ਓਟਵਾ, 24 ਜੁਲਾਈ (ਪੋਸਟ ਬਿਊਰੋ): ਬੈਂਕ ਆਫ ਕੈਨੇਡਾ ਨੇ ਲਗਾਤਾਰ ਦੂਜੀ ਵਾਰ ਆਪਣੀ ਨੀਤੀਗਤ ਵਿਆਜ ਦਰ ਵਿੱਚ ਕਮੀ ਕੀਤੀ ਹੈ ਅਤੇ ਸੰਕੇਤ ਦਿੱਤਾ ਹੈ ਕਿ ਜੇਕਰ ਮਹਿੰਗਾਈ ਵਿੱਚ ਕਮੀ ਜਾਰੀ ਰਹੀ ਤਾਂ ਹੋਰ ਕਟੌਤੀ ਕੀਤੀ ਜਾਵੇਗੀ।
25 ਆਧਾਰ ਅੰਕਾਂ ਦੀ ਕਟੌਤੀ ਨਾਲ ਓਵਰਨਾਈਟ ਦਰ 4.5 ਫ਼ੀਸਦੀ ਹੋ ਗਈ ਹੈ, ਜੋ ਜੂਨ 2023 ਤੋਂ ਬਾਅਦ ਨਹੀਂ ਵੇਖੇ ਗਏ ਪੱਧਰਾਂ `ਤੇ ਵਾਪਿਸ ਆ ਗਈ ਹੈ। ਪਿਛਲੇ ਮਹੀਨੇ 5 ਫ਼ੀਸਦੀ ਤੋਂ 4.75 ਫ਼ੀਸਦੀ ਦੀ ਕਟੌਤੀ ਚਾਰ ਸਾਲ ਤੋਂ ਜਿ਼ਆਦਾ ਸਮੇਂ ਵਿੱਚ ਪਹਿਲੀ ਵਾਰ ਕੀਤੀ ਗਈ ਸੀ।
ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲੇਮ ਨੇ ਕਿਹਾ ਕਿ ਇਹ ਫ਼ੈਸਲਾ ਆਰਥਿਕ ਆਂਕੜਿਆਂ `ਤੇ ਆਧਾਰਿਤ ਸੀ, ਜੋ ਲੇਬਰ ਮਾਰਕੀਟ ਵਿੱਚ ਸੁਸਤੀ, ਮਾਲੀ ਹਾਲਤ ਵਿੱਚ ਵਾਧੂ ਸਪਲਾਈ ਅਤੇ ਮਹਿੰਗਾਈ ਵਿੱਚ ਲਗਾਤਾਰ ਗਿਰਾਵਟ ਵਿਖਾ ਰਹੇ ਸਨ।
ਮੈਕਲੇਮ ਨੇ ਕਿਹਾ ਕਿ ਸਾਨੂੰ ਇਸ ਗੱਲ ਦਾ ਪੂਰਾ ਭਰੋਸਾ ਹੈ ਕਿ ਮਹਿੰਗਾਈ ਨੂੰ ਟੀਚੇ `ਤੇ ਵਾਪਿਸ ਲਿਆਉਣ ਲਈ ਸਾਰੇ ਤੱਤ ਮੌਜੂਦ ਹਨ। ਜਦੋਂ ਤੋਂ ਬੈਂਕ ਆਫ ਕੈਨੇਡਾ ਨੇ ਮਾਰਚ 2022 ਵਿੱਚ ਦਰਾਂ ਵਧਾਊਣੀਆਂ ਸ਼ੁਰੂ ਕੀਤੀਆਂ, ਉਦੋਂ ਤੋਂ ਮਹਿੰਗਾਈ ਜੂਨ 2022 ਵਿੱਚ 8.1 ਫ਼ੀਸਦੀ ਦੇ ਸਿਖਰ ਤੋਂ ਡਿੱਗ ਕੇ ਜੂਨ 2024 ਵਿੱਚ 2.7 ਫ਼ੀਸਦੀ ਹੋ ਗਈ ਹੈ, ਮਈ ਵਿੱਚ ਮਾਮੂਲੀ ਵਾਧੇ ਤੋਂ ਬਾਅਦ ।
ਮੈਕਲੇਮ ਨੇ ਕਿਹਾ ਕਿ ਅੱਗੇ ਵੇਖਦੇ ਹੋਏ, ਸਾਨੂੰ ਉਮੀਦ ਹੈ ਕਿ ਮਹਿੰਗਾਈ ਵਿੱਚ ਹੋਰ ਕਮੀ ਆਵੇਗੀ, ਹਾਲਾਂਕਿ ਅਗਲੇ ਸਾਲ ਦੀ ਪ੍ਰਗਤੀ ਅਸਮਾਨ ਹੋਵੇਗੀ।
ਜੇਕਰ ਮਹਿੰਗਾਈ ਉਮੀਦ ਮੁਤਾਬਕ ਘੱਟ ਹੁੰਦੀ ਰਹੀ, ਤਾਂ ਮੈਕਲੇਮ ਨੇ ਸੰਕੇਤ ਦਿੱਤਾ ਕਿ ਕੈਨੇਡੀਅਨ ਹੋਰ ਵੀ ਦਰਾਂ ਵਿੱਚ ਕਟੌਤੀ ਦੀ ਉਮੀਦ ਕਰ ਸਕਦੇ ਹਨ।