ਪੈਰਿਸ, 26 ਜੁਲਾਈ (ਪੋਸਟ ਬਿਊਰੋ): ਟਰੇਨ ਨੈੱਟਵਰਕ 'ਤੇ ਹਮਲਾ ਫਰਾਂਸ 'ਚ ਓਲੰਪਿਕ ਖੇਡਾਂ ਦੇ ਉਦਘਾਟਨ ਸਮਾਰੋਹ ਤੋਂ ਕਰੀਬ 10 ਘੰਟੇ ਪਹਿਲਾਂ ਸ਼ੁੱਕਰਵਾਰ ਸਵੇਰੇ 5:15 ਵਜੇ ਹੋਇਆ। (Attack on French railway network before Olympics) ਕਈ ਰੇਲਵੇ ਲਾਈਨਾਂ ਦੀ ਭੰਨਤੋੜ ਕੀਤੀ ਗਈ ਅਤੇ ਤਾਰਾਂ ਨੂੰ ਸਾੜ ਦਿੱਤਾ ਗਿਆ। ਰੇਲਵੇ ਲਾਈਨਾਂ 'ਤੇ ਹਮਲਾ ਕਿਸ ਨੇ ਕੀਤਾ ਅਤੇ ਕਿਉਂ ਕੀਤਾ, ਇਸ ਬਾਰੇ ਹਾਲੇ ਤੱਕ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।
ਫਰਾਂਸ ਦੀ ਰਾਸ਼ਟਰੀ ਰੇਲਵੇ ਕੰਪਨੀ ਐੱਸ.ਐੱਨ.ਸੀ.ਐੱਫ. ਮੁਤਾਬਕ ਹਮਲੇ ਦੇ ਅੱਧੇ ਘੰਟੇ ਦੇ ਅੰਦਰ ਪੈਰਿਸ ਜਾਣ ਅਤੇ ਜਾਣ ਵਾਲੀਆਂ ਕਈ ਟਰੇਨਾਂ ਨੂੰ ਰੱਦ ਕਰ ਦਿੱਤਾ ਗਿਆ। ਕਈ ਟਰੇਨਾਂ 90 ਮਿੰਟ ਤੱਕ ਦੇਰੀ ਨਾਲ ਚੱਲ ਰਹੀਆਂ ਹਨ। ਹਮਲੇ ਕਾਰਨ ਅੱਜ ਕਰੀਬ 2.5 ਲੱਖ ਯਾਤਰੀ ਪ੍ਰਭਾਵਿਤ ਹੋਏ ਹਨ। ਜਦੋਂਕਿ ਇਸ ਪੂਰੇ ਹਫਤੇ (28 ਜੁਲਾਈ) ਤੱਕ ਲਗਭਗ 8 ਲੱਖ ਲੋਕ ਪ੍ਰਭਾਵਿਤ ਹੋ ਸਕਦੇ ਹਨ।
ਇਸ ਦੇ ਨਾਲ ਹੀ ਪ੍ਰਧਾਨ ਮੰਤਰੀ ਗੈਬਰੀਅਲ ਅਟਲ ਨੇ ਇਸ ਹਮਲੇ ਨੂੰ ਓਲੰਪਿਕ ਵਿੱਚ ਵਿਘਨ ਪਾਉਣ ਦੀ ਸਾਜਿਸ਼ ਕਰਾਰ ਦਿੱਤਾ ਹੈ। ਓਲੰਪਿਕ ਖੇਡਾਂ ਦਾ ਉਦਘਾਟਨੀ ਸਮਾਰੋਹ ਪੈਰਿਸ ਵਿੱਚ ਰਾਤ 11 ਵਜੇ ਹੈ। ਇਸ ਦਾ ਆਯੋਜਨ 26 ਜੁਲਾਈ ਤੋਂ 11 ਅਗਸਤ ਤੱਕ ਕੀਤਾ ਜਾਵੇਗਾ। ਖੇਡਾਂ ਦੇ ਇਸ ਮਹਾਕੁੰਭ ਵਿੱਚ 206 ਦੇਸ਼ਾਂ ਦੇ 10 ਹਜ਼ਾਰ 500 ਖਿਡਾਰੀ ਭਾਗ ਲੈ ਰਹੇ ਹਨ। ਭਾਰਤ ਦੇ 117 ਖਿਡਾਰੀ ਫਰਾਂਸ ਗਏ ਹਨ।