ਓਟਵਾ, 7 ਜੂਨ (ਪੋਸਟ ਬਿਊਰੋ) : ਵਿਆਜ਼ ਦਰਾਂ ਵਿੱਚ ਮੁੜ ਵਾਧੇ ਦੇ ਕਿਆਫਿਆਂ ਦਰਮਿਆਨ ਅੱਜ ਬੈਂਕ ਆਫ ਕੈਨੇਡਾ ਵੱਲੋਂ ਨਵੀਆਂ ਵਿਆਜ਼ ਦਰਾਂ ਸਬੰਧੀ ਐਲਾਨ ਕੀਤਾ ਜਾਵੇਗਾ।
ਤਾਜ਼ਾ ਆਰਥਿਕ ਡਾਟਾ ਅਨੁਸਾਰ ਕੈਨੇਡੀਅਨ ਇਕੌਨਮੀ ਇਸ ਸਮੇਂ ਕਾਫੀ ਭਖੀ ਹੋਈ ਹੈ ਤੇ ਇਹ ਮਾਹਿਰਾਂ ਦੀ ਸੋਚ ਨਾਲੋਂ ਵੱਖਰੇ ਅੰਕੜੇ ਹਨ। ਇਸ ਨਾਲ ਮਹਿੰਗਾਈ ਨੂੰ ਲੈ ਕੇ ਸਾਰਿਆਂ ਦੀ ਚਿੰਤਾ ਇੱਕ ਵਾਰੀ ਫਿਰ ਵੱਧ ਗਈ ਹੈ। ਪਿਛਲੇ ਹਫਤੇ ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਪੇਸ਼ ਕੀਤੀ ਗਈ ਰਿਪੋਰਟ ਅਨੁਸਾਰ ਕੁੱਲ ਘਰੇਲੂ ਉਤਪਾਦ ਪਹਿਲੀ ਤਿਮਾਹੀ ਵਿੱਚ 3·1 ਫੀ ਸਦੀ ਦੇ ਹਿਸਾਬ ਨਾਲ ਸਾਲਾਨਾ ਦਰ ਉੱਤੇ ਵਧਿਆ ਜਦਕਿ ਮੁੱਢਲੇ ਅੰਦਾਜ਼ੇ ਮੁਤਾਬਕ ਇਸ ਦਾ ਅਪਰੈਲ ਵਿੱਚ ਵੀ ਪਸਾਰ ਹੋਇਆ।
ਅਰਥਸ਼ਾਸਤਰੀਆਂ, ਵਿੱਚੋਂ ਬਹੁਤਿਆਂ ਦਾ ਇਹ ਮੰਨਣਾ ਸੀ ਕਿ ਉੱਚੀਆਂ ਵਿਆਜ਼ ਦਰਾਂ ਨਾਲ ਹੁਣ ਤੱਕ ਅਰਥਚਾਰਾ ਮੰਦਵਾੜੇ ਵਿੱਚ ਜਾ ਸਕਦਾ ਹੈ, ਨੇ ਆਖਿਆ ਕਿ ਤਾਜ਼ਾ ਅੰਕੜਿਆਂ ਅਨੁਸਾਰ ਮਹਿੰਗਾਈ ਨੂੰ ਦੋ ਫੀ ਸਦੀ ਉੱਤੇ ਲਿਆਉਣ ਲਈ ਸੈਂਟਰਲ ਬੈਂਕ ਵੱਲੋਂ ਇੱਕ ਵਾਰੀ ਫਿਰ ਵਿਆਜ਼ ਦਰਾਂ ਵਿੱਚ ਵਾਧਾ ਕੀਤਾ ਜਾ ਸਕਦਾ ਹੈ।
ਬੈਂਕ ਆਫ ਕੈਨੇਡਾ, ਜਿਸਨੇ ਆਪਣੀਆਂ ਵਿਆਜ਼ ਦਰਾਂ ਵਿੱਚ ਵਾਧੇ ਦਾ ਸਿਲਸਿਲਾ 4·5 ਫੀ ਸਦੀ ਤੱਕ ਕਰਨ ਤੋਂ ਬਾਅਦ ਇਸ ਵਿੱਚ ਹੋਰ ਵਾਧੇ ਉੱਤੇ ਰੋਕ ਲਾ ਦਿੱਤੀ ਸੀ, ਨੇ ਆਖਿਆ ਕਿ ਜੇ ਮਹਿੰਗਾਈ ਇਸੇ ਤਰ੍ਹਾਂ ਜਾਰੀ ਰਹਿੰਦੀ ਹੈ ਜਾਂ ਅਰਥਚਾਰਾ ਭਖਿਆ ਰਹਿੰਦਾ ਹੈ ਤਾਂ ਉਸ ਨੂੰ ਮੁੜ ਵਿਆਜ਼ ਦਰਾਂ ਵਿੱਚ ਵਾਧਾ ਕਰਨਾ ਪੈ ਸਕਦਾ ਹੈ।