ਓਨਟਾਰੀਓ, 16 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਹਾਊਸਿੰਗ ਮੰਤਰੀ ਪਾਲ ਕਲੈਂਡਰਾ ਵੱਲੋਂ ਇੱਕ ਬਿੱਲ ਪੇਸ਼ ਕੀਤਾ ਗਿਆ ਹੈ ਜਿਸ ਤਹਿਤ ਸ਼ਹਿਰੀ ਤੇ ਰੀਜਨਲ ਸਰਹੱਦਾ ਦੇ ਪਸਾਰ ਦੇ ਰੁਝਾਨ ਨੂੰ ਪਲਟਾਇਆ ਜਾਵੇਗਾ।
ਕਲੈਂਡਰਾ ਨੇ ਆਖਿਆ ਕਿ ਪਿਛਲੇ ਹਾਊਸਿੰਗ ਮੰਤਰੀ ਦਾ ਸਟਾਫ ਇਸ ਪਸਾਰ ਦੇ ਮੁੱਦੇ ਵਿੱਚ ਖੁੱਭਿਆ ਪਿਆ ਸੀ। ਇਸ ਪਸਾਰ ਦੇ ਮੁੱਦੇ ਨੂੰ 2022 ਦੇ ਅੰਤ ਤੇ ਇਸ ਸਾਲ ਦੇ ਸ਼ੁਰੂ ਵਿੱਚ ਪੇਸ਼ ਕੀਤਾ ਗਿਆ ਸੀ। ਪ੍ਰੋਵਿੰਸ ਵੱਲੋਂ ਬੈਰੀ, ਬੈਲੇਵਿੱਲ, ਗੁਐਲਫ, ਹੈਮਿਲਟਨ, ਓਟਵਾ ਤੇ ਪੀਟਰਬਰੋ ਲਈ ਸਰਕਾਰੀ ਯੋਜਨਾਵਾਂ ਤੱਕ ਵਿੱਚ ਤਬਦੀਲੀਆਂ ਕਰ ਦਿੱਤੀਆਂ ਸਨ ਤੇ ਇਸ ਦੇ ਨਾਲ ਹੀ ਰੀਜਨਲ ਮਿਊਂਸਪੈਲਿਟੀਜ਼ ਜਿਵੇਂ ਕਿ ਹਾਲਟਨ, ਨਾਇਗਰਾ, ਪੀਲ, ਵਾਟਰਲੂ ਤੇ ਯੌਰਕ ਤੇ ਵੈਲਿੰਗਟਨ ਕਾਊਂਟੀ ਵਿੱਚ ਵੀ ਤਬਦੀਲੀਆਂ ਕੀਤੀਆਂ ਗਈਆਂ ਸਨ।
ਸਰਕਾਰ ਅਗਲੇ 10 ਸਾਲਾਂ ਦੇ ਅਰਸੇ ਵਿੱਚ 1·5 ਮਿਲੀਅਨ ਘਰਾਂ ਦੇ ਨਿਰਮਾਣ ਲਈ ਗ੍ਰੀਨਬੈਲਟ ਤੋਂ ਜ਼ਮੀਨ ਲੈ ਕੇ ਉਸ ਉੱਤੇ ਨਿਰਮਾਣ ਦਾ ਕੰਮ ਕਰਨਾ ਚਾਹੁੰਦੀ ਸੀ। ਦੋ ਲੈਜਿਸਲੇਟਿਵ ਵਾਚਡੌਗਜ਼ ਨੇ ਗ੍ਰੀਨਬੈਲਟ ਤੋਂ ਜ਼ਮੀਨ ਲੈਣ ਦੀ ਪ੍ਰਕਿਰਿਆ ਵਿੱਚ ਖਾਮੀਆਂ ਪਾਈਆਂ ਤੇ ਇਹ ਵੀ ਪਾਇਆ ਕਿ ਇਸ ਦੌਰਾਨ ਕੁੱਝ ਡਿਵੈਲਪਰਜ਼ ਦਾ ਪੱਖ ਪੂਰਿਆ ਗਿਆ ਹੈ। ਜਨਤਾ ਵੱਲੋਂ ਰੌਲਾ ਪਾਏ ਜਾਣ ਤੋਂ ਬਾਅਦ ਪ੍ਰੀਮੀਅਰ ਡੱਗ ਫੋਰਡ ਨੇ ਗ੍ਰੀਨਬੈਲਟ ਤੋਂ ਜ਼ਮੀਨ ਲੈ ਕੇ ਘਰ ਬਣਾਉਣ ਦਾ ਵਿਚਾਰ ਤਿਆਗ ਦਿੱਤਾ। ਮਾਮਲਾ ਐਨਾ ਗਰਮਾਇਆ ਕਿ ਤਤਕਾਲੀ ਹਾਊਸਿੰਗ ਮੰਤਰੀ ਤੇ ਇੱਕ ਹੋਰ ਕੈਬਨਿਟ ਮੰਤਰੀ ਨੂੰ ਅਸਤੀਫਾ ਦੇਣਾ ਪਿਆ। ਆਰਸੀਐਮਪੀ ਵੱਲੋਂ ਵੀ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਕਲੈਂਡਰਾ ਨੇ ਪਿਛਲੇ ਮਹੀਨੇ ਐਲਾਨ ਕੀਤਾ ਸੀ ਕਿ ਹੁਣ ਪ੍ਰੋਵਿੰਸ ਘਰਾਂ ਦੇ ਨਿਰਮਾਣ ਲਈ ਰੀਜਨਜ਼ ਤੇ ਮਿਊਂਸਪੈਲਿਟੀਜ਼ ਦੀ ਜ਼ਮੀਨ ਦਾ ਪਸਾਰ ਨਹੀਂ ਕਰੇਗੀ। ਕਲੈਂਡਰਾ ਨੇ ਆਖਿਆ ਕਿ ਨਵੇਂ ਘਰਾਂ ਦੇ ਨਿਰਮਾਣ ਲਈ ਉਨ੍ਹਾਂ ਵੱਲੋਂ ਨਵੇਂ ਆਈਡਿਆਜ਼ ਦਾ ਸਵਾਗਤ ਕੀਤਾ ਜਾਵੇਗਾ।