ਹੈਮਿਲਟਨ, 29 ਜਨਵਰੀ (ਪੋਸਟ ਬਿਊਰੋ): ਬੀਤੇ ਮੰਗਲਵਾਰ ਨੂੰ ਹੈਮਿਲਟਨ ਮਾਲ ਦੇ ਇੱਕ ਗਹਿਣਿਆਂ ਦੀ ਦੁਕਾਨ 'ਤੇ ਹੋਈ ਲੁੱਟ-ਖੋਹ ਤੋਂ ਬਾਅਦ ਟੋਰਾਂਟੋ ਦੇ ਇੱਕ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਤਿੰਨ ਹੋਰ ਲੋੜੀਂਦੇ ਹਨ। ਹੈਮਿਲਟਨ ਪੁਲਿਸ ਨੇ ਦੱਸਿਆ ਕਿ ਹਥੌੜਿਆਂ ਨਾਲ ਲੈਸ ਚਾਰ ਸ਼ੱਕੀ ਦੁਪਹਿਰ 3 ਵਜੇ ਦੇ ਕਰੀਬ ਸੀਐਫ ਲਾਈਮ ਰਿਜ ਦੇ ਅੰਦਰ ਪੀਪਲਜ਼ ਜਵੈਲਰਜ਼ ਵਿੱਚ ਪਹੁੰਚੇ। ਸ਼ੱਕੀਆਂ ਨੇ ਡਿਸਪਲੇਅ ਕੇਸ ਤੋੜਨ ਅਤੇ ਗਹਿਣੇ ਚੋਰੀ ਕਰਨ ਲਈ ਆਪਣੇ ਹਥੌੜਿਆਂ ਦੀ ਵਰਤੋਂ ਕੀਤੀ।
ਵਾਰਦਾਤ ਤੋਂ ਬਾਅਦ ਦੋ ਮੁਲਜ਼ਮ ਇਕ ਗੱਡੀ ਵਿਚ ਅਤੇ ਦੋ ਮਾਲ ਦੇ ਪਾਰਕਿੰਗ ਲਾਟ ਵਿਚੋਂ ਪੈਦਲ ਹੀ ਫ਼ਰਾਰ ਹੋ ਗਏ। ਪੁਲਿਸ ਨੇ ਦੱਸਿਆ ਕਿ ਖੇਤਰ ਦੀ ਤਲਾਸ਼ੀ ਦੌਰਾਨ ਇਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਸ਼ੱਕੀਆਂ ਨਾਲ ਜੁੜੇ ਗਹਿਣੇ ਅਤੇ ਕੱਪੜੇ ਵੀ ਬਰਾਮਦ ਕਰ ਲਏ ਗਏ ਹਨ। ਪੁਲਿਸ ਵੱਲੋਂ ਹਾਲੇ ਤਿੰਨ ਲੋੜੀਂਦੇ ਮੁਲਜ਼ਮਾਂ ਦਾ ਵੇਰਵਾ ਜਾਰੀ ਨਹੀਂ ਕੀਤਾ ਗਿਆ ਹੈ। ਜਿਨ੍ਹਾਂ ਵਿਚੋਂ ਇੱਕ ਨੂੰ ਆਖਰੀ ਵਾਰ ਅੱਪਰ ਵੈਲਿੰਗਟਨ ਸਟਰੀਟ ਅਤੇ ਅੱਪਰ ਵੈਂਟਵਰਥ ਸਟਰੀਟ ਦੇ ਵਿਚਕਾਰ ਲਾਈਮਰਿਜ ਰੋਡ ਵੈਸਟ ਦੇ ਖੇਤਰ ‘ਚ ਦੇਖਿਆ ਗਿਆ ਸੀ। ਪੁਲਿਸ ਨੇ ਦੱਸਿਆ ਕਿ ਅਧਿਕਾਰੀ ਆਪਣੀ ਜਾਂਚ ਵਿਚ ਸਹਾਇਤਾ ਲਈ ਇਲਾਕੇ ਵਿਚ ਲੱਗੇ ਸੀਸੀਟੀਵੀ ਦੀ ਫੁਟੇਜ ਦੀ ਜਾਂਚ ਕਰ ਰਹੇ ਹਨ।