ਓਟਵਾ, 19 ਸਤੰਬਰ (ਪੋਸਟ ਬਿਊਰੋ): ਕੰਜ਼ਰਵੇਟਿਵ ਆਗੂ ਪਿਅਰੇ ਪੋਲੀਏਵਰ ਅਤੇ ਐੱਨਡੀਪੀ ਆਗੂ ਜਗਮੀਤ ਸਿੰਘ ਵਿੱਚ ਵੀਰਵਾਰ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਤਿੱਖੀ ਬਹਿਸ ਹੋਈ। ਜਗਮੀਤ ਸਿੰਘ ਨੇ ਐਲਾਨ ਕੀਤਾ ਕਿ ਉਨ੍ਹਾਂ ਦੀ ਪਾਰਟੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਖਿਲਾਫ ਕੰਜ਼ਰਵੇਟਿਵ ਦੇ ਪਹਿਲੇ ਬੇਭਰੋਸਗੀ ਮਤੇ ਦਾ ਸਮਰਥਨ ਨਹੀਂ ਕਰੇਗੀ। ਪੋਲੀਏਵਰ ਨੇ ਪ੍ਰਸ਼ਨਕਾਲ ਦੌਰਾਨ ਜਗਮੀਤ ਸਿੰਘ ਨੂੰ ਇੱਕ ਨਕਲੀ, ਦਿਖਾਵਾ ਕਰਨ ਵਾਲਾ ਅਤੇ ਧੋਖੇਬਾਜ਼ ਕਿਹਾ। ਭਵਿੱਖ ਵਿੱਚ ਕੋਈ ਵੀ ਇਸ ਵਿਕਾਊ ਐੱਨਡੀਪੀ ਆਗੂ ਦੀਆਂ ਗੱਲਾਂ `ਤੇ ਕਿਵੇਂ ਵਿਸ਼ਵਾਸ ਕਰ ਸਕਦਾ ਹੈ ? ਉਨ੍ਹਾਂ ਨੇ ਸਰਕਾਰ ਦੇ ਕਿਸੇ ਮੈਂਬਰ ਦੀ ਥਾਂ ਜਗਮੀਤ ਸਿੰਘ ਤੋਂ ਸਵਾਲ ਪੁੱਛੇ। ਜਦੋਂ ਉਨ੍ਹਾਂ ਨੇ ਅਜਿਹਾ ਕੀਤਾ ਤਾਂ ਐੱਨਡੀਪੀ ਸੰਸਦਾਂ ਵਲੋਂ ਰੌਲਾ ਸ਼ੁਰੂ ਕਰ ਦਿੱਤਾ ਗਿਆ, ਜਿਸ ਵਿੱਚ ਇਹ ਸ਼ਿਕਾਇਤ ਵੀ ਸ਼ਾਮਿਲ ਸੀ ਕਿ ਇਹ ਸਵਾਲ ਸਰਕਾਰੀ ਕੰਮਕਾਜ਼ ਨਾਲ ਸਬੰਧਤ ਨਹੀਂ ਸੀ।ਸਦਨ ਦੇ ਪ੍ਰਧਾਨ ਗਰੇਗ ਫ੍ਰਗਸ ਨੇ ਸਦਨ ਦੀ ਕਾਰਵਾਈ ਨੂੰ ਕੁੱਝ ਮਿੰਟਾਂ ਲਈ ਰੋਕ ਦਿੱਤਾ।
ਇਸਦੇ ਚਲਦੇ ਸਦਨ ਦੇ ਪ੍ਰਧਾਨ ਫ੍ਰਗਸ ਨੇ ਮੈਂਬਰਾਂ ਨੂੰ ਅਪੀਲ ਕੀਤੀ ਕਿ ਕ੍ਰਿਪਾ ਯਾਦ ਰੱਖੋ ਕਿ ਕੈਨੇਡੀਅਨ ਲੋਕ ਸਾਨੂੰ ਵੇਖ ਰਹੇ ਹਨ ਅਤੇ ਸਾਨੂੰ ਆਪਣੇ ਹਰ ਇੱਕ ਚੋਣ ਖੇਤਰ ਅਤੇ ਪੂਰੇ ਦੇਸ਼ ਲਈ ਵਾਸਤਵ ਵਿੱਚ ਲੋੜੀਂਦੇ ਤਰੀਕੇ ਨਾਲ ਵਿਵਹਾਰ ਕਰਨਾ ਚਾਹੀਦਾ ਹੈ।
ਦੋਨਾਂ ਨੇਤਾਵਾਂ ਵਿਚਕਾਰ ਤਨਾਅ ਉਦੋਂ ਹੋਰ ਵਧ ਗਿਆ ਜਦੋਂ ਜਗਮੀਤ ਸਿੰਘ ਨੇ ਐਲਾਨ ਕੀਤਾ ਕਿ ਐੱਨਡੀਪੀ ਅਗਲੇ ਹਫ਼ਤੇ ਬੇਭਰੋਸਗੀ ਮਤੇ `ਤੇ ਵੋਟ ਵਿੱਚ ਲਿਬਰਲ ਸਰਕਾਰ ਦਾ ਸਮਰਥਨ ਕਰੇਗੀ।
ਜਗਮੀਤ ਸਿੰਘ ਨੇ ਕਿਹਾ ਕਿ ਲਿਬਰਲ ਦਾ ਸਮਰਥਨ ਕਰਨ ਦਾ ਉਨ੍ਹਾਂ ਦੀ ਪਾਰਟੀ ਦਾ ਫ਼ੈਸਲਾ ਡੈਂਟਲ ਕੇਅਰ ਅਤੇ ਫਾਰਮਾਕੇਅਰ ਵਰਗੇ ਪ੍ਰੋਗਰਾਮਾਂ ਵਿੱਚ ਸੰਭਾਵੀ ਕੰਜ਼ਰਵੇਟਿਵ ਕਟੌਤੀ ਖਿਲਾਫ ਪ੍ਰਤੀਰੋਧ ਕਰਨਾ ਹੈ।
ਜਗਮੀਤ ਸਿੰਘ ਨੇ ਕਿਹਾ ਕਿ ਅੱਗੇ ਵਧਣ ਵਾਲਾ ਫ਼ੈਸਲਾ ਕੈਨੇਡੀਅਨ ਲੋਕਾਂ ਅਤੇ ਮੱਧ ਵਰਗ ਲਈ ਬਹੁਤ ਮਹੱਤਵਪੂਰਣ ਹੈ। ਇਸ ਲਈ ਪਿਅਰੇ ਪੋਲੀਏਵਰ ਇਹ ਨਾ ਦੱਸਣ ਕਿ ਸਾਨੂੰ ਕੀ ਕਰਨਾ ਚਾਹੀਦਾ ਹੈ। ਅਸੀਂ ਕਿਸੇ ਅਜਿਹੇ ਵਿਅਕਤੀ ਦੀ ਗੱਲ ਨਹੀਂ ਸੁਣਾਂਗੇ ਜੋ ਲੋਕਾਂ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਵਾਲੀਆਂ ਚੀਜ਼ਾਂ ਵਿੱਚ ਕਟੌਤੀ ਕਰਨਾ ਚਾਹੁੰਦੇ ਹਨ।
ਵੀਰਵਾਰ ਨੂੰ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਜਗਮੀਤ ਸਿੰਘ ਤੋਂ ਵਾਰ-ਵਾਰ ਪੁੱਛਿਆ ਗਿਆ ਕਿ ਉਹ ਆਪਣੀ ਪਾਰਟੀ ਦੇ ਸਪਲਾਈ ਐਂਡ ਕਾਨਫੀਡੈਂਸ ਡੀਲ ਤੋਂ ਬਾਹਰ ਨਿਕਲਣ ਦੇ ਕੁੱਝ ਹੀ ਦਿਨਾਂ ਬਾਅਦ ਟਰੂਡੋ ਸਰਕਾਰ ਦਾ ਸਮਰਥਨ ਕਿਵੇਂ ਕਰ ਸਕਦੇ ਹਨ।
ਇਸ `ਤੇ ਜਗਮੀਤ ਸਿੰਘ ਨੇ ਕਿਹਾ ਕਿ ਮੈਂ ਆਪਣੇ ਸ਼ਬਦਾਂ `ਤੇ ਕਾਇਮ ਹਾਂ। ਟਰੂਡੋ ਨੇ ਤੁਹਾਨੂੰ ਨਿਰਾਸ਼ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਇੱਕ ਹੋਰ ਮੌਕਾ ਨਹੀਂ ਮਿਲਣਾ ਚਾਹੀਦਾ ਹੈ।