ਬਰੈਂਪਟਨ, ਪੋਸਟ ਬਿਉਰੋ- ਬਰੈਂਪਟਨ ਵੈਸਟ ਤੋਂ ਮੈਂਬਰ ਪਾਰਲੀਮੈਂਟ ਅਤੇ ਅੰਤਰਰਾਸ਼ਟੀ ਵਿਕਾਸ ਮੰਤਰੀ ਲਈ ਪਾਰਲੀਮਾਨੀ ਸਕੱਤਰ ਕਮਲ ਖੈਹਰਾ ਨੇ ਕਿਹਾ ਹੈ ਕਿ ਇਸ ਮਹੀਨੇ ਦੇ ਮੁੱਢ ਵਿੱਚ ਕੈਨੇਡਾ, ਅਮਰੀਕਾ ਅਤੇ ਮੈਕਸੀਕੋ ਨੇ ਜੋ ਯੂਨਾਈਟਡ ਸਟੇਟਸ-ਮੈਕਸੀਕੋ-ਕੈਨੇਡਾ ਐਗਰੀਮੈਂਟ (ਯੂ ਐਸ ਐਮ ਸੀ ਏ) ਨਾਮਕ ਇੱਕ ਨਵੇਂ ਅਤੇ ਆਧੁਨਿਕ ਟਰੇਡ ਸਮਝੌਤੇ ਨੂੰ ਸਹੀ ਕੀਤਾ ਹੈ, ਉਹ ਕੈਨੇਡਾ ਦੇ ਟਰੇਡ ਹਿੱਤਾਂ ਲਈ ਬਹੁਤ ਲਾਭਕਾਰੀ ਹੈ।
ਇਹ ਸਮਝੌਤਾ ਲੇਬਰ, ਵਾਤਾਵਰਣ, ਆਟੋਮੋਟਿਵ ਟਰੇਡ, ਵਿਵਾਦਾਂ ਦੇ ਹੱਲ, ਸੱਭਿਆਚਾਰ, ਐਨਰਜੀ ਅਤੇ ਖੇਤੀਬਾੜੀ ਅਤੇ ਖੇਤੀਬਾੜੀ ਖਾਦ ਪਦਾਰਥਾਂ ਦੇ ਖੇਤਰਾਂ ਵਿੱਚ ਕੈਨੇਡੀਅਨ ਬਿਜਨਸਾਂ, ਵਰਕਰਾਂ ਅਤੇ ਕਮਿਉਨਿਟੀਆਂ ਲਈ ਖਾਸ ਮਹੱਤਤਾ ਰੱਖਦਾ ਹੈ। ਯੂਨਾਈਟਡ ਸਟੇਟਸ-ਮੈਕਸੀਕੋ-ਕੈਨੇਡਾ ਐਗਰੀਮੈਂਟ ਨੌਰਥ ਅਮਰੀਕਨ ਫਰੀ ਟਰੇਡ ਐਗਰੀਮੈਂਟ (ਨਾਫਟਾ) ਦਾ ਸੁਧਰਿਆ ਅਤੇ ਆਧੁਨਿਕ ਰੂਪ ਹੈ ਜੋ ਕੈਨੇਡੀਅਨ ਵਰਕਰਾਂ ਅਤੇ ਬਿਜਨਸਾਂ ਲਈ ਇੱਕ ਸੁਰੱਖਿਅਤ ਅਤੇ ਟਿਕਾਊ ਟਰੇਡ ਵਾਤਾਵਰਣ ਪ੍ਰਦਾਨ ਕਰਦਾ ਹੈ। ਆਟੋਮੋਟਿਵ ਮੈਨੂਫੈਕਚਰਿੰਗ, ਖੇਤੀਬਾੜੀ, ਲੇਬਰ, ਬੌਧਿਕ ਸਰਮਾਏ ਦੇ ਅਧਿਕਾਰਾਂ, ਸੱਭਿਆਚਾਰ, ਅਤੇ ਵਿਵਾਦ ਦੀ ਸੈਟਲਮੈਂਟ ਵਰਗੇ ਮੁੱਖ ਖੇਤਰਾਂ ਉੱਤੇ ਸਮਝ ਪੈਦਾ ਕਰਨ ਵਾਲਾ ਇਹ ਨਵਿਆਇਆ ਸਮਝੌਤਾ ਨਾਫਟਾ ਨਾਲੋਂ ਵੀ ਇੱਕ ਕਦਮ ਅੱਗੇ ਦੀ ਗੱਲ ਹੈ।
ਬੀਬੀ ਖੈਹਰਾ ਨੇ ਅੱਗੇ ਕਿਹਾ, “ਯੂਨਾਈਟਡ ਸਟੇਟਸ-ਮੈਕਸੀਕੋ-ਕੈਨੇਡਾ ਐਗਰੀਮੈਂਟ (ਯੂ ਐਸ ਐਮ ਸੀ ਏ) ਇੱਕ ਪ੍ਰਗਤੀਸ਼ੀਲ ਅਤੇ ਸਮੁੱਚਤਾ ਭਰਿਆ ਟਰੇਡ ਐਗਰੀਮੈਂਟ ਹੈ ਜੋ ਸਾਡੇ ਬਿਜਨਸਾਂ, ਵਰਕਰਾਂ ਅਤੇ ਕਮਿਉਨਿਟੀਆਂ ਨੂੰ ਇੱਕ ਸੁਰੱਖਿਅਤ ਅਤੇ ਟਿਕਾਊ ਵਾਤਾਵਰਣ ਪ੍ਰਦਾਨ ਕਰੇਗਾ, ਜਿਸ ਨਾਲ ਇੱਕ ਮਜ਼ਬੂਤ ਮੱਧ ਵਰਗ ਪੈਦਾ ਹੋਵੇਗਾ। ਇਹ ਸਮਝੌਤਾ ਚੰਗੀਆਂ, ਵੱਧ ਤਨਖਾਹ ਵਾਲੀਆਂ ਜੌਬਾਂ ਤਿਆਰ ਕਰੇਗਾ ਅਤੇ ਕੈਨੇਡੀਅਨਾਂ ਲਈ ਬਿਹਤਰ ਅਵਸਰ ਪੈਦਾ ਕਰੇਗਾ।”