ਓਟਵਾ, 26 ਜਨਵਰੀ (ਪੋਸਟ ਬਿਊਰੋ) : ਆਪਣੇ ਪਾਰਲੀਆਮੈਂਟ ਮੈਂਬਰਾਂ ਵੱਲੋਂ ਘਰੇਲੂ ਇੰਟਰਨੈਟ ਸੇਵਾਵਾਂ ਲਈ ਖਰਚੇ ਦਾ ਬੋਝ ਟੈਕਸਦਾਤਾਵਾਂ ਦੀ ਜੇਬ੍ਹ ਉੱਤੇ ਪਾਉਣ ਦਾ ਵਿਰੋਧ ਕੰਜ਼ਰਵੇਟਿਵਾਂ ਦੇ ਨਾਲ ਨਾਲ ਫੈਡਰਲ ਲਿਬਰਲ ਸਰਕਾਰ ਵੱਲੋਂ ਵੀ ਕੀਤਾ ਜਾ ਰਿਹਾ ਹੈ।
ਸਰਕਾਰ ਦੇ ਹਾਊਸ ਲੀਡਰ ਮਾਰਕ ਹਾਲੈਂਡ ਦੇ ਆਫਿਸ ਨੇ ਵੀਰਵਾਰ ਨੂੰ ਆਖਿਆ ਕਿ ਉਹ ਇਹ ਪ੍ਰਸਤਾਵ ਪੇਸ਼ ਕਰਨਗੇ ਕਿ ਇਹ ਰੁਝਾਨ ਸਾਰੀਆਂ ਪਾਰਟੀਆਂ ਦੇ ਐਮਪੀਜ਼ ਵੱਲੋਂ ਬੰਦ ਕੀਤਾ ਜਾਵੇ।ਕੰਜ਼ਰਵੇਟਿਵਾਂ ਵੱਲੋਂ ਵੀ ਅਜਿਹਾ ਕਰਨ ਦੀ ਇੱਛਾ ਪ੍ਰਗਟਾਈ ਗਈ। ਕੈਨੇਡੀਅਨ ਪ੍ਰੈੱਸ ਵੱਲੋਂ ਕੀਤੇ ਗਏ ਇੱਕ ਵਿਸ਼ਲੇਸ਼ਣ ਅਨੁਸਾਰ 31 ਟੋਰੀ ਐਮਪੀਜ਼ ਵੱਲੋਂ ਖੁਦ ਲਈ ਜਾਂ ਆਪਣੇ ਸਟਾਫ ਲਈ ਘਰੇਲੂ ਇੰਟਰਨੈਟ ਸੇਵਾਵਾਂ ਦਾ ਖਰਚਾ ਟੈਕਸਦਾਤਾਵਾਂ ਤੋਂ ਵਸੂਲਿਆ ਜਾਂਦਾ ਰਿਹਾ ਹੈ। ਇਨ੍ਹਾਂ ਵਿੱਚ ਸਾਬਕਾ ਅੰਤਰਿਮ ਪਾਰਟੀ ਆਗੂ ਕੈਂਡਿਸ ਬਰਜਨ,ਮੈਨੀਟੋਬਾ ਦੇ ਐਮਪੀ ਜੇਮਜ਼ ਬੇਜਨ, ਕੈਲਗਰੀ ਤੋਂ ਐਮਪੀ ਮਿਸ਼ੇਲ ਰੈਂਪਲ ਗਾਰਨਰ ਤੇ ਬ੍ਰਿਟਿਸ਼ ਕੋਲੰਬੀਆ ਤੋਂ ਪਾਰਟੀ ਦੇ ਨੁਮਾਇੰਦੇ ਮਾਰਕ ਸਟ੍ਰਾਹਲ ਸ਼ਾਮਲ ਹਨ।
ਇਸੇ ਤਰ੍ਹਾਂ 27 ਲਿਬਰਲ ਐਮਪੀਜ਼ ਅਜਿਹੇ ਹਨ ਜਿਨ੍ਹਾਂ ਵੱਲੋਂ ਖੁਦ ਲਈ ਜਾਂ ਆਪਣੇ ਸਟਾਫ ਲਈ ਘਰੇਲੂ ਇੰਟਰਨੈਟ ਸੇਵਾਵਾਂ ਦਾ ਖਰਚਾ ਟੈਕਸਦਾਤਾਵਾਂ ਤੋਂ ਵਸੂਲਿਆ ਜਾਂਦਾ ਰਿਹਾ ਹੈ। ਇਨ੍ਹਾਂ ਵਿੱਚ ਨਿਆਂ ਮੰਤਰੀ ਡੇਵਿਡ ਲਾਮੇਟੀ ਤੇ ਵਿਦੇਸ਼ ਮੰਤਰੀ ਮਿਲੇਨੀ ਜੋਲੀ ਸ਼ਾਮਲ ਹਨ। ਬਲਾਕ ਕਿਊਬਿਕੁਆ ਤੇ ਐਨਡੀਪੀ ਦੇ ਕ੍ਰਮਵਾਰ 11 ਤੇ ਚਾਰ ਐਮਪੀਜ਼ ਵੀ ਅਜਿਹਾ ਕਰਦੇ ਰਹੇ ਹਨ। ਹਾਊਸ ਆਫ ਕਾਮਨਜ਼ ਦੀ ਤਰਜ਼ਮਾਨ ਨੇ ਦੱਸਿਆ ਕਿ ਇਸ ਰੁਝਾਨ ਦੀ ਐਮਪੀਜ਼ ਲਈ ਮੌਜੂਦਾ ਨਿਯਮਾਂ ਤਹਿਤ ਖੁੱਲ੍ਹ ਸੀ।
ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਅਜਿਹਾ ਕਰਨ ਨਾਲ ਕਿਸੇ ਨਿਯਮ ਦੀ ਉਲੰਘਣਾ ਨਹੀਂ ਹੋਈ ਹੈ ਪਰ ਵਿਰੋਧੀ ਧਿਰ ਦੇ ਵ੍ਹਿਪ ਦੇ ਆਫਿਸ ਵੱਲੋਂ ਐਮਪੀ ਨੂੰ ਦੱਸਿਆ ਗਿਆ ਕਿ ਕਾਕਸ ਲਈ ਇੱਕ ਨਵੀਂ ਨੀਤੀ ਕਾਇਮ ਕੀਤੀ ਗਈ ਹੈ। ਇਸ ਦਾ ਖੁਲਾਸਾ ਇੱਕ ਈਮੇਲ ਵਿੱਚ ਕੀਤਾ ਗਿਆ।ਈਮੇਲ ਵਿੱਚ ਆਖਿਆ ਗਿਆ ਕਿ ਇਹ ਫੈਸਲਾ ਕੀਤਾ ਗਿਆ ਹੈ ਕਿ ਕੋਈ ਵੀ ਕਾਕਸ ਮੈਂਬਰ ਜਾਂ ਮੁਲਾਜ਼ਮ ਘਰੇਲੂ ਇੰਟਰਨੈਟ ਦਾ ਖਰਚਾ ਟੈਕਸਦਾਤਾਵਾਂ ਤੋਂ ਨਹੀਂ ਵਸੂਲੇਗਾ।