ ਰਾਤ ਨੂੰ ਸਿਟੀ ਵਿੱਚੋਂ ਲੰਘੇ।
ਸ਼ਨਿੱਚਰਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਮੁਜ਼ਾਹਰਾ ਕਰਨ ਤੋਂ ਪਹਿਲਾਂ ਇਸ ਗਰੁੱਪ ਦੇ ਜੀਟੀਏ ਵਿੱਚੋਂ ਲੰਘਣ ਦੀ ਵੀ ਸੰਭਾਵਨਾ ਹੈ।ਜਿ਼ਕਰਯੋਗ ਹੈ ਕਿ ਫੈਡਰਲ ਸਰਕਾਰ ਦੇ ਨਵੇਂ ਵੈਕਸੀਨ ਨਿਯਮ ਤੋਂ ਭਾਵ ਹੈ ਕਿ ਟਰੱਕ ਡਰਾਈਵਰਾਂ ਨੂੰ ਕੈਨੇਡਾ ਦੀ ਸਰਹੱਦ ਪਾਰ ਕਰਨ ਤੋਂ ਪਹਿਲਾਂ ਦੋ ਹਫਤੇ ਦੇ ਕੁਆਰਨਟੀਨ ਤੋਂ ਬਚਣ ਲਈ ਵੈਕਸੀਨੇਸ਼ਨ ਪੂਰੀ ਕਰਵਾਉਣੀ ਹੋਵੇਗੀ ਤੇ ਨਹੀਂ ਤਾਂ ਕੋਵਿਡ-19 ਲਈ ਮੌਲੀਕਿਊਲਰ ਟੈਸਟ ਕਰਵਾਉਣਾ ਹੋਵੇਗਾ।
ਡਰਾਈਵਰਾਂ ਦਾ ਤਰਕ ਹੈ ਕਿ ਇਸ ਨਾਲ ਉਨ੍ਹਾਂ ਦੀ ਆਜ਼ਾਦੀ ਦੀ ਉਲੰਘਣਾ ਹੁੰਦੀ ਹੈ ਤੇ ਉਨ੍ਹਾਂ ਦੇ ਰੋਜ਼ੀ ਰੋਟੀ ਕਮਾਉਣ ਦੇ ਰਾਹ ਵਿੱਚ ਅੜਿੱਕਾ ਪੈਂਦਾ ਹੈ।ਉਨ੍ਹਾਂ ਦਾ ਇਹ ਵੀ ਕਹਿਣਾ ਹੈ ਕਿ ਇਸ ਨਾਲ ਕੈਨੇਡਾ ਦੇ ਕਈ ਹਿੱਸਿਆਂ ਵਿੱਚ ਫੂਡ ਤੇ ਹੋਰਨਾਂ ਜ਼ਰੂਰੀ ਵਸਤਾਂ ਦੀ ਡਲਿਵਰੀ ਵਿੱਚ ਵੀ ਵਿਘਣ ਪਵੇਗਾ।