ਸਿੰਗਾਪੁਰ, 1 ਜੁਲਾਈ (ਪੋਸਟ ਬਿਊਰੋ): ਸਿੰਗਾਪੁਰ ਦੇ ਧਰਮਗੁਰੂ ਵੂ ਮੇ ਹੋ (54) ਨੂੰ ਸਾਢੇ ਦਸ ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਅਦਾਲਤ ਨੇ ਉਸ ਨੂੰ ਆਪਣੇ ਸ਼ਰਧਾਲੂਆਂ ਨੂੰ ਧੋਖਾ ਦੇਣ ਅਤੇ ਉਨ੍ਹਾਂ ਨੂੰ ਜ਼ਖਮੀ ਕਰਨ ਸਮੇਤ 5 ਦੋਸ਼ਾਂ ਵਿੱਚ ਦੋਸ਼ੀ ਪਾਇਆ। ਵੂ ਮੇ ਹੋ 'ਤੇ ਦੋਸ਼ ਹੈ ਕਿ ਉਸ ਨੇ ਆਪਣੇ ਸ਼ਰਧਾਲੂਆਂ ਦਾ ਬ੍ਰੇਨਵਾਸ਼ ਕੀਤਾ ਅਤੇ ਉਨ੍ਹਾਂ ਨੂੰ ਕਿਹਾ ਕਿ ਉਹ ਦੇਵੀ ਹੈ।
ਜੇਕਰ ਸ਼ਰਧਾਲੂ ਉਸ ਦੇ ਹੁਕਮਾਂ ਦੀ ਪਾਲਣਾ ਨਹੀਂ ਕਰਦੇ, ਤਾਂ ਉਹ ਉਨ੍ਹਾਂ ਨੂੰ ਬੇਰਹਿਮੀ ਨਾਲ ਸਜ਼ਾ ਦੇਵੇਗੀ। ਉਹ ਸ਼ਰਧਾਲੂਆਂ ਨੂੰ ਉਨ੍ਹਾਂ ਦਾ ਮਲ ਖੁਆਉਂਦੀ ਸੀ ਅਤੇ ਪਲਾਸ ਨਾਲ ਦੰਦ ਕੱਢਣ ਲਈ ਕਹਿੰਦੀ ਸੀ। ਇਨਾ ਹੀ ਨਹੀਂ, ਉਹ ਸ਼ਰਧਾਲੂਆਂ 'ਤੇ ਕੈਂਚੀ ਨਾਲ ਹਮਲਾ ਕਰਦੀ ਸੀ ਅਤੇ ਉਨ੍ਹਾਂ ਨੂੰ ਇਮਾਰਤ ਦੀ ਦੂਜੀ ਮੰਜਿ਼ਲ ਤੋਂ ਛਾਲ ਮਾਰਨ ਲਈ ਵੀ ਕਹਿੰਦੀ ਸੀ।
ਸਿੰਗਾਪੁਰ ਦੇ ਨਿਊਜ਼ ਚੈਨਲ ਸੀਐੱਨਏ ਦੀ ਰਿਪੋਰਟ ਮੁਤਾਬਕ ਵੂ ਮੇ ਹੋ ਆਪਣੇ ਆਪ ਨੂੰ ਭਾਰਤੀ ਧਰਮਗੁਰੂ ਸ਼੍ਰੀ ਸ਼ਕਤੀ ਨਰਾਇਣੀ ਅੰਮਾ ਦੀ ਭਗਤੂ ਦੱਸਦੀ ਹੈ। ਸ਼੍ਰੀ ਸ਼ਕਤੀ ਨਰਾਇਣੀ ਅੰਮਾ ਦੇ ਸ਼ਰਧਾਲੂ ਉਸ ਨੂੰ ਦੇਵੀ ਨਾਰਾਇਣੀ ਦਾ ਪਹਿਲਾ ਜਾਣਿਆ ਜਾਣ ਵਾਲਾ ਅਵਤਾਰ ਮੰਨਦੇ ਹਨ। ਵੂ ਮੇ ਹੋ 2012 ਤੋਂ ਸਿੰਗਾਪੁਰ ਵਿੱਚ 30 ਸ਼ਰਧਾਲੂਆਂ ਦੇ ਇੱਕ ਸਮੂਹ ਦੇ ਨਾਲ ਇੱਕ ਆਸ਼ਰਮ ਚਲਾ ਰਹੀ ਹੈ। ਲੋਕ ਉਸ 'ਤੇ ਭਰੋਸਾ ਕਰਨ ਲਈ, ਉਹ ਹਮੇਸ਼ਾ ਦੇਵੀ ਵਰਗੀ ਸਾੜੀ ਅਤੇ ਮੇਕਅੱਪ ਕਰਦੀ ਹੈ।
ਵੂ ਮੇ ਹੋ ਦੇ ਭਗਤਾਂ ਨੇ ਅਦਾਲਤ ਨੂੰ ਦੱਸਿਆ ਕਿ ਉਹ ਆਪਣੀਆਂ ਬੀਮਾਰੀਆਂ ਦਾ ਇਲਾਜ ਕਰਨ ਅਤੇ ਆਪਣੀ ਜਿ਼ੰਦਗੀ ਨੂੰ ਸੁਧਾਰਨ ਲਈ ਉਸ ਕੋਲ ਜਾਂਦੇ ਸਨ। ਇਸ ਦੌਰਾਨ ਵੂ ਮੇ ਹੋ ਲੋਕਾਂ ਤੋਂ ਪੈਸੇ ਮੰਗਦੀ ਸੀ। ਉਸ ਨੇ ਕਿਹਾ ਕਿ ਉਸ ਨੂੰ ਆਪਣੇ 'ਬੁਰੇ ਕਰਮਾਂ' ਨੂੰ ਸਾਫ਼ ਕਰਨ ਲਈ ਭਾਰਤ ਵਿੱਚ ਅੰਮਾ ਨੂੰ ਪੈਸੇ ਭੇਜਣੇ ਪਏ। ਇਸ ਤਰ੍ਹਾਂ ਵੂ ਨੇ ਭਗਤਾਂ ਤੋਂ 43 ਕਰੋੜ ਰੁਪਏ ਠੱਗੇ।