ਓਨਟਾਰੀਓ, 15 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਲੇਬਰ ਮੰਤਰੀ ਵੱਲੋਂ ਇੱਕ ਬਹੁਤ ਹੀ ਵੱਡੀ ਸਮੱਸਿਆ ਨੂੰ ਹੱਲ ਕਰਨ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ।
ਮੌਂਟੀ ਮੈਕਨੌਟਨ ਵੱਲੋਂ ਬੁੱਧਵਾਰ ਨੂੰ ਇਹ ਪ੍ਰਸਤਾਵ ਪੇਸ਼ ਕੀਤਾ ਜਾਵੇਗਾ ਕਿ ਕੰਸਟ੍ਰਕਸ਼ਨ ਵਾਲੀਆਂ ਸਾਈਟਸ ਉੱਤੇ ਬਾਥਰੂਮਜ਼ ਦੇ ਸਬੰਧ ਵਿੱਚ ਨਿਯਮਾਂ ਵਿੱਚ ਸੋਧ ਕੀਤੀ ਜਾਵੇ ਤੇ ਇਨ੍ਹਾਂ ਨੂੰ ਸਾਫ ਸੁਥਰਾ, ਸੇਫ ਰੱਖਣ ਵੱਲ ਵਧੇਰੇ ਧਿਆਨ ਦਿੱਤਾ ਜਾਵੇ। ਇਸ ਦੇ ਨਾਲ ਹੀ ਕੁੱਝ ਬਾਥਰੂਮ ਸਿਰਫ ਮਹਿਲਾਵਾਂ ਲਈ ਹੀ ਤਿਆਰ ਕੀਤੇ ਜਾਣ। ਲੇਬਰ ਮੰਤਰਾਲੇ ਵੱਲੋਂ ਪਿਛਲੇ ਮਹੀਨੇ ਬਾਥਰੂਮ ਦੀ ਜਾਂਚ ਕਰਨ ਦੀ ਚਲਾਈ ਗਈ ਮੁਹਿੰਮ ਤਹਿਤ 1800 ਕੰਸਟ੍ਰਕਸ਼ਨ ਸਾਈਟਸ ਦਾ ਮੁਆਇਨਾ ਕੀਤਾ ਗਿਆ ਤੇ ਇਸ ਦੌਰਾਨ 244 ਉਲੰਘਣਾਵਾਂ ਪਾਈਆਂ ਗਈਆਂ। ਇਨ੍ਹਾਂ ਵਿੱਚ ਸੱਭ ਤੋਂ ਵੱਡੀ ਗੜਬੜ ਤਾਂ ਟੁਆਇਲੈਟਸ ਮੁਹੱਈਆ ਨਾ ਕਰਵਾਉਣਾ ਸੀ ਤੇ ਦੂਜਾ ਪ੍ਰਾਈਵੇਸੀ ਦੀ ਘਾਟ ਪਾਈ ਗਈ ਤੇ ਸਾਫ ਸਫਾਈ ਦੀ ਕਮੀ ਵੀ ਮਹਿਸੂਸ ਕੀਤੀ ਗਈ।
ਇੱਕ ਇੰਟਰਵਿਊ ਵਿੱਚ ਮੈਕਨੌਟਨ ਨੇ ਆਖਿਆ ਕਿ ਹੋਰ ਕਿਸ ਇੰਡਸਟਰੀ ਵਿੱਚ ਇਸ ਤਰ੍ਹਾਂ ਦੀਆਂ ਕਮੀਆਂ ਨੂੰ ਸਵੀਕਾਰਿਆ ਜਾਂਦਾ ਹੈ? ਉਨ੍ਹਾਂ ਆਖਿਆ ਕਿ ਕੰਸਟ੍ਰਕਸ਼ਨ ਸਾਈਟਸ ਉੱਤੇ ਕੰਮ ਕਰਨ ਵਾਲੇ ਪੁਰਸ਼ ਤੇ ਮਹਿਲਾਵਾਂ ਕੋਈ ਜਾਨਵਰ ਤਾਂ ਨਹੀਂ ਹੁੰਦੇ ਤੇ ਇਹ ਜ਼ਰੂਰੀ ਹੈ ਕਿ ਉਨ੍ਹਾਂ ਨੂੰ ਬਣਦਾ ਸਨਮਾਨ ਦਿੱਤਾ ਜਾਵੇ। ਸਾਨੂੰ ਇਹ ਯਕੀਨੀ ਬਣਾਉਣਾ ਹੋਵੇਗਾ ਕਿ ਅਜਿਹੀਆਂ ਥਾਂਵਾਂ ਉੱਤੇ ਪੁਰਸ਼ਾਂ ਤੇ ਮਹਿਲਾਵਾਂ ਲਈ ਸਾਰੀਆਂ ਫੈਸਿਲਿਟੀਜ਼ ਹੋਣੀਆਂ ਚਾਹੀਦੀਆਂ ਹਨ।