ਓਟਵਾ, 23 ਅਕਤੂਬਰ (ਪੋਸਟ ਬਿਊਰੋ): ਕੈਨੇਡਾ ਦੇ ਹੈਲੀਫੈਕਸ ਸ਼ਹਿਰ ’ਚ ਵਾਲਮਾਰਟ ਸਟੋਰ ਦੀ ਬੇਕਰੀ ਵਿਚ ਇੱਕ ਸਿੱਖ ਭਾਈਚਾਰੇ ਦੀ 19 ਸਾਲਾ ਲੜਕੀ ਦੀ ਲਾਸ਼ ਮਿਲੀ ਹੈ। ਹੈਲੀਫੈਕਸ ਰੀਜਨਲ ਪੁਲਿਸ (ਐੱਚ.ਆਰ.ਪੀ.) ਨੇ ਕਿਹਾ ਕਿ ਉਨ੍ਹਾਂ ਨੂੰ ਸ਼ਨੀਵਾਰ ਰਾਤ ਕਰੀਬ 9:30 ਵਜੇ 6990 ਮਮਫੋਰਡ ਰੋਡ ’ਤੇ ਵਾਲਮਾਰਟ ਵਿਚ ਘਟਨਾ ਬਾਰੇ ਸੂਚਨਾ ਸੀ। ਪੁਲਿਸ ਮੁਤਾਬਕ ਲੜਕੀ ਸਟੋਰ ’ਤੇ ਕੰਮ ਕਰਦੀ ਸੀ ਪਰ ਹਾਲੇ ਤਕ ਉਸ ਦੀ ਪਛਾਣ ਨਹੀਂ ਹੋ ਸਕੀ।
ਪੁਲਿਸ ਨੇ ਦਸਿਆ ਕਿ ਉਸ ਦੀ ਲਾਸ਼ ਇਕ ਵੱਡੇ ਵਾਕ-ਇਨ ਓਵਨ ਅੰਦਰੋਂ ਮਿਲੀ। ਮੈਰੀਟਾਈਮ ਸਿੱਖ ਸੁਸਾਇਟੀ ਨੇ ਇਸ ਬਾਰੇ ਪੁਸ਼ਟੀ ਕੀਤੀ ਕਿ ਲੜਕੀ ਉਨ੍ਹਾਂ ਦੇ ਭਾਈਚਾਰੇ ਦੀ ਮੈਂਬਰ ਸੀ।‘ਮੈਰੀਟਾਈਮ ਸਿੱਖ ਸੁਸਾਇਟੀ’ ਨੇ ਕਿਹਾ ਇਹ ਸਾਡੇ ਅਤੇ ਉਨ੍ਹਾਂ ਦੇ ਪਰਿਵਾਰ ਲਈ ਬਹੁਤ ਦੁਖਦਾਈ ਹੈ। ਉਹ ਅਪਣੇ ਬਿਹਤਰ ਭਵਿੱਖ ਲਈ ਇੱਥੇ ਆਈ ਸੀ ਪਰ ਅਪਣੀ ਜਾਨ ਗੁਆ ਬੈਠੀ। ਜਾਣਕਾਰੀ ਅਨੁਸਾਰ ਲੜਕੀ ਹਾਲ ਹੀ ’ਚ ਭਾਰਤ ਤੋਂ ਕੈਨੇਡਾ ਆਈ ਸੀ।
ਔਰਤ ਦੀ ਮੌਤ ਦੀ ਜਾਂਚ ਜਾਰੀ ਰਹਿਣ ਤੱਕ ਸਟੋਰ ਸ਼ਨੀਵਾਰ ਰਾਤ ਤੋਂ ਬੰਦ ਹੈ। ਐੱਚ.ਆਰ.ਪੀ. ਕਾਂਸਟੇਬਲ ਮਾਰਟਿਨ ਕ੍ਰੋਮਵੈਲ ਨੇ ਕਿਹਾ, ਕਿ ਇਸ ਮਾਮਲੇ ਦੀ ਜਾਂਚ ਗੁੰਝਲਦਾਰ ਹੈ। ਹੈਲੀਫੈਕਸ ਦੇ ਲੇਬਰ ਵਿਭਾਗ ਦੇ ਬੁਲਾਰੇ ਨੇ ਕਿਹਾ ਕਿ ਬੇਕਰੀ ਅਤੇ ਵਾਲਮਾਰਟ ਸਟੋਰ ’ਤੇ ਕੰਮ ਬੰਦ ਕਰਨ ਦਾ ਹੁਕਮ ਜਾਰੀ ਕੀਤਾ ਗਿਆ ਹੈ। ਐੱਚ.ਆਰ.ਪੀ. ਨੇ ਕਿਹਾ ਕਿ ਜਾਂਚ ਜਾਰੀ ਹੈ।