ਮਿਸੀਸਾਗਾ ਪੋਸਟ ਬਿਉਰੋ: ਮਿਸੀਸਾਗਾ ਵਿੱਚ ਮੇਅਰ ਬੌਨੀ ਕਰੌਂਬੀ ਨੇ ਆਸ ਮੁਤਾਬਕ ਸਹਿਜਤਾ ਨਾਲ ਹੀ ਚੋਣ ਜਿੱਤ ਲਈ ਹੈ। ਉਸਨੂੰ ਕੁੱਲ ਭੁਗਤੀਆਂ ਵੋਟਾਂ ਦਾ ਪ੍ਰਤੀਸ਼ਤ ਹਾਸਲ ਵੋਟਾਂ ਹਾਸਲ ਹੋਈਆਂ ਹਨ ਜਿਸਤੋਂ ਮਿਸੀਸਾਗਾ ਵਾਸੀਆਂ ਨੇ ਪ੍ਰਭਾਵ ਦਿੱਤਾ ਹੈ ਕਿ ਉਹ ਪਿਛਲੀ ਮੇਅਰ ਹੇਜ਼ਲ ਮਕੈਲੀਅਨ ਵਾਗੂੰ ਬੌਨੀ ਕਰੌਂਬੀ ਨੂੰ ਵੀ ਵਾਰ ਵਾਰ ਮੇਅਰ ਬਣਾ ਕੇ ਸਿਟੀ ਹਾਲ ਵਿੱਚ ਸਥਿਰਤਾ ਬਣਾਈ ਰੱਖਣਾ ਚਾਹੁੰਦੇ ਹਨ। ਇਸ ਸਥਿਤੀ ਬਰੈਂਪਟਨ ਨਾਲੋਂ ਬਿਲਕੁਲ ਵੱਖਰੀ ਹੈ ਜਿੱਥੇ ਸਿਟੀ ਕਾਉਂਸਲ ਨੇ ਪਿਛਲੇ ਚਾਰ ਸਾਲਾਂ ਵਿੱਚ ਕਦੇ ਵੀ ਏਕੇ ਨਾਲ ਕੰਮ ਕਰਨ ਦਾ ਪ੍ਰਭਾਵ ਨਹੀਂ ਦਿੱਤਾ।
ਮਿਸੀਸਾਗਾ ਵਿੱਚ ਸਿਟੀ ਕਾਉਂਸਲ ਲਈ ਦੋ ਹੋਰ ਨਤੀਜੇ ਦਿਲਚਸਪ ਰਹੇ। ਵਾਰਡ ਨੰਬਰ 7 ਤੋਂ ਸਾਬਕਾ ਲਿਬਰਲ ਐਮ ਪੀ ਪੀ ਅਤੇ ਭਾਰਤੀ ਮੂਲ ਦੀ ਉਮੀਦਵਾਰ ਦੀਪਿਕਾ ਦਰਮੇਲਾ ਨੇ ਚੋਣ ਜਿੱਤੀ ਹੈ ਜਦੋਂ ਕਿ ਵਾਰਡ ਨੰਬਰ 1 ਤੋਂ ਸਾਬਕਾ ਕੰਜ਼ਰਵੇਟਿਵ ਐਮ ਪੀ ਬਰੈਡ ਬੱਟ ਨੂੰ ਹਾਰ ਦਾ ਮੂੰਹ ਵੇਖਣਾ ਪਿਆ ਹੈ। ਬਾਕੀ ਸਾਰੇ ਵਾਰਡਾਂ ਵਿੱਚ ਆਸ ਮੁਤਾਬਕ ਮੌਜੂਦਾ ਕਾਉਂਸਲਰ ਦੁਬਾਰਾ ਚੁਣੇ ਗਏ ਹਨ।