ਬਰੈਂਪਟਨ, 29 ਅਕਤੂਬਰ (ਪੋਸਟ ਬਿਊਰੋ) : ਮਨਦੀਪ ਤੇ ਅਮਨ ਪਿਛਲੇ 11 ਸਾਲਾਂ ਤੋਂ ਇੱਕਠੇ ਸਨ ਤੇ ਹਾਦਸੇ ਤੋਂ ਇੱਕ ਹਫਤਾ ਪਹਿਲਾਂ ਹੀ ਅਜੇ ਉਨ੍ਹਾਂ ਵਿਆਹ ਕਰਵਾਇਆ ਸੀ। ਬੀਤੇ ਦਿਨੀਂ ਜਦੋਂ ਉਹ ਆਪਣੇ ਕਿਸੇ ਪਰਿਵਾਰਕ ਡਿਨਰ ਤੋਂ ਪਰਤ ਰਹੇ ਸਨ ਤਾਂ ਹਾਦਸਾ ਵਾਪਰਨ ਕਾਰਨ ਅਮਨ ਦੀ ਮੌਕੇ ਉੱਤੇ ਹੀ ਮੌਤ ਹੋ ਗਈ।

28 ਅਕਤੂਬਰ ਨੂੰ ਅਮਨ ਨਮਿੱਤ ਕੈਂਡਲ ਵਿਜਿਲ ਰੱਖਿਆ ਗਿਆ ਸੀ। ਜਿੱਥੇ ਇਹ ਵਿਜਿਲ ਅਮਨ ਦੇ ਸਨਮਾਨ ਵਿੱਚ ਰੱਖਿਆ ਗਿਆ ਉੱਥੇ ਹੀ ਲੋਕਾਂ ਨੂੰ ਸੇਫ ਤੇ ਜਿ਼ੰਮੇਵਾਰਾਨਾ ਡਰਾਈਵਿੰਗ ਦੀ ਅਹਿਮੀਅਤ ਦੱਸਣ ਤੇ ਇਸ ਬਾਰੇ ਉਨ੍ਹਾਂ ਨੂੰ ਜਾਗਰੂਕ ਕਰਨ ਲਈ ਵੀ ਰੱਖਿਆ ਗਿਆ। ਇੱਥੇ ਦੱਸਣਾ ਬਣਦਾ ਹੈ ਕਿ ਜਿਸ ਵਿਅਕਤੀ ਨੇ ਰੈੱਡ ਲਾਈਟ ਕਰੌਸ ਕੀਤੀ ਉਹ ਤਾਂ ਮੌਕੇ ਤੋਂ ਪੈਦਲ ਹੀ ਫਰਾਰ ਹੋ ਗਿਆ ਸੀ। ਫਿਰ ਉਸ ਨੇ ਦੋ ਕੁ ਦਿਨ ਬਾਅਦ ਖੁਦ ਨੂੰ ਪੁਲਿਸ ਹਵਾਲੇ ਕਰ ਦਿੱਤਾ ਤੇ ਉਸ ਨੂੰ ਜ਼ਮਾਨਤ ਵੀ ਮਿਲ ਗਈ। ਹੁਣ ਉਹ ਮੁੜ ਸੜਕਾਂ ਉੱਤੇ ਖੁੱਲ੍ਹਾ ਘੁੰਮ ਰਿਹਾ ਹੈ।
ਹੁਣ ਲੋਕ ਮੰਗ ਕਰ ਰਹੇ ਹਨ ਕਿ ਅਮਨ ਨੂੰ ਇਨਸਾਫ ਦੇਣ ਲਈ ਅਜਿਹੇ ਜੁਰਮ ਨੂੰ ਅੰਜਾਮ ਦੇਣ ਵਾਲੇ ਵਿਅਕਤੀ ਨੂੰ ਸਜ਼ਾ ਦਿੱਤੀ ਜਾਵੇ। ਇਸ ਹਾਦਸੇ ਤੋਂ ਪ੍ਰਭਾਵਿਤ ਪਰਿਵਾਰਾਂ ਨੂੰ ਆਸ ਹੈ ਕਿ ਉਨ੍ਹਾਂ ਨੂੰ ਨਿਆਂ ਮਿਲੇਗਾ।