ਕੈਲਗਰੀ, 19 ਮਈ (ਪੋਸਟ ਬਿਊਰੋ): ਹੜਤਾਲ ਤੋਂ ਬਚਣ ਲਈ ਆਖਰੀ ਮਿੰਟ ਵਿੱਚ ਵੈਸਟਜੈੱਟ ਨੇ ਆਪਣੇ ਪਾਇਲਟਾਂ ਨਾਲ ਸਮਝੌਤਾ ਕਰ ਲਿਆ। ਵੈਸਟਜੈੱਟ ਗਰੁੱਪ ਦਾ ਕਹਿਣਾ ਹੈ ਕਿ ਉਹ ਜਲਦ ਤੋਂ ਜਲਦ ਸਾਰੇ ਠੱਪ ਪਏ ਕੰਮਾਂ ਨੂੰ ਲੀਹ ਉੱਤੇ ਲਿਆਉਣ ਦੀ ਕੋਸਿ਼ਸ਼ ਕਰ ਰਿਹਾ ਹੈ।
ਏਅਰਲਾਈਨ ਵੱਲੋਂ ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਪੂਰੀ ਤਰ੍ਹਾਂ ਆਪਰੇਸ਼ਨ ਸੁ਼ਰੂ ਹੋਣ ਵਿੱਚ ਅਜੇ ਸਮਾਂ ਲੱਗੇਗਾ। ਕੰਪਨੀ ਵੱਲੋਂ ਟਰੈਵਲਰਜ਼ ਨੂੰ ਏਅਰਪੋਰਟ ਆਉਣ ਤੋਂ ਪਹਿਲਾਂ ਲਗਾਤਾਰ ਆਪਣੀ ਫਲਾਈਟ ਦਾ ਸਟੇਟਸ ਵੇਖਣ ਦੀ ਵੀ ਸਲਾਹ ਦਿੱਤੀ ਗਈ ਹੈ।ਸ਼ੁੱਕਰਵਾਰ ਸਵੇਰ ਨੂੰ ਵੈਸਟਜੈੱਟ ਤੇ ਏਅਰ ਲਾਈਨ ਪਾਇਲਟਸ ਐਸੋਸਿਏਸ਼ਨ ਨੇ ਸਮਝੌਤਾ ਸਿਰੇ ਚੜ੍ਹਨ ਦਾ ਐਲਾਨ ਕੀਤਾ। ਸਮਝੌਤਾ ਸਿਰੇ ਨਾ ਚੜ੍ਹਨ ਕਾਰਨ ਏਅਰਲਾਈਨ ਦਾ ਕੰਮਕਾਜ ਬੁਰੀ ਤਰ੍ਹਾਂ ਠੱਪ ਹੋ ਗਿਆ ਸੀ।
ਇਹ ਸਮਝੌਤਾ ਨਾ ਹੋਣ ਕਾਰਨ ਏਅਰਲਾਈਨ ਦੇ ਕੈਨੇਡਾ, ਅਮਰੀਕਾ ਤੇ ਹੋਰਨਾਂ ਦੇਸ਼ਾਂ ਲਈ ਕਈ ਰੂਟ ਪ੍ਰਭਾਵਿਤ ਹੋਏ। ਪਰ ਵੈਸਟਜੈੱਟ ਐਨਕੋਰ ਰੀਜਨਲ ਸਰਵਿਸ ਤੇ ਵੈਸਟਜੈੱਟ ਦੀ ਮਲਕੀਅਤ ਵਾਲੀ ਸਨਵਿੰਗ ਏਅਰਲਾਈਨਜ਼ ਪ੍ਰਭਾਵਿਤ ਨਹੀਂ ਸਨ ਹੋਈਆਂ।ਵੈਸਟਜੈੱਟ ਦੇ ਸੀਈਓ ਅਲੈਕਸਿਸ ਵੌਨ ਹੋਇਨਜ਼ਬਰੌਇਕ ਨੇ ਦੱਸਿਆ ਕਿ ਪਾਇਲਟਸ ਨਾਲ ਹੋਏ ਸਮਝੌਤੇ ਵਿੱਚ ਜੌਬ ਸਕਿਊਰਿਟੀ ਤੇ ਸਕੋਪ ਦੇ ਨਾਲ ਨਾਲ ਕੰਮ ਕਰਨ ਦੇ ਹਾਲਾਤ ਤੇ ਭੱਤਿਆਂ ਵਿੱਚ ਸੁਧਾਰ ਦੀ ਗੱਲ ਵੀ ਮੰਨੀ ਗਈ ਹੈ।ਉਨ੍ਹਾਂ ਆਖਿਆ ਕਿ ਚੰਗੀ ਗੱਲ ਇਹ ਹੈ ਕਿ ਸਮਝੌਤਾ ਸਿਰੇ ਚੜ੍ਹ ਗਿਆ।