ਬਰੈਂਪਟਨ, 3 ਜੁਲਾਈ (ਪੋਸਟ ਬਿਊਰੋ): 30 ਜੂਨ, ਐਤਵਾਰ ਨੂੰ ਫਾਦਰ ਟੌਬਿਨ ਸੀਨੀਅਰਜ਼ ਕਲੱਬ ਵੱਲੋਂ ਮਸਕੋਕਾ ਦਾ ਟੂਰ ਲਗਾਇਆ ਗਿਆ। ਠੀਕ 7:30 `ਤੇ ਟੀ.ਜੇ. ਕੰਪਨੀ ਦੀ ਡੀਲੈਕਸ ਕੋਚ ਟੂਰ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਸਰਦਾਰ ਰਾਮ ਸਿੰਘ ਜੀ ਕੁਲਾਰ (ਰਿਟਾਇਰਡ ਪ੍ਰਿੰਸੀਪਲ) ਸਾਹਿਬ ਨੇ ਅਰਦਾਸ ਕਰਕੇ ਟੂਰ ਦੀ ਰਵਾਨਗੀ ਕਰਵਾਈ। ਜੈਕਾਰਿਆਂ ਦੀ ਗੂੰਜ ਵਿੱਚ ਬਸ ਮੰਜਿ਼ਲ ਵੱਲ ਰਵਾਨਾ ਹੋਈ।
ਜੂਸ, ਕੋਕ, ਲੱਡੂ ਅਤੇ ਪਾਣੀ ਆਦਿ ਸਭ ਲਈ ਪ੍ਰਬੰਧ ਟੂਰ ਪਲੈਨਰ ਪਰਮਜੀਤ ਸਿੰਘ ਕਾਲੇਕਾ, ਸਰਦਾਰ ਇਕਬਾਲ ਸਿੰਘ ਘੋਲੀਆ ਪ੍ਰਧਾਨ ਅਤੇ ਸਰਦਾਰ ਕਰਤਾਰ ਸਿੰਘ ਚਾਹਲ ਵੱਲੋਂ ਸਚੰਜੇ ਢੰਗ ਨਾਲ ਕੀਤਾ ਗਿਆ ਸੀ। ਕੁਝ ਚੀਜ਼ਾਂ ਸਫ਼ਰ ਦੌਰਾਨ ਹੀ ਸਰਦਾਰ ਗੁਰਮੀਤ ਸਿੰਘ ਸੰਧੂ ਕੈਸ਼ੀਅਰ, ਸਰਦਾਰ ਨਿਰਮਲ ਸਿੰਘ ਡਡਵਾਲ ਮੀਤ ਪ੍ਰਧਾਨ ਵੱਲੋਂ ਬੱਸ ਵਿੱਚ ਹੀ ਵਰਤਾਈਆਂ ਜਾ ਰਹੀਆਂ ਸਨ।
ਤਕਰੀਬਨ 9 ਵਜੇ ਬਸ ਕੋਚੀਚਿੰਗ ਵੀਚ ਪਾਰਕ ਔਰੀਲੀਆ ਵਿਖੇ ਪਹੁੰਚੀ ਇੱਥੇ ਦੋ ਘੰਟੇ ਰੁਕਣਾ ਸੀ, ਸਭ ਕਹਿ ਰਹੇ ਸਨ ਕਿ ਇਨਾ ਸੁੰਦਰ ਤੇ ਰਮਣੀਕ ਪਾਰਕ ਅਤੇ ਬੀਚ ਪਹਿਲਾਂ ਨਹੀਂ ਦੇਖਿਆ ਝੀਲ ਵਿੱਚ ਕਿਸ਼ਤੀਆਂ ਦੀ ਭਰਮਾਰ ਸੀ ਪਾਰਕ ਵਿੱਚ ਸੁੰਦਰ ਝੂਲੇ ਬਹੁਤ ਸਾਰੇ ਫੁੱਲ ਤੇ ਰੁੱਖ ਸਨ ਹਰ ਪਾਸੇ ਹਰਿਆਵਲ ਸੀ ਬੈਠਣ ਲਈ ਜਾ ਥਾਂ-ਥਾਂ ਬੈਂਚ ਸ਼ੈਡ ਅਤੇ ਬਾਥਰੂਮ ਬਣੇ ਹੋਏ ਸਨ।
ਇਥੇ ਸਭ ਨੇ ਦੁਪਹਿਰ ਦਾ ਖਾਣਾ ਖਾਧਾ। ਠੀਕ 11:30 ਵਜੇ ਬਸ ਅਗਲੇਰੇ ਪਰਾੜ ਲਈ ਰਵਾਨਾ ਹੋਈ ਅਤੇ ਠੀਕ ਇੱਕ ਵਜੇ ਬਸ ਏਨ ਬਿਲੀਅਮ ਮੈਮੋਰੀਅਲ ਪਾਰਕ ਬ੍ਰੇਸ ਬ੍ਰਿਜ ਵਿਖੇ ਪਹੁੰਚੀ। ਇਥੇ ਨੇਟਿਵ ਇੰਡੀਅਨਜ਼ ਦਾ ਵਿਸ਼ਾਲ ਪ੍ਰੋਗਰਾਮ ਚੱਲ ਰਿਹਾ ਸੀ ਚਾਰੇ ਪਾਸੇ ਰੌਣਕਾਂ ਲੱਗੀਆਂ ਹੋਈਆਂ ਸਨ। ਉਨ੍ਹਾਂ ਦਾ ਲੋਕਲ ਸੰਗੀਤ ਚੱਲ ਰਿਹਾ ਸੀ ਏਰੀਏ ਦੇ ਮੇਅਰ ਕੌਂਸਲਰ ਆਦਿ ਦਾ ਸਵਾਗਤ ਕੀਤਾ ਜਾ ਰਿਹਾ ਸੀ। ਚਾਰੇ ਪਾਸੇ ਲੱਗੀਆਂ ਦੁਕਾਨਾਂ ਤੋਂ ਲੋਕ ਖਰੀਦੋ ਫਰੋਖਤ ਕਰ ਰਹੇ ਸਨ। ਠੀਕ 3 ਵਜੇ ਮਸਕੋਕਾ ਰਿਵਰ ਕਰੂਜ `ਤੇ ਆ ਕੇ ਸਫ਼ਰ ਦਾ ਆਨੰਦ ਮਾਣਿਆ।
ਤਕਰੀਬਨ 4:30 `ਤੇ ਸਾਰੇ ਹਾਈ ਫਾਲਜ਼ ਮਸਕੋਕਾ ਪਹੁੰਚੇ। ਫਾਲਜ਼ ਦਾ ਆਨੰਦ ਮਾਣਿਆ ਅਤੇ ਦਸੰਬਰ 1948 ਦੇ ਬਣੇ ਪਾਵਰ ਹਾਊਸ ਵੀ ਦੇਖੇ। ਤਕਰੀਬਨ 5:30 ਵਜੇ ਸਭ ਖੁਸ਼ੀ ਖੁਸ਼ੀ ਇਥੋਂ ਰਵਾਨਾ ਹੋਏ ਅਤੇ ਰਾਹ ਵਿੱਚ ਟਿਮ ਹਾਰਟਨ `ਤੇ ਕਾਫੀ ਦਾ ਆਨੰਦ ਮਾਣਿਆ। ਠੀਕ 8 ਵਜੇ ਸੈਲਡ ਡੋਮ ਪਾਰਕ ਪਹੁੰਚ ਕੇ ਸਾਰੇ ਹੱਸਦੇ ਖੇਡਦੇ ਅਤੇ ਪ੍ਰਬੰਧਕਾਂ ਧੰਨਵਾਦ ਕਰਦੇ ਹੋਏ ਘਰਾਂ ਨੂੰ ਰਵਾਨਾ ਹੋਏ।