ਬਰੈਂਪਟਨ, 21 ਅਕਤੂਬਰ (ਪੋਸਟ ਬਿਊਰੋ)- ਕੈਨੇਡੀਅਨ ਪੰਜਾਬੀ ਬਰਾਡਕਾਸਟਰ ਐਸੋਸੀਏਸ਼ਨ ਦੇ ਕੋਆਰਡੀਨੇਟਰ ਤੇ ਸਮੂਹ ਸੰਸਥਾ ਵਲੋਂ ਅੱਜ ਭਾਈਚਾਰੇ ਨੂੰ ਮਿਉਸਪਲ ਚੋਣਾਂ ਵਿਚ ਵੋਟ ਪਾਉਣ ਲਈ ਨਿਕਲਣ ਲਈ ਅਪੀਲ ਕੀਤੀ ਗਈ ਹੈ। ਪਿਛਲੇ ਕਈ ਦਿਨਾਂ ਤੋਂ ਸੰਸਥਾ ਦੇ ਮੈਂਬਰ ਆਪਣੇ ਰੇਡੀਓ ਪ੍ਰੋਗਰਾਮ ਵਲੋਂ ਇਕ ਰਿਕਾਰਡਡ ਸੰਦੇਸ਼ ਵੀ ਚਲਾ ਰਹੇ ਸਨ। ਜਿਸ ਵਿਚ ਵੱਧ ਤੋ ਵੱਧ ਵੋਟ ਪਾਉਣ ਦਾ ਹੱਕ ਵਰਤਣ ਲਈ ਅਪੀਲ ਕੀਤੀ ਗਈ ਸੀ। ਸ਼੍ਰੀ ਗਿੱਲ ਨੇ ਕਿਹਾ ਕਿ 1946 ਵਿਚ ਵੱਡੇ ਸੰਘਰਸ਼ ਤੋ ਬਾਅਦ ਸਾਨੂੰ ਕੈਨੇਡਾ ਵਿਚ ਵੋਟ ਪਾਉਣ ਦਾ ਹੱਕ ਹਾਸਿਲ ਹੋਇਆ ਸੀ ਤੇ ਇਸ ਲਈ ਅਸੀਂ ਵੱਡੀਆ ਕੁਰਬਾਨੀਆਂ ਕੀਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਆਓ ਅੱਜ ਆਪਣੇ ਇਸ ਜੱਦੀ ਹੱਕ ਦੀ ਵਰਤੋ ਕਰੀਏ ਤੇ ਸਹੀ ਉਮੀਦਵਾਰਾਂ ਨੂੰ ਚੁਣੀਏ। ਆਮ ਤੌਰ `ਤੇ ਇਨ੍ਹਾਂ ਚੋਣਾਂ `ਚ 100 ਫੀਸਦੀ ਲੋਕਾਂ ਦੀ ਨੁਮਾਇੰਦਗੀ ਦਾ ਫੈਸਲਾ 30 ਫੀਸਦੀ ਦੇ ਕਰੀਬ ਲੋਕ ਹੀ ਕਰਦੇ ਹਨ ਤੇ ਬਾਕੀ ਦੇ 70 ਫੀਸਦੀ ਸਿਵਾਏ ਸਿ਼ਕਾਇਤਾਂ ਕਰਨ ਤੋ ਹੋਰ ਕੁੱਝ ਨਹੀਂ ਕਰਦੇ। ਉਨ੍ਹਾਂ ਕਿਹਾ ਕਿ ਪੰਜਾਬੀ ਭਾਈਚਾਰਾ ਇਸ ਵਾਰ ਵੱਧ ਤੋਂ ਵੱਧ ਵੋਟ ਪਾਉਣ ਲਈ ਨਿੱਕਲੇ ਤੇ ਇਸ ਐਵਰੇਜ ਨੂੰ ਵਧਾਵੇ।