ਪਟਨਾ, 23 ਸਤੰਬਰ (ਪੋਸਟ ਬਿਊਰੋ): ਬਿਹਾਰ ਦੇ ਪਟਨਾ ਜਿ਼ਲ੍ਹੇ ’ਚ ਐਤਵਾਰ ਰਾਤ ਬਖਤਿਆਰਪੁਰ-ਤਾਜਪੁਰ ਗੰਗਾ ਮਹਾਸੇਤੂ ਦਾ ਨਿਰਮਾਣ ਅਧੀਨ ਹਿੱਸਾ ਢਹਿ ਗਿਆ। ਇਹ ਘਟਨਾ ਬਖਤਿਆਰਪੁਰ-ਤਾਜਪੁਰ ਗੰਗਾ ਮਹਾਸੇਤੂ ਦੇ ਗਾਰਡਰਾਂ ਦੇ ਬੇਅਰਿੰਗ ਬਦਲਣ ਦੌਰਾਨ ਵਾਪਰੀ। ਉਨ੍ਹਾਂ ਵਿਚੋਂ ਇਕ ਥੰਮ ’ਤੇ ਗਰਡਰ ਰਖਦੇ ਸਮੇਂ ਡਿੱਗ ਪਿਆ।
ਬਿਹਾਰ ਸਟੇਟ ਰੋਡ ਡਿਵੈਲਪਮੈਂਟ ਕਾਰਪੋਰੇਸ਼ਨ ਲਿਮਟਿਡ (ਬੀ.ਐੱਸ.ਆਰ.ਡੀ.ਸੀ.ਐੱਲ.) ਦੇ ਮੁੱਖ ਜਨਰਲ ਮੈਨੇਜਰ ਪ੍ਰਬੀਨ ਚੰਦਰ ਗੁਪਤਾ ਨੇ ਦਸਿਆ ਕਿ ਬੇਅਰਿੰਗ ਬਦਲਣਾ ਇਕ ਆਮ ਅਭਿਆਸ ਹੈ। ਹਾਲੇ ਤਕ ਕਿਸੇ ਦੇ ਜਾਨੀ ਨੁਕਸਾਨ ਦੀ ਖ਼ਬਰ ਨਹੀਂ ਹੈ। ਅਸੀਂ ਕੰਮ ਦਾ ਨਿਰੀਖਣ ਕਰਨ ਲਈ ਮੌਕੇ ’ਤੇ ਜਾ ਰਹੇ ਹਾਂ।’’ ਬੀ.ਐੱਸ.ਆਰ.ਡੀ.ਸੀ.ਐੱਲ. ਬਖਤਿਆਰਪੁਰ-ਤਾਜਪੁਰ ਗੰਗਾ ਮਹਾਸੇਤੂ ਦੇ ਨਿਰਮਾਣ ਦੀ ਨਿਗਰਾਨੀ ਕਰ ਰਹੀ ਹੈ।
ਪਟਨਾ ਦੇ ਜਿ਼ਲ੍ਹਾ ਅਧਿਕਾਰੀ ਚੰਦਰਸ਼ੇਖਰ ਸਿੰਘ ਨੇ ਕਿਹਾ ਕਿ ਨਿਯਮਿਤ ਕੰਮ ਦੌਰਾਨ ਬਖਤਿਆਰਪੁਰ ਵਾਲੇ ਪਾਸੇ ਉਸਾਰੀ ਅਧੀਨ ਪੁਲ ਦਾ ਇਕ ਗਰਡਰ ਡਿੱਗ ਗਿਆ। ਇਸ ਪ੍ਰਾਜੈਕਟ ਦਾ ਨਿਰਮਾਣ ਪਿਛਲੇ ਕਈ ਸਾਲਾਂ ਤੋਂ ਚੱਲ ਰਿਹਾ ਹੈ।
ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਜੂਨ 2011 ’ਚ 5.57 ਕਿਲੋਮੀਟਰ ਲੰਬੇ ਬਖਤਿਆਰਪੁਰ-ਤਾਜਪੁਰ ਗੰਗਾ ਮਹਾਸੇਤੂ ਦਾ ਨੀਂਹ ਪੱਥਰ ਰੱਖਿਆ ਸੀ। ਇਸ ਪ੍ਰੋਜੈਕਟ ਦੀ ਕੁਲ ਲਾਗਤ 1,602.74 ਕਰੋੜ ਰੁਪਏ ਸੀ। ਪ੍ਰਾਜੈਕਟ ਦੇ ਪੂਰਾ ਹੋਣ ਤੋਂ ਬਾਅਦ, ਇਹ ਪੁਲ ਸਮਸਤੀਪੁਰ ’ਚ ਐੱਨ.ਐੱਚ. 28 ਅਤੇ ਪਟਨਾ ’ਚ ਐੱਨ.ਐੱਚ. 31 ਨੂੰ ਜੋੜੇਗਾ।