ਢਾਕਾ, 17 ਅਕਤੂਬਰ (ਪੋਸਟ ਬਿਊਰੋ): ਬੰਗਲਾਦੇਸ਼ ਦੀ ਸਰਕਾਰ ਨੇ ਦੇਸ਼ ਦੀ ਪਿਛਲੀ ਸ਼ੇਖ ਹਸੀਨਾ ਸਰਕਾਰ ਦੁਆਰਾ ਸ਼ੁਰੂ ਕੀਤੀਆਂ 8 ਰਾਸ਼ਟਰੀ ਛੁੱਟੀਆਂ ਨੂੰ ਰੱਦ ਕਰ ਦਿੱਤਾ ਹੈ, ਜਿਸ ਵਿੱਚ 7 ਮਾਰਚ ਨੂੰ ਬੰਗਬੰਧੂ ਦੇ ਮਹੱਤਵਪੂਰਨ ਭਾਸ਼ਣ ਦੇ ਸਨਮਾਨ ਵਿੱਚ ਸ਼ੁਰੂ ਕੀਤੀ ਗਈ ਛੁੱਟੀ ਵੀ ਸ਼ਾਮਿਲ ਹੈ।
ਜਾਣਕਾਰੀ ਅਨੁਸਾਰ ਰੱਦ ਕੀਤੀਆਂ ਛੁੱਟੀਆਂ ਵਿੱਚ ਬੰਗਬੰਧੂ ਸ਼ੇਖ ਮੁਜੀਬੁਰ ਰਹਿਮਾਨ ਵੱਲੋਂ ਦਿੱਤੇ ਗਏ ਮਹੱਤਵਪੂਰਨ ਭਾਸ਼ਣ ਦੇ ਸਨਮਾਨ ਵਿੱਚ ‘ਇਤਿਹਾਸਕ 7 ਮਾਰਚ’ ਦਾ ਦਿਨ, 17 ਮਾਰਚ ਨੂੰ ਮੁਜੀਬੁਰ ਰਹਿਮਾਨ ਦਾ ਜਨਮ ਦਿਨ, 5 ਅਗਸਤ ਨੂੰ ਬਰਖ਼ਾਸਤ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਭਰਾ ਦੀ ਜਯੰਤੀ, 8 ਅਗਸਤ ਨੂੰ ਹਸੀਨਾ ਦੀ ਮਾਂ ਦੀ ਜਯੰਤੀ, 15 ਅਗਸਤ ਨੂੰ ਮੁਜੀਬੁਰ ਰਹਿਮਾਨ ਦੀ ਬਰਸੀ, 18 ਅਕਤੂਬਰ ਨੂੰ ਹਸੀਨਾ ਦੇ ਛੋਟੇ ਭਰਾ ਦਾ ਜਨਮ ਦਿਨ, 4 ਨਵੰਬਰ ਨੂੰ ਰਾਸ਼ਟਰੀ ਸੰਵਿਧਾਨ ਦਿਵਸ ਅਤੇ 12 ਦਸੰਬਰ ਨੂੰ ਸਮਾਰਟ ਬੰਗਲਾਦੇਸ਼ ਦਿਵਸ ਸ਼ਾਮਿਲ ਹਨ। ਅੰਤਰਿਮ ਸਰਕਾਰ ਦੇ ਮੁੱਖ ਸਲਾਹਕਾਰ ਨੇ ਬੁੱਧਵਾਰ ਨੂੰ ਇੱਕ ਪ੍ਰਮਾਣਿਤ ਫੇਸਬੁੱਕ ਪੇਜ 'ਤੇ ਇੱਕ ਪੋਸਟ ਵਿੱਚ ਇਸ ਦਾ ਐਲਾਨ ਕੀਤਾ। ਬਾਅਦ ਵਿੱਚ ਕੈਬਨਿਟ ਡਿਵੀਜ਼ਨ ਵੱਲੋਂ ਜਾਰੀ ਇੱਕ ਸਰਕੂਲਰ ਰਾਹੀਂ ਇਨ੍ਹਾਂ ਰਾਸ਼ਟਰੀ ਦਿਵਸਾਂ ਨੂੰ ਰੱਦ ਕਰ ਦਿੱਤਾ ਗਿਆ।