ਨਵੀਂ ਦਿੱਲੀ, 3 ਜੁਲਾਈ (ਪੋਸਟ ਬਿਊਰੋ): ਪ੍ਰਧਾਨ ਮੰਤਰੀ ਮੋਦੀ ਨੇ ਬੁੱਧਵਾਰ ਨੂੰ ਰਾਜ ਸਭਾ 'ਚ ਰਾਸ਼ਟਰਪਤੀ ਦੇ ਭਾਸ਼ਣ 'ਤੇ ਧੰਨਵਾਦ ਪ੍ਰਸਤਾਵ ਦਾ ਜਵਾਬ ਦਿੱਤਾ। 1 ਘੰਟਾ 50 ਮਿੰਟ ਦੇ ਭਾਸ਼ਣ ਵਿੱਚ ਪ੍ਰਧਾਨ ਮੰਤਰੀ ਨੇ ਨੀਟ, ਮਣੀਪੁਰ, ਸੰਵਿਧਾਨ, ਕਾਂਗਰਸ, ਪੱਛਮੀ ਬੰਗਾਲ, ਰੁਜ਼ਗਾਰ, ਭ੍ਰਿਸ਼ਟਾਚਾਰ, ਸੀਬੀਆਈ-ਈਡੀ, ਸੰਘਵਾਦ, ਐਮਰਜੈਂਸੀ, ਜੰਮੂ-ਕਸ਼ਮੀਰ, ਇੰਦਰਾ, ਰਾਹੁਲ, ਦਲਿਤਾਂ 'ਤੇ ਗੱਲ ਕੀਤੀ।
ਜਦੋਂ ਪ੍ਰਧਾਨ ਮੰਤਰੀ 32 ਮਿੰਟ ਬੋਲੇ ਤਾਂ ਵਿਰੋਧੀ ਧਿਰ ਦੇ ਨੇਤਾ ਸਦਨ ਤੋਂ ਵਾਕਆਊਟ ਕਰ ਗਏ। ਪ੍ਰਧਾਨ ਮੰਤਰੀ ਵੱਲੋਂ ਸੋਨੀਆ ਗਾਂਧੀ ਨੂੰ ਨਿਸ਼ਾਨਾ ਬਣਾਉਣ ਤੋਂ ਬਾਅਦ ਵਾਕਆਊਟ ਕੀਤਾ ਗਿਆ। ਉਨ੍ਹਾਂ ਕਿਹਾ- ਇਹ ਉਹ ਲੋਕ ਹਨ ਜੋ ਆਟੋ ਪਾਇਲਟ ਅਤੇ ਰਿਮੋਟ ਪਾਇਲਟ 'ਤੇ ਸਰਕਾਰ ਚਲਾਉਣ ਦੇ ਆਦੀ ਹਨ। ਉਹ ਕੰਮ ਕਰਨ ਵਿੱਚ ਵਿਸ਼ਵਾਸ ਨਹੀਂ ਰੱਖਦੇ, ਉਹ ਬਸ ਇੰਤਜ਼ਾਰ ਕਰਨਾ ਜਾਣਦੇ ਹਨ।
ਇਸ 'ਤੇ ਉਪ ਰਾਸ਼ਟਰਪਤੀ ਅਤੇ ਰਾਜ ਸਭਾ ਦੇ ਚੇਅਰਮੈਨ ਜਗਦੀਪ ਧਨਖੜ ਨੇ ਕਿਹਾ ਕਿ ਇਹ ਲੋਕ ਮੈਨੂੰ ਨਹੀਂ, ਸੰਵਿਧਾਨ ਨੂੰ ਪਿੱਠ ਦਿਖਾ ਰਹੇ ਹਨ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੱਲ੍ਹ ਇਨ੍ਹਾਂ ਦੀਆਂ ਸਾਰੀਆਂ ਕੋਸਿ਼ਸ਼ਾਂ ਅਸਫਲ ਹੋ ਗਈਆਂ, ਇਸ ਲਈ ਉਹ ਮੈਦਾਨ ਛੱਡ ਕੇ ਭੱਜ ਗਏ। ਨਾਅਰੇ ਲਾਉਣੇ, ਰੌਲਾ ਪਾਉਣਾ ਤੇ ਭੱਜਣਾ, ਇਹੀ ਉਨ੍ਹਾਂ ਦੀ ਨੀਤੀ ਹੈ।