ਭੋਗਪੁਰ, 5 ਅਪ੍ਰੈਲ (ਪੋਸਟ ਬਿਊਰੋ)- ਕਰਫਿਊ ਦੌਰਾਨ ਸ਼ਰਾਬ ਪੀ ਰਹੇ ਭੋਗਪੁਰ ਨੇੜੇ ਪਿੰਡ ਮੋਗਾ ਵਿੱਚ ਇੱਕ ਪਰਵਾਸੀ ਮਜ਼ਦੂਰ ਨੇ ਆਪਣੇ ਸਾਥੀ ਦੀ ਹੱਤਿਆ ਕਰ ਦਿੱਤੀ। ਥਾਣਾ ਭੋਗਪੁਰ ਦੀ ਪੁਲਸ ਨੇ ਦੋਸ਼ੀ ਆਸ਼ੀਸ਼ ਕੁਮਾਰ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਉਸ ਨੇ ਮੰਨ ਲਿਆ ਹੈ ਕਿ ਵਿਵਾਦ ਸ਼ਰਾਬ ਦਾ ਪੈੱਗ ਘੱਟ ਪਾਉਣ ਨੂੰ ਲੈ ਕੇ ਹੋਇਆ ਸੀ।
ਐੱਸ ਐੱਸ ਪੀ (ਦਿਹਾਤੀ) ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ ਪਿੰਡ ਮੋਗਾ ਦੇ ਸਰਪੰਚ ਸਤਨਾਮ ਸਿੰਘ ਨੇ ਪੁਲਸ ਨੂੰ ਸੂਚਨਾ ਦਿੱਤੀ ਕਿ ਉਹ ਕੱਲ੍ਹ ਸ਼ਾਮ ਗੁੱਜਰਾਂ ਦੇ ਡੇਰੇ ਤੋਂ ਦੁੱਧ ਲੈ ਕੇ ਆ ਰਿਹਾ ਸੀ ਤਾਂ ਨੇੜਿਉਂ ਲੰਘਦੇ ਆਸ਼ੀਸ਼ ਕੁਮਾਰ ਅਤੇ ਰਾਜੂ ਨੂੰ ਸ਼ਰਾਬ ਦੇ ਨਸ਼ੇ ਵਿੱਚ ਬਹਿਸ ਕਰਦੇ ਸੁਣਿਆ। ਆਸ਼ੀਸ਼ ਅਤੇ ਰਾਜੂ ਦੋਵੇਂ ਗੁੱਜਰਾਂ ਦੇ ਡੇਰੇ ਵੱਲ ਜਾ ਰਹੇ ਸਨ। ਸਤਨਾਮ ਸਿੰਘ ਨੇ ਦੱਸਿਆ ਕਿ ਜਦ ਉਹ ਘਰ ਸੀ ਤਾਂ ਸ਼ਰਮੂਦੀਨ ਗੁੱਜਰ ਨੇ ਆ ਕੇ ਉਸ ਨੂੰ ਜਾਣਕਾਰੀ ਦਿੱਤੀ ਕਿ ਪੰਚਾਇਤੀ ਜ਼ਮੀਨ 'ਤੇ ਪਰਾਲੀ ਵਿੱਚ ਇੱਕ ਨੌਜਵਾਨ ਦੀ ਲਾਸ਼ ਪਈ ਹੈ। ਉਸ ਨੇ ਜਾ ਕੇ ਦੇਖਿਆ ਕਿ ਲਾਸ਼ ਰਾਜੂ ਦੀ ਸੀ। ਰਾਜੂ ਦੋਸ਼ੀ ਆਸ਼ੀਸ਼ ਕੁਮਾਰ ਦੇ ਘਰ 'ਤੇ ਰਹਿੰਦਾ ਸੀ। ਸਰਪੰਚ ਨੇ ਦੱਸਿਆ ਕਿ ਉਸ ਨੇ ਆਸ਼ੀਸ਼ ਨੂੰ ਰਾਤ ਨੂੰ ਇਕੱਲੇ ਵਾਪਸ ਆਉਂਦੇ ਹੋਏ ਦੇਖਿਆ ਸੀ। ਇਸ 'ਤੇ ਉਸ ਨੂੰ ਆਸ਼ੀਸ਼ ਕੁਮਾਰ 'ਤੇ ਸ਼ੱਕ ਹੋਇਆ।
ਪੁਲਸ ਨੇ ਸਰਪੰਚ ਦੇ ਬਿਆਨਾਂ 'ਤੇ ਆਸ਼ੀਸ਼ ਕੁਮਾਰ ਉੱਤੇ ਕੇਸ ਦਰਜ ਕਰ ਕੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ। ਥਾਣਾ ਭੋਗਪੁਰ ਦੇ ਐੱਸ ਐੱਚ ਓ ਜਰਨੈਲ ਸਿੰਘ ਨੇ ਦੱਸਿਆ ਕਿ ਦੋਸ਼ੀ ਆਸ਼ੀਸ਼ ਨੇ ਆਪਣਾ ਗੁਨਾਹ ਮੰਨ ਲਿਆ ਤੇ ਕਿਹਾ ਕਿ ਸ਼ਰਾਬ ਦੇ ਨਸ਼ੇ ਵਿੱਚ ਬਹਿਸ ਵਿੱਚ ਉਸ ਨੇ ਰਾਜੂ ਨੂੰ ਡੰਡਾ ਮਾਰ ਕੇ ਮਾਰ ਦਿੱਤਾ ਸੀ।