ਓਟਵਾ, 13 ਮਈ (ਪੋਸਟ ਬਿਊਰੋ) : ਯੂਐਸ ਸੈਂਟਰਜ਼ ਫੌਰ ਡਜ਼ੀਜ਼ ਕੰਟਰੋਲ ਐਂਡ ਪ੍ਰਿਵੈਂਸ਼ਨ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਲੋਕਾਂ ਦੀ ਕੋਵਿਡ-19 ਵੈਕਸੀਨੇਸ਼ਨ ਪੂਰੀ ਹੋ ਚੁੱਕੀ ਹੈ ਉਨ੍ਹਾਂ ਨੂੰ ਆਊਟਡੋਰ ਤੇ ਇਨਡੋਰ ਮਾਸਕ ਪਾਉਣ ਦੀ ਲੋੜ ਨਹੀਂ।ਪਰ ਕੈਨੇਡਾ ਦੇ ਉੱਘੇ ਸਿਹਤ ਅਧਿਕਾਰੀਆਂ ਵਿੱਚੋਂ ਇੱਕ ਦਾ ਕਹਿਣਾ ਹੈ ਕਿ ਸਾਨੂੰ ਅਜੇ ਵੱਖਰੀ ਪਹੁੰਚ ਅਪਨਾਉਣ ਦੀ ਲੋੜ ਹੈ।
ਵੀਰਵਾਰ ਨੂੰ ਓਟਵਾ ਵਿੱਚ ਇੱਕ ਬ੍ਰੀਫਿੰਗ ਦੌਰਾਨ ਕੈਨੇਡਾ ਦੇ ਡਿਪਟੀ ਚੀਫ ਪਬਲਿਕ ਹੈਲਥ ਆਫੀਸਰ ਡਾ· ਹੌਵਰਡ ਨੂ ਨੇ ਆਖਿਆ ਕਿ ਸਾਨੂੰ ਇੱਕ ਸਾਂਝੀ ਜਾਂ ਕਮਿਊਨਿਟੀ ਵਾਲੀ ਪਹੁੰਚ ਲੈ ਕੇ ਅੱਗੇ ਵੱਧਣਾ ਚਾਹੀਦਾ ਹੈ, ਇਹ ਨਹੀਂ ਵੇਖਣਾ ਚਾਹੀਦਾ ਕਿ ਕਿਸੇ ਇੱਕ ਵਿਅਕਤੀ ਨੂੰ ਇੱਕ ਜਾਂ ਦੋ ਡੋਜ਼ਾਂ ਨਾਲ ਕੀ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਆਖਿਆ ਕਿ ਭਾਵੇਂ ਹੋਰ ਕੈਨੇਡੀਅਨਾਂ ਦਾ ਟੀਕਾਕਰਣ ਹੋ ਜਾਂਦਾ ਹੈ ਪਰ ਪਬਲਿਕ ਹੈਲਥ ਮਾਪਦੰਡ ਜਿਵੇਂ ਕਿ ਫਿਜ਼ੀਕਲ ਡਿਸਟੈਂਸਿੰਗ, ਮਾਸਕ ਪਾਉਣਾ ਤੇ ਵਾਰੀ ਵਾਰੀ ਹੱਥ ਧੋਣਾ ਇਸ ਵਾਇਰਸ ਤੋਂ ਬਚਣ ਦਾ ਪੱਕਾ ਨੁਸਖਾ ਰਹਿਣਗੇ।
ਡਾ· ਨੂ ਨੇ ਆਖਿਆ ਕਿ ਨਵੀਂ ਇਨਫੈਕਸ਼ਨ ਦੀ ਦਰ, ਹਰੇਕ ਇਨਫੈਕਸ਼ਨ ਤੋਂ ਪੈਦਾ ਹੋਣ ਵਾਲੇ ਨਵੇਂ ਮਾਮਲੇ, ਟੈਸਟ ਪਾਜ਼ੀਟਿਵਿਟੀ ਦਰ ਤੇ ਹੈਲਥ ਕੇਅਰ ਸਿਸਟਮ ਉੱਤੇ ਪੈਣ ਵਾਲੇ ਅਸਰ ਵਰਗੇ ਸਾਰੇ ਮੁੱਦਿਆਂ ਨੂੰ ਧਿਆਨ ਵਿੱਚ ਲੈ ਕੇ ਚੱਲਣਾ ਜ਼ਰੂਰੀ ਹੈ। ਜੇ ਸਾਰਾ ਕੁੱਝ ਇੱਕ ਖਾਸ ਸਮੇਂ ਉੱਤੇ ਠੀਕ ਲੱਗਦਾ ਹੈ ਤੇ ਵੈਕਸੀਨ ਦੀ ਕਵਰੇਜ ਵੀ ਪੂਰੀ ਹੋ ਰਹੀ ਹੈ ਉਸ ਸਮੇਂ ਲੋਕਲ ਹੈਲਥ ਅਧਿਕਾਰੀਆਂ ਨੂੰ ਪਾਬੰਦੀਆਂ ਘਟਾਉਣ ਬਾਰੇ ਵਿਚਾਰ ਕਰਨਾ ਚਾਹੀਦਾ ਹੈ।
ਡਾ·ਨੂ ਨੇ ਆਖਿਆ ਕਿ 18 ਸਾਲ ਤੋਂ ਵੱਧ ਉਮਰ ਦੇ 40 ਫੀ ਸਦੀ ਕੈਨੇਡੀਅਨਾਂ ਨੂੰ ਹੁਣ ਤੱਕ ਕੋਵਿਡ-19 ਵੈਕਸੀਨ ਦੀ ਪਹਿਲੀ ਡੋਜ਼ ਨਾਲ ਵੈਕਸੀਨੇਟ ਕੀਤਾ ਜਾ ਚੁੱਕਿਆ ਹੈ।ਇਹ ਅੰਕੜਾ ਚੰਗਾ ਤਾਂ ਹੈ ਪਰ ਪ੍ਰੋਟੈਕਸ਼ਨ ਲਈ ਕਾਫੀ ਨਹੀਂ ਹੈ। ਦੂਜੇ ਪਾਸੇ ਅਮਰੀਕਾ ਦੀ 46 ਫੀ ਸਦੀ ਆਬਾਦੀ ਨੂੰ ਘੱਟੋ ਘੱਟ ਇੱਕ ਡੋਜ਼ ਦਿੱਤੀ ਜਾ ਚੁੱਕੀ ਹੈ ਤੇ ਇੱਕ ਤਿਹਾਈ ਨੂੰ ਦੋਵੇਂ ਡੋਜ਼ਾਂ ਲੱਗ ਚੁੱਕੀਆਂ ਹਨ। ਡਾ· ਨੂ ਨੇ ਇਹ ਟਿੱਪਣੀ ਓਨਟਾਰੀਓ ਵੱਲੋਂ ਸਟੇਅ ਐਟ ਹੋਮ ਆਰਡਰਜ਼ ਵਿੱਚ ਦੋ ਹਫਤਿਆਂ ਲਈ ਕੀਤੇ ਗਏ ਵਾਧੇ ਤੋਂ ਬਾਅਦ ਕੀਤੀ।