ਕੋਲਕਾਤਾ, 9 ਅਕਤੂਬਰ (ਪੋਸਟ ਬਿਊਰੋ): ਸੀ.ਬੀ.ਆਈ. ਨੇ ਕੋਲਕਾਤਾ ਟਰੇਨੀ ਡਾਕਟਰ ਨਾਲ ਬਲਾਤਕਾਰ ਅਤੇ ਕਤਲ ਕੇਸ ਵਿੱਚ ਮੁਲਜ਼ਮ ਸੰਜੇ ਰਾਏ ਖਿਲਾਫ਼ 11 ਸਬੂਤ ਇਕੱਠੇ ਕੀਤੇ ਹਨ। ਇਨ੍ਹਾਂ ਸਾਰੇ ਸਬੂਤਾਂ ਦਾ ਚਾਰਜਸ਼ੀਟ ਵਿੱਚ ਜਿ਼ਕਰ ਕੀਤਾ ਗਿਆ ਹੈ ਅਤੇ ਸੰਜੇ ਰਾਏ ਨੂੰ ਮੁੱਖ ਮੁਲਜ਼ਮ ਬਣਾਇਆ ਗਿਆ ਹੈ।
ਜਾਣਕਾਰੀ ਅਨੁਸਾਰ ਰਿਪੋਰਟ ਵਿੱਚ ਕਿਹਾ ਕਿ ਪੀੜਤਾ ਨੇ ਘਟਨਾ ਦੌਰਾਨ ਸੰਜੇ ਦਾ ਵਿਰੋਧ ਕੀਤਾ ਸੀ। ਇਸ ਚਾਰਜਸ਼ੀਟ 'ਚ ਪੀੜਤਾ ਨੂੰ V ਨਾਮ ਨਾਲ ਸੰਬੋਧਤ ਕੀਤਾ ਗਿਆ ਹੈ। ਸੀਬੀਆਈ ਨੇ ਦੱਸਿਆ ਕਿ ਪੀੜਤਾ ਦੇ ਸਰੀਰ 'ਤੇ ਸੰਜੇ ਦਾ ਡੀਐੱਨਏ ਮਿਲਿਆ ਹੈ ਅਤੇ ਛੋਟੇ ਵਾਲ ਵੀ ਮਿਲੇ ਹਨ।
ਕੋਲਕਾਤਾ ਦੇ ਆਰਜੀ ਕਾਰ ਮੈਡੀਕਲ ਕਾਲਜ ਵਿੱਚ 8 ਅਗਸਤ ਦੀ ਰਾਤ ਨੂੰ ਇੱਕ ਸਿਖਿਆਰਥੀ ਡਾਕਟਰ ਦਾ ਬਲਾਤਕਾਰ ਅਤੇ ਕਤਲ ਕਰ ਦਿੱਤਾ ਗਿਆ ਸੀ। 9 ਅਗਸਤ ਨੂੰ ਪੀੜਤਾ ਦੀ ਲਾਸ਼ ਮੈਡੀਕਲ ਕਾਲਜ 'ਚ ਮਿਲੀ ਸੀ। ਸ਼ੁਰੂਆਤੀ ਜਾਂਚ ਤੋਂ ਬਾਅਦ ਸੰਜੇ ਰਾਏ ਨੂੰ ਪੁਲਿਸ ਨੇ 10 ਅਗਸਤ ਨੂੰ ਗ੍ਰਿਫ਼ਤਾਰ ਕੀਤਾ ਸੀ।
ਇਸ ਘਟਨਾ ਦੇ ਵਿਰੋਧ ਵਿੱਚ ਟਰੇਨੀ ਡਾਕਟਰ ਭੁੱਖ ਹੜਤਾਲ ’ਤੇ ਹਨ, ਜਿਸ ਵਿੱਚ ਫੈਡਰੇਸ਼ਨ ਆਫ ਆਲ ਇੰਡੀਆ ਮੈਡੀਕਲ ਐਸੋਸੀਏਸ਼ਨ (FAIMA) ਵੀ ਸ਼ਾਮਿਲ ਹੋ ਗਿਆ ਹੈ। ਅੱਜ FAIMA ਦੇਸ਼ ਭਰ ਵਿੱਚ ਭੁੱਖ ਹੜਤਾਲ ’ਤੇ ਹੈ।
ਪੀੜਤਾ ਦੇ ਸਰੀਰ 'ਤੇ ਸੰਜੇ ਦੇ ਡੀਐੱਨਏ ਦੀ ਪੁਸ਼ਟੀ ਹੋ ਗਈ ਹੈ। ਛੋਟੇ ਵਾਲ ਵੀ ਮਿਲੇ ਹਨ। ਪੀੜਤਾ ਦਾ ਖੂਨ ਸੰਜੇ ਦੀ ਜੀਨਸ 'ਤੇ ਵੀ ਪਾਇਆ ਗਿਆ ਸੀ। ਘਟਨਾ ਦੌਰਾਨ ਪੀੜਤਾ ਨੇ ਸੰਜੇ ਦਾ ਵਿਰੋਧ ਕੀਤਾ ਸੀ। ਜਿਸ ਕਾਰਨ ਸੰਜੇ ਨੂੰ ਸੱਟ ਲੱਗ ਗਈ। ਸੰਜੇ ਦੇ ਸਰੀਰ 'ਤੇ ਪੀੜਤਾ ਦੇ ਸੰਘਰਸ਼ ਦੇ ਨਿਸ਼ਾਨ ਮਿਲੇ ਹਨ। ਘਟਨਾ ਵਾਲੀ ਥਾਂ 'ਤੇ ਲੱਗੇ ਸੀਸੀਟੀਵੀ ਫੁਟੇਜ 'ਚ ਸੰਜੇ ਰਾਏ ਦੀ ਮੌਜੂਦਗੀ ਪਾਈ ਗਈ ਹੈ। ਇਸ ਤੋਂ ਇਲਾਵਾ ਸੰਜੇ ਦੀ ਕਾਲ ਡਿਟੇਲ ਰਿਪੋਰਟ ਅਤੇ ਮੋਬਾਈਲ ਲੋਕੇਸ਼ਨ ਨੇ ਵੀ ਉਸ ਦੇ ਮੌਕੇ 'ਤੇ ਮੌਜੂਦ ਹੋਣ ਦੀ ਪੁਸ਼ਟੀ ਕੀਤੀ ਹੈ।