ਓਟਵਾ, 17 ਜਨਵਰੀ (ਪੋਸਟ ਬਿਊਰੋ) : ਸੋਮਵਾਰ ਸਵੇਰੇ ਆਏ ਬਰਫੀਲੇ ਤੂਫਾਨ ਕਾਰਨ ਲੱਗਭਗ ਬਰਫ ਵਿੱਚ ਪੂਰੀ ਤਰ੍ਹਾਂ ਦਬ ਚੁੱਕੇ ਇੱਕ ਬਜ਼ੁਰਗ ਦੀ ਜਾਨ ਇੱਕ 8 ਸਾਲਾ ਬੱਚੇ ਕਾਰਨ ਬਚ ਗਈ। ਪੈਰਾਮੈਡਿਕਸ ਵੱਲੋਂ ਇਸ ਬੱਚੇ ਦਾ ਸ਼ੁਕਰੀਆ ਅਦਾ ਕੀਤਾ ਗਿਆ।
ਇੱਕ ਟਵੀਟ ਵਿੱਚ ਓਟਵਾ ਪੈਰਾਮੈਡਿਕਸ ਸਰਵਿਸ ਨੇ ਆਖਿਆ ਕਿ ਕਲੇਟਨ ਨੇ ਆਪਣੇ ਘਰ ਦੇ ਨੇੜੇ ਇੱਕ ਵਿਅਕਤੀ ਨੂੰ ਬਰਫ ਵਿੱਚ ਦੱਬਿਆ ਵੇਖਿਆ ਤੇ ਫੌਰਨ ਆਪਣੇ ਮਾਪਿਆਂ ਨੂੰ ਦੱਸਿਆ ਤੇ ਉਨ੍ਹਾਂ ਨੇ ਅੱਗੇ 911 ਨੂੰ ਕਾਲ ਕੀਤਾ।ਪੈਰਾਮੈਡਿਕਸ ਸਰਵਿਸ ਨੇ ਆਖਿਆ ਕਿ ਉਹ ਬਜ਼ੁਰਗ ਭਾਰੀ ਬਰਫਬਾਰੀ ਕਾਰਨ ਦਬ ਚੁੱਕਿਆ ਸੀ। ਉਸ ਬਜੁ਼ਰਗ ਦੀ ਸਿਹਤ ਸਬੰਧੀ ਜਾਂਚ ਮੌਕੇ ਉੱਤੇ ਕੀਤੀ ਗਈ ਪਰ ਉਸ ਨੇ ਹਸਪਤਾਲ ਨਾ ਜਾਣ ਦਾ ਫੈਸਲਾ ਕੀਤਾ।
ਸੋਮਵਾਰ ਸਵੇਰੇ 11:00 ਵਜੇ ਤੱਕ ਓਟਵਾ ਵਿੱਚ ਬਰਫੀਲੇ ਤੂਫਾਨ ਤੋਂ ਬਾਅਦ 38 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋਈ। ਸਿਟੀ ਸਟਾਫ ਨੇ ਦੱਸਿਆ ਕਿ ਉਨ੍ਹਾਂ ਨੂੰ 12 ਸੈਂਟੀਮੀਟਰ ਤੱਕ ਬਰਫਬਾਰੀ ਪ੍ਰਤੀ ਘੰਟਾਂ ਵੇਖਣ ਨੂੰ ਮਿਲੀ। ਓਟਵਾ ਦੇ ਮੇਅਰ ਜਿੰਮ ਵਾਟਸਨ ਨੇ ਕਲੇਟਨ ਦੇ ਇਸ ਕਦਮ ਦੀ ਤਾਰੀਫ ਕੀਤੀ ਤੇ ਉਸ ਨੂੰ ਕਮਾਲ ਦਾ ਨੇਕ ਬੱਚਾ ਦੱਸਿਆ। ਕਈ ਹੋਰਨਾਂ ਵੱਲੋਂ ਉਸ ਨੂੰ ਹੀਰੋ ਦੱਸਿਆ ਗਿਆ।