ਵਾਸਿ਼ੰਗਟਨ, 25 ਜੁਲਾਈ (ਪੋਸਟ ਬਿਊਰੋ): ਨਾਸਾ ਨੇ ਸੁਪਰ ਕੰਪਿਊਟਰ ਨਾਲ ਤਿਆਰ ਇੱਕ ਨਵਾਂ ਹਾਈ-ਰੈਜ਼ੋਲਿਊਸ਼ਨ ਮਾਡਲ ਜਾਰੀ ਕੀਤਾ ਹੈ ਜਿਸ ਵਿੱਚ ਪੂਰੀ ਦੁਨੀਆਂ ਵਿੱਚ ਕਾਰਬਨ ਡਾਈਆਕਸਾਈਡ ਦੇ ਪੱਧਰ ਨੂੰ ਦੇਖਿਆ ਜਾ ਸਕਦਾ ਹੈ। ਇਹ ਮਾਡਲ ਨਾਸਾ ਦੇ ਸਾਇੰਟਿਫਿਕ ਵਿਜ਼ੂਅਲਾਈਜੇਸ਼ਨ ਸਟੂਡੀਓ ਨੇ ਤਿਆਰ ਕੀਤਾ ਹੈ।
ਇਸ ਉੱਚ ਰੈਜ਼ੋਲਿਊਸ਼ਨ ਮਾਡਲ ਨੂੰ ਕਾਰਬਨ ਡਾਈਆਕਸਾਈਡ ਪੈਦਾ ਕਰਨ ਵਾਲੇ ਸਰੋਤਾਂ ਜਿਵੇਂ ਕਿ ਪਾਵਰ ਪਲਾਂਟ, ਅੱਗ ਅਤੇ ਵੱਡੇ ਸ਼ਹਿਰਾਂ ਨੂੰ ਦੇਖਣ ਲਈ ਜ਼ੂਮ ਇਨ ਕੀਤਾ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ ਇਹ ਵੀ ਦੇਖਿਆ ਜਾ ਸਕਦਾ ਹੈ ਕਿ ਕਾਰਬਨ ਡਾਈਆਕਸਾਈਡ ਮਹਾਂਦੀਪਾਂ ਅਤੇ ਸਮੁੰਦਰਾਂ ਵਿੱਚ ਕਿਵੇਂ ਫੈਲਦੀ ਹੈ।
ਗੋਡਾਰਡ ਅਰਥ ਆਬਜ਼ਰਵਿੰਗ ਸਿਸਟਮ (ਜੀ.ਈ.ਓ.ਐੱਸ.) ਤਕਨੀਕ ਦੀ ਵਰਤੋਂ ਕਰਕੇ ਬਣਾਇਆ ਗਿਆ ਇਹ ਮਾਡਲ ਜਨਵਰੀ ਤੋਂ ਮਾਰਚ 2020 ਤੱਕ ਕਾਰਬਨ ਡਾਈਆਕਸਾਈਡ ਦੇ ਵਧਦੇ ਪੱਧਰ ਬਾਰੇ ਜਾਣਕਾਰੀ ਦਿੰਦਾ ਹੈ। ਇਹ ਹਾਈ-ਰੈਜ਼ੋਲਿਊਸ਼ਨ ਮਾਡਲ ਆਮ ਮੌਸਮ ਮਾਡਲ ਨਾਲੋਂ 100 ਗੁਣਾ ਬਿਹਤਰ ਹੈ।
ਇਸ ਪ੍ਰਾਜੈਕਟ ਨਾਲ ਜੁੜੇ ਜਲਵਾਯੂ ਵਿਗਿਆਨੀ ਡਾ. ਲੈਸਲੀ ਓਟ ਨੇ ਕਿਹਾ ਕਿ ਇਸ ਮਾਡਲ ਰਾਹੀਂ ਅਸੀਂ ਇਹ ਜਾਣਨ ਦੀ ਕੋਸਿ਼ਸ਼ ਕੀਤੀ ਹੈ ਕਿ ਕਾਰਬਨ ਡਾਈਆਕਸਾਈਡ ਕਿੱਥੋਂ ਆਉਂਦੀ ਹੈ ਅਤੇ ਇਹ ਧਰਤੀ 'ਤੇ ਕੀ ਅਸਰ ਪਾਉਂਦੀ ਹੈ। ਇਸ ਮਾਡਲ ਨੂੰ ਦੇਖ ਕੇ ਆਸਾਨੀ ਨਾਲ ਸਮਝਿਆ ਜਾ ਸਕਦਾ ਹੈ ਕਿ ਹਰ ਚੀਜ਼ ਇਨ੍ਹਾਂ ਵੱਖ-ਵੱਖ ਮੌਸਮ ਦੇ ਪੈਟਰਨਾਂ ਨਾਲ ਕਿਵੇਂ ਜੁੜੀ ਹੋਈ ਹੈ।