ਓਟਵਾ, 4 ਜੁਲਾਈ (ਪੋਸਟ ਬਿਊਰੋ): ਲਿਬਰਲ ਬੈਕਬੇਂਚਰ ਵੇਨ ਲਾਂਗ ਨੇ ਕਾਕਸ ਨੂੰ ਇੱਕ ਈਮੇਲ ਭੇਜਕੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੋਂ ਨੇਤਾ ਅਹੁਦੇ ਤੋਂ ਅਸਤੀਫਾ ਦੇਣ ਦੀ ਮੰਗ ਕੀਤੀ ਹੈ, ਕਿਉਂਕਿ ਪਾਰਟੀ ਇਸ ਹਫਤੇ ਦੀ ਸ਼ੁਰੁਆਤ ਵਿੱਚ ਦਹਾਕਿਆਂ ਤੋਂ ਲਿਬਰਲ ਦੇ ਕਬਜ਼ੇ ਵਿਚ ਰਹੇ ਟੋਰਾਂਟੋ ਖੇਤਰ ਵਿੱਚ ਹਾਰ ਗਈ ਹੈ।
ਨਿਊ ਬਰੰਸਵਿਕ ਸਾਂਸਦ ਟੋਰਾਂਟੋ-ਸੇਂਟ ਪਾਲ ਵਿੱਚ ਮੰਗਲਵਾਰ ਨੂੰ ਹੋਈ ਉਪ ਚੋਣ ਵਿੱਚ ਹਾਰ ਤੋ ਬਾਅਦ ਖੁੱਲੇ੍ਹ ਤੌਰ `ਤੇ ਟਰੂਡੋ ਦੇ ਅਸਤੀਫੇ ਦੀ ਮੰਗ ਕਰਨ ਵਾਲੇ ਪਹਿਲੇ ਲਿਬਰਲ ਕਾਕਸ ਮੈਂਬਰ ਹਨ।
ਸੀਬੀਸੀ ਨਿਊਜ ਅਨੁਸਾਰ ਈਮੇਲ ਵਿੱਚ ਲਾਂਗ ਨੇ ਲਿਖਿਆ ਕਿ ਸਾਡੀ ਪਾਰਟੀ ਦੇ ਭਵਿੱਖ ਅਤੇ ਸਾਡੇ ਦੇਸ਼ ਦੀ ਭਲਾਈ ਲਈ, ਸਾਨੂੰ ਨਵੀਂ ਲੀਡਰਸਿ਼ਪ ਅਤੇ ਨਵੀਂ ਦਿਸ਼ਾ ਦੀ ਜ਼ਰੂਰਤ ਹੈ। ਵੋਟਰਾਂ ਨੇ ਸਪੱਸ਼ਟ ਰੂਪ ਤੋਂ ਕਿਹਾ ਹੈ ਕਿ ਉਹ ਬਦਲਾਅ ਚਾਹੁੰਦੇ ਹਨ। ਮੈਂ ਸਹਿਮਤ ਹਾਂ।
ਸੇਂਟ ਜਾਨ-ਰੋਥੇਸੇ ਸਾਂਸਦ, ਜੋ ਪਹਿਲਾਂ ਵੀ ਆਪਣੀ ਸਰਕਾਰ ਖਿਲਾਫ ਬੋਲ ਚੁੱਕੇ ਹਨ, ਅਗਲੀਆਂ ਚੋਣਾਂ ਵਿੱਚ ਦੁਬਾਰਾ ਪੇਸ਼ਕਸ਼ ਨਹੀਂ ਕਰ ਰਹੇ ਹਨ।
ਨਿਊਫਾਊਂਡਲੈਂਡ ਅਤੇ ਲੈਬਰਾਡੋਰ ਦੇ ਐੱਮਪੀ ਕੇਨ ਮੈਕਡੋਨਾਲਡ ਨੇ ਈਮੇਲ ਦਾ ਜਵਾਬ ਦਿੰਦੇ ਹੋਏ ਕਿਹਾ, ਬਹੁਤ ਚੰਗਾ ਕਿਹਾ !
ਬਾਅਦ ਵਿੱਚ ਉਨ੍ਹਾਂ ਨੇ ਸੀਬੀਸੀ ਨਿਊਜ਼ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਪਸੰਦ ਆਇਆ ਕਿ ਲਾਂਗ ਨੇ ਖੁਦ ਨੂੰ ਕਿਵੇਂ ਪ੍ਰਗਟ ਕੀਤਾ, ਪਰ ਉਹ ਟਰੂਡੋ ਨੂੰ ਅਸਤੀਫਾ ਦੇਣ ਲਈ ਨਹੀਂ ਕਹਿਣਗੇ।
ਏਵਲਾਨ ਐੱਮਪੀ, ਜਿਨ੍ਹਾਂ ਨੇ ਕਾਰਬਨ ਟੈਕਸ `ਤੇ ਦੋ ਵਾਰ ਆਪਣੀ ਹੀ ਪਾਰਟੀ ਖਿਲਾਫ ਵੋਟ ਕੀਤਾ ਹੈ, ਨੇ ਕਿਹਾ ਕਿ ਇਹ ਪ੍ਰਧਾਨ ਮੰਤਰੀ ਦਾ ਇਕੱਲਿਆਂ ਦਾ ਫ਼ੈਸਲਾ ਹੈ, ਪਰ ਟਰੂਡੋ ਨਾਲ ਇੱਕ ਤੱਤਕਾਲ, ਵਿਅਕਤੀਗਤ ਕਾਕਸ ਬੈਠਕ ਦੀ ਲੋੜ `ਤੇ ਜ਼ੋਰ ਦਿੱਤਾ।