ਬਰੈਂਪਟਨ ਪੋਸਟ ਬਿਉਰੋ: ਕਿਸੇ ਸਰਕਾਰੀ ਅਦਾਰੇ ਵੱਲੋਂ ਆਮ ਤੌਰ ਉੱਤੇ ਪਰੈੱਸ ਰੀਲੀਜ਼ ਉਸ ਵੇਲੇ ਭੇਜਿਆ ਜਾਂਦਾ ਹੈ ਜਦੋਂ ਕੋਈ ਵਿਸ਼ੇਸ਼ ਗੱਲ ਵਾਪਰੀ ਹੋਵੇ ਖਾਸਕਰਕੇ ਵਿਕਾਸ ਸਬੰਧਿਤ ਮਾਮਲਿਆਂ ਦੇ ਕੇਸ ਵਿੱਚ। ਅਜਿਹੀ ਗੱਲ ਬਰੈਂਪਟਨ ਸਿਟੀ ਉੱਤੇ ਨਹੀਂ ਢੁੱਕਦੀ ਜੇਕਰ ਉਹਨਾਂ ਦੇ ਕੱਲ ਜਾਰੀ ਕੀਤੇ ਗਏ ਪਰੈੱਸ ਰੀਲੀਜ਼ ਨੂੰ ਵੇਖਿਆ ਜਾਵੇ। ਥੋੜੇ ਦਿਨ ਪਹਿਲਾਂ ਆਨਲਾਈਨ ਵਿਉਪਾਰ ਵਿੱਚ ਵੱਡਾ ਰੁਤਬਾ ਰੱਖਣ ਵਾਲੀ ਕੰਪਨੀ ਐਮਾਜ਼ੋਨ ਨੇ ਫੈਸਲਾ ਕੀਤਾ ਕਿ ਉਹ ਗਰੇਟਰ ਟੋਰਾਂਟੋ ਏਰੀਆ ਵਿੱਚ ਆਪਣਾ ਹੈਡਕੁਆਰਟਰ 2 (HQ2) ਸਥਾਪਤ ਨਹੀਂ ਕਰੇਗੀ। ਕੰਪਨੀ ਨੇ ਇਹ ਹੈਡਕੁਆਰਟਰ ਅਮਰੀਕਾ ਵਿੱਚ ਦੋ ਲੋਕੇਸ਼ਨਾਂ ਨਿਊਯਾਰਕ ਸਿਟੀ ਅਤੇ ਵਿਰਜੀਨੀਆ ਵਿੱਚ ਅਰਲਿੰਗਟਨ ਵਿਖੇ ਸਥਾਪਤ ਕਰਨ ਦਾ ਫੈਸਲਾ ਕੀਤਾ ਹੈ।

ਬਰੈਂਪਟਨ ਸਿਟੀ ਨੇ ਆਪਣੀ ਪਿੱਠ ਥਾਪੜਦੇ ਹੋਏ ਆਸ ਕੀਤੀ ਹੈ ਕਿ ਬਰੈਂਪਟਨ ਵਾਸੀ ਖੁਸ਼ੀਆਂ ਮਨਾਉਣ ਕਿ ਉਹਨਾਂ ਦੇ ਸ਼ਹਿਰ ਨੂੰ ਮਾਰਖਮ, ਮਿਸੀਸਾਗਾ, ਡੁਰਹਮ ਅਤੇ ਯੌਰਕ ਵਿੱਚੋਂ ਉਹ ਇੱਕ ਲੋਕੇਸ਼ਨ ਵਜੋਂ ਅਰਜ਼ੀ ਕਰਨ ਦਾ ਮੌਕਾ ਮਿਲਿਆ ਜਿੱਥੇ ਐਮਾਜ਼ੋਨ ਹੈਡਕੁਆਰਟਰ ਸਥਾਪਤ ਕਰ ਸਕਦੀ ਸੀ। ਸੰਭਾਵਨਾ ਅਤੇ ਉਮੀਦ ਉੱਤੇ ਸਮੁੱਚੇ ਸ਼ਹਿਰ ਨੂੰ ਜਿਉਂਦਾ ਰੱਖਣ ਦੀ ਇਹ ਇੱਕ ਅਨੋਖੀ ਮਿਸਾਲ ਆਖੀ ਜਾ ਸਕਦੀ ਹੈ।

ਮਿਲਟਨ ਬੈਰੀ ਦਾ ਕਥਨ ਹੈ ਕਿ ਜੇਕਰ ਅਵਸਰ ਤੁਹਾਡੇ ਦਰਵਾਜ਼ੇ ਆ ਕੇ ਦਸਤਕ ਨਹੀਂ ਦੇ ਰਿਹਾ ਤਾਂ ਇੱਕ ਹੋਰ ਦਰਵਾਜ਼ਾ ਬਣਾ ਲਵੋ। ਜਾਪਦਾ ਹੈ ਕਿ ਬਰੈਂਪਟਨ ਸਿਟੀ ਨੇ ਕੋਈ ਨਵਾਂ ਦਰਵਾਜ਼ਾ ਉਸਾਰ ਕੇ ਅਵਸਰਾਂ ਦੇ ਦਾਖਲ ਹੋਣ ਲਈ ਰਾਹ ਪੱਧਰਾ ਕਰਨ ਦੀ ਥਾਂ ਨਿਕਾਰੇ ਗਏ ਦਰਵਾਜ਼ੇ ਨੂੰ ਖੁਸ਼ੀਆ ਦਾ ਦੁਆਰ ਸਮਝ ਲਿਆ ਹੈ।