ਬਰੈਂਪਟਨ ਪੋਸਟ ਬਿਉਰੋ: ਇੱਕ ਸਾਲ ਦੀ ਤਫ਼ਤੀਸ਼ ਅਤੇ ਪੁੱਛ ਪੜਤਾਲ ਤੋਂ ਬਾਅਦ ਯੌਰਕ ਰੀਜਨਲ ਪੁਲੀਸ ਨੇ ਟੋਰਾਂਟੋ ਦੀ ਇੱਕ ਤਾਂਤਰਿਕ ਨੂੰ ਚਾਰਜ ਕੀਤਾ ਹੈ। ਇਸ ਤਾਂਤਰਿਕ ਨੇ ਮਾੜੀਆਂ ਰੂਹਾਂ ਤੋਂ ਛੁਟਕਾਰਾ ਦੁਆਉਣ ਦੀ ਫੀਸ ਵਜੋਂ ਆਪਣੇ ਇੱਕ ਗਾਹਕ ਤੋਂ ਕਥਿਤ ਰੂਪ ਵਿੱਚ 6 ਲੱਖ ਡਾਲਰ ਠੱਗ ਲਏ ਸਨ। ਪੁਲੀਸ ਮੁਤਾਬਕ ਇਹ ਗਾਹਕ ‘ਈਵਾਨਾ’ ਨਾਮਕ ਤਾਂਤਰਿਕ ਨੂੰ 6 ਸਾਲ ਪਹਿਲਾਂ ਮਿਲਿਆ ਸੀ।

ਪੁਲੀਸ ਮੁਤਾਬਕ ਤਾਂਤਰਿਕ ਨੇ ਆਪਣੇ 67 ਸਾਲਾ ਗਾਹਕ ਨੂੰ ਆਪਣੀਆਂ ਗੱਲਾਂ ਵਿੱਚ ਐਨਾ ਮੋਹਿਤ ਕਰ ਲਿਆ ਕਿ ਉਹ ਮਾੜੀਆਂ ਰੂਹਾਂ ਤੋਂ ਪਿੱਛਾ ਛੁਡਵਾਉਣ ਵਾਸਤੇ ਆਪਣੇ ਘਰ ਨੂੰ ਵੇਚ ਕੇ ਪੈਸੇ ਭਰਨ ਲਈ ਤਿਆਰ ਹੋ ਗਿਆ। ਮਕਾਨ ਤੋਂ ਇਲਾਵਾ ਇਸ ਵਿਅਕਤੀ ਨੂੰ ਆਪਣੀ ਕਾਰ ਵੇਚਣ ਤੋਂ ਇਲਾਵਾ ਕਰੈਡਿਟ ਕਾਰਡ ਅਤੇ ਕਈ ਹੋਰ ਚੀਜ਼ਾਂ ਤੋਂ ਹੱਥ ਧੋਣੇ ਪਏ ਸਨ।

27 ਸਾਲਾਂ ਦੀ ਮੁਟਿਆਰ ਤਾਂਤਰਿਕ ਦਾ ਅਸਲੀ ਨਾਮ ਸਾਮਾਂਥਾ ਸਟੀਵਨਸਨ ਹੈ ਜਿਸਨੂੰ ਈਵਾਨਾ ਲੋਪੇਜ਼ ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ।

ਵਰਨਣਯੋਗ ਹੈ ਕਿ ਸਾਲ 2016 ਵਿੱਚ ਟੋਰਾਂਟੋ ਸਟਾਰ ਅਖਬਾਰ, ਰਾਇਰਸਨ ਯੂਨੀਵਰਸਿਟੀ ਦੇ ਜਰਨਲਿਜ਼ਮ ਸਕੂਲ ਅਤੇ ਸੀ ਟੀ ਵੀ ਦੇ W5ਪ੍ਰੋਗਰਾਮ ਵੱਲੋਂ ਇੱਕ ਦਰਜਨ ਦੇ ਕਰੀਬ ਤਾਂਤਰਿਕਾਂ ਨਾਲ ਲੁਕਵੇਂ ਰੂਪ ਵਿੱਚ ਮੁਲਾਕਾਤਾਂ ਕੀਤੀਆਂ ਗਈਆਂ ਸਨ। ਇਸ ਖੋਜ ਵਿੱਚ ਪਾਇਆ ਗਿਆ ਸੀ ਕਿ ਤਾਂਤਰਿਕਾਂ ਦੇ ਭਰਮ ਜਾਲ ਵਿੱਚ ਫੱਸਣ ਵਾਲਿਆਂ ਵਿੱਚ ਅਧਿਆਪਕ, ਰੀਅਲ ਐਸਟੇਟ ਏਜੰਟ, ਡਾਕਟਰ, ਕਾਰਪੋਰੇਟ ਮੈਨੇਜਨ ਅਤੇ ਬੇਅ ਸਟਰੀਟ ਉੱਤੇ ਸ਼ੇਅਰਾਂ ਦੀ ਖਰੀਦੋ ਫਰੋਖਤ ਕਰਨ ਵਾਲੇ ਏਜੰਟਾਂ ਤੱਕ ਤਕਰੀਬਨ ਹਰ ਕਿੱਤੇ ਦੇ ਲੋਕ ਸ਼ਾਮਲ ਹਨ।

ਅਮਰੀਕਾ ਵਿੱਚ ਤਾਂਤਰਿਕਾਂ ਉੱਤੇ ਆਧਰਿਤ ਇੰਡਸਟਰੀ ਦਾ ਕੁੱਲ ਲੈਣ ਦੇਣ 2 ਬਿਲੀਅਨ ਡਾਲਰ ਸਾਲਾਨਾ ਦੇ ਕਰੀਬ ਮੰਨਿਆ ਜਾਂਦਾ ਹੈ।