ਮਾਂਟਰੀਅਲ, 24 ਅਕਤੂਬਰ (ਪੋਸਟ ਬਿਊਰੋ): ਮਾਂਟਰੀਅਲ ਪੁਲਿਸ (ਐੱਸਪੀਵੀਐੱਮ) ਦਾ ਕਹਿਣਾ ਹੈ ਕਿ ਸ਼ਹਿਰ ਦੇ ਵਿਲੇਰੇ-ਸੇਂਟ-ਮਿਸ਼ੇਲ-ਪਾਰਕ- ਐਕਸਟੇਂਸ਼ਨ ਬੋਰੋ ਵਿੱਚ ਜੌਹਨ ਐੱਫ. ਕੈਨੇਡੀ ਹਾਈ ਸਕੂਲ ਦੇ ਬਾਹਰ ਵੀਰਵਾਰ ਨੂੰ ਚਾਰ ਟੀਨੇਜ਼ਰਜ਼ `ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਵਿਲੇਰੇ ਸਟਰੀਟ `ਤੇ ਸਕੂਲ ਦੇ ਸਾਹਮਣੇ ਇੱਕ ਗਲੀ ਵਿੱਚ ਦੁਪਹਿਰ ਕਰੀਬ 1 ਵਜੇ ਟੀਨੇਜ਼ਰਜ਼ ਦੇ ਇੱਕ ਵੱਡੇ ਗਰੁੱਪ ਵਿਚਕਾਰ ਹੋਏ ਵਿਵਾਦ ਦੌਰਾਨ ਛੁਰੇਬਾਜ਼ੀ ਦੀ ਘਟਨਾ ਹੋਈ।
ਜਦੋਂ ਅਧਿਕਾਰੀ ਪਹੁੰਚੇ ਤਾਂ ਉਨ੍ਹਾਂ ਨੇ ਇੱਕ 19 ਸਾਲਾ ਲੜਕੇ ਨੂੰ ਵੇਖਿਆ, ਜਿਸਦੇ ਸਰੀਰ ਦੇ ਉਪਰੀ ਹਿੱਸੇ ਵਿੱਚ ਚਾਕੂ ਦੇ ਜ਼ਖਮ ਸਨ, ਜਿਸਨੂੰ ਹਸਪਤਾਲ ਭੇਜਿਆ ਗਿਆ। ਪੁਲਿਸ ਉਸਦੀ ਹਾਲਤ ਬਾਰੇ ਅਪਡੇਟ ਦਾ ਇੰਤਜਾਰ ਕਰ ਰਹੀ ਹੈ।
ਇੱਕ ਹੋਰ 19 ਸਾਲਾ ਲੜਕਾ ਹੈ, ਜਿਸਦੇ ਹੱਥ ਵਿੱਚ ਚਾਕੂ ਮਾਰਿਆ ਗਿਆ ਪਰ ਉਸਨੂੰ ਹਸਪਤਾਲ ਵਿੱਚ ਭਰਤੀ ਕਰਨ ਦੀ ਲੋੜ ਨਹੀਂ ਸੀ ਅਤੇ ਉਹ ਖਤਰੇ ਤੋਂ ਬਾਹਰ ਹੈ। ਬਾਅਦ ਵਿੱਚ ਪੁਲਿਸ ਨੂੰ ਪਤਾ ਚੱਲਿਆ ਕਿ 15 ਸਾਲਾ ਦੇ ਦੋ ਲੜਕੇ ਚਾਕੂ ਦੇ ਜ਼ਖਮਾਂ ਨਾਲ ਖੁਦ ਹੀ ਹਸਪਤਾਲ ਗਏ ਸਨ। ਪੁਲਿਸ ਅਧਿਕਾਰੀ ਜੀਨ-ਪਿਅਰੇ ਬਰੇਬੇਂਟ ਨੇ ਕਿਹਾ ਕਿ ਬਾਅਦ ਵਿੱਚ ਦੋਨਾਂ ਲੜਕਿਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।ਚਾਕੂ ਦੇ ਹਮਲੇ ਨਾਲ ਜ਼ਖ਼ਮੀ ਹੋਏ ਚਾਰ ਲੋਕਾਂ ਵਿੱਚੋਂ ਤਿੰਨ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਜਾ ਰਹੀ ਹੈ। ਪੁਲਿਸ ਨੇ ਕਿਹਾ ਹੈ ਕਿ ਜਾਂਚ ਜਾਰੀ ਹੈ।