ਸਿ਼ਕਾਗੋ, 2 ਜੁਲਾਈ (ਪੋਸਟ ਬਿਊਰੋ): ਭਾਰਤੀ ਮੂਲ ਦੇ ਅਮਰੀਕੀ ਕਾਰੋਬਾਰੀ ਰਿਸ਼ੀ ਸ਼ਾਹ ਨੂੰ ਇੱਕ ਅਮਰੀਕੀ ਅਦਾਲਤ ਨੇ ਧੋਖਾਧੜੀ ਅਤੇ ਠੱਗੀ ਦੇ ਦੋਸ਼ ਵਿੱਚ ਸਾਢੇ ਸੱਤ ਸਾਲ ਦੀ ਸਜ਼ਾ ਸੁਣਾਈ ਹੈ। ਸ਼ਾਹ ਨੇ ਗੂਗਲ ਅਤੇ ਗੋਲਡਮੈਨ ਗਰੁੱਪ ਵਰਗੀਆਂ ਵੱਡੀਆਂ ਕੰਪਨੀਆਂ ਦੇ ਨਿਵੇਸ਼ਕਾਂ ਨਾਲ 8.35 ਹਜ਼ਾਰ ਕਰੋੜ ਰੁਪਏ ਦੀ ਧੋਖਾਧੜੀ ਕੀਤੀ ਹੈ। ਇਹ ਅਮਰੀਕੀ ਕਾਰਪੋਰੇਟ ਇਤਿਹਾਸ ਵਿੱਚ ਹੁਣ ਤੱਕ ਦੀ ਸਭ ਤੋਂ ਵੱਡੀ ਧੋਖਾਧੜੀ ਵਿੱਚੋਂ ਇੱਕ ਹੈ।
38 ਸਾਲਾ ਸ਼ਾਹ ਨੇ 2006 'ਚ ਆਊਟਕਮ ਹੈਲਥ ਨਾਂ ਦੀ ਕੰਪਨੀ ਬਣਾਈ ਸੀ। ਇਹ ਕੰਪਨੀ ਡਾਕਟਰਾਂ ਦੇ ਦਫ਼ਤਰਾਂ ਵਿੱਚ ਟੈਲੀਵਿਜ਼ਨ ਲਗਾਉਂਦੀ ਸੀ ਅਤੇ ਸਿਹਤ ਸੰਭਾਲ ਦੇ ਖੇਤਰ ਵਿੱਚ ਕੰਮ ਕਰਨ ਵਾਲਿਆਂ ਲਈ ਇਸ਼ਤਿਹਾਰ ਦਿੰਦੀ ਸੀ। ਇਸ ਕੰਪਨੀ ਵਿੱਚ ਸ਼ਰਧਾ ਅਗਰਵਾਲ ਰਿਸ਼ੀ ਦੀ ਸਹਿ-ਸੰਸਥਾਪਕ ਸੀ।
ਕੰਪਨੀ ਦੇ ਅੰਕੜਿਆਂ ਮੁਤਾਬਕ ਉਨ੍ਹਾਂ ਨੇ ਇਸ ਕਾਰੋਬਾਰ 'ਚ ਤੇਜ਼ੀ ਨਾਲ ਮੁਨਾਫਾ ਕਮਾਇਆ। 2010 ਤੱਕ, ਆਊਟਕਮ ਹੈਲਥ ਕੰਪਨੀ ਇਸ ਖੇਤਰ ਵਿੱਚ ਇੱਕ ਵੱਡੇ ਨਾਮ ਵਜੋਂ ਉਭਰਨ ਲੱਗੀ। ਆਪਣੇ ਸ਼ੁਰੂਆਤੀ ਸਾਲਾਂ ਵਿੱਚ ਕੰਪਨੀ ਨੇ ਕਈ ਵੱਡੇ ਗਾਹਕਾਂ ਤੋਂ ਫੰਡ ਲਏ। ਇਸ ਨਾਲ ਰਿਸ਼ੀ ਸ਼ਾਹ ਸਿ਼ਕਾਗੋ ਦੇ ਕਾਰਪੋਰੇਟ ਜਗਤ ਦੇ ਵੱਡੇ ਨਾਵਾਂ ਵਿੱਚ ਸ਼ਾਮਿਲ ਹੋ ਗਏ।
ਹਾਲਾਂਕਿ, ਜਿੱਥੇ ਇੱਕ ਪਾਸੇ ਉਹ ਕੰਪਨੀ ਦੇ ਅੰਕੜਿਆਂ ਤੋਂ ਤੇਜ਼ੀ ਨਾਲ ਮੁਨਾਫਾ ਕਮਾ ਰਹੇ ਸਨ, ਉੱਥੇ ਦੂਜੇ ਪਾਸੇ ਰਿਸ਼ੀ, ਸ਼ਰਧਾ ਅਤੇ ਕੰਪਨੀ ਦੇ ਮੁੱਖ ਵਿੱਤ ਅਧਿਕਾਰੀ ਬ੍ਰੈਡ ਪਰਡੀ ਆਪਣੇ ਨਿਵੇਸ਼ਕਾਂ ਅਤੇ ਗਾਹਕਾਂ ਨੂੰ ਧੋਖਾ ਦੇਣ ਦੀ ਯੋਜਨਾ ਬਣਾ ਰਹੇ ਸਨ। ਇਸ ਲਈ ਤਿੰਨਾਂ ਨੇ ਮਿਲ ਕੇ ਮੈਡੀਕਲ ਖੇਤਰ 'ਚ ਕੰਮ ਕਰਨ ਵਾਲੀਆਂ ਵੱਖ-ਵੱਖ ਕੰਪਨੀਆਂ ਤੋਂ ਪੈਸੇ ਲਏ ਅਤੇ ਟੀਵੀ 'ਤੇ ਇਸ਼ਤਿਹਾਰ ਨਹੀਂ ਦਿੱਤਾ। ਇਸ ਤੋਂ ਇਲਾਵਾ ਉਸ ਨੇ ਆਪਣੀ ਕੰਪਨੀ ਦੇ ਮੁਨਾਫੇ ਬਾਰੇ ਵੀ ਝੂਠੇ ਦਾਅਵੇ ਕੀਤੇ। ਸ਼ਾਹ ਨੇ ਨੋਵੋ ਨੋਰਡਿਸਕ ਵਰਗੀਆਂ ਵੱਡੀਆਂ ਅਮਰੀਕੀ ਦਵਾਈਆਂ ਦੀਆਂ ਕੰਪਨੀਆਂ ਨਾਲ ਵੀ ਧੋਖਾ ਕੀਤਾ ਹੈ।