ਟੋਰਾਂਟੋ, 14 ਮਾਰਚ (ਪੋਸਟ ਬਿਊਰੋ) : ਕੈਨੇਡਾ ਦੇ ਟਰਾਂਸਪੋਰਟੇਸ਼ਨ ਮੰਤਰੀ ਓਮਰ ਅਲਘਬਰਾ ਵੱਲੋਂ ਅੱਜ ਮਿਸੀਸਾਗਾ, ਂਓਨਟਾਰੀਓ ਵਿੱਚ ਵਿਸ਼ੇਸ਼ ਐਲਾਨ ਕੀਤਾ ਜਾਵੇਗਾ। ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਐਲਾਨ ਨਾਲ ਕੈਨੇਡੀਅਨ ਏਅਰ ਪੈਸੈਂਜਰਜ਼ ਨੂੰ ਫਾਇਦਾ ਹੋਵੇਗਾ।
ਅਲਘਬਰਾ ਵੱਲੋਂ ਇਹ ਐਲਾਨ ਟੋਰਾਂਟੋ ਦੇ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਦੇ ਟਰਮੀਨਲ 1 ਉੱਤੇ ਸਵੇਰੇ 10:00 ਵਜੇ ਕੀਤਾ ਜਾਵੇਗਾ।ਇਸ ਐਲਾਨ ਸਮੇਂ ਅਲਘਬਰਾ ਦੇ ਨਾਲ ਮਿਸੀਸਾਗਾ-ਸਟਰੀਟਸਵਿੱਲ ਤੋਂ ਐਮਪੀ ਰੇਚੀ ਵਾਲਡੇਜ਼ ਤੇ ਬਰੈਂਪਟਨ ਸੈਂਟਰ ਤੋਂ ਐਮਪੀ ਸ਼ਫਕਤ ਅਲੀ ਵੀ ਹਾਜ਼ਰ ਹੋਣਗੇ। ਸੋਮਵਾਰ ਨੂੰ ਜਾਰੀ ਕੀਤੀ ਗਈ ਇੱਕ ਰਲੀਜ਼ ਅਨੁਸਾਰ ਇਸ ਐਲਾਨ ਤੋਂ ਬਾਅਦ ਤਿੰਨਾਂ ਸਿਆਸਤਦਾਨਾਂ ਵੱਲੋਂ ਮੀਡੀਆ ਦੇ ਸਵਾਲਾਂ ਦੇ ਜਵਾਬ ਦਿੱਤੇ ਜਾਣਗੇ।
ਹਾਲੀਡੇਅ ਸੀਜ਼ਨ ਤੋਂ ਬਾਅਦ ਹਜ਼ਾਰਾਂ ਦੀ ਗਿਣਤੀ ਵਿੱਚ ਕੈਨੇਡੀਅਨ ਟਰੈਵਲਰਜ਼ ਨੂੰ ਹੋਈ ਦੇਰ ਜਾਂ ਉਨ੍ਹਾਂ ਦੇ ਵੱਖ ਵੱਖ ਥਾਂਵਾਂ ਉੱਤੇ ਫਸ ਜਾਣ ਤੋਂ ਬਾਅਦ ਹਾਊਸ ਟਰਾਂਸਪੋਰਟ ਕਮੇਟੀ ਦੀ ਸੁਣਵਾਈ ਸਮੇਂ ਪਿਛਲੇ ਮਹੀਨੇ ਮੰਤਰੀ ਨੇ ਆਖਿਆ ਸੀ ਕਿ ਕੈਨੇਡਾ ਦੀਆਂ ਏਅਰਲਾਈਨ ਪ੍ਰੋਟੋਕਾਲਜ਼ ਦਾ ਮੁਲਾਂਕਣ ਕੀਤੇ ਜਾਣ ਦੀ ਲੋੜ ਹੈ। ਡਿਪਾਰਟਮੈਂਟਲ ਅਧਿਕਾਰੀਆਂ ਦੇ ਪੈਨਲ ਨਾਲ ਕਮੇਟੀ ਸਾਹਮਣੇ ਸੁਣਵਾਈ ਦੌਰਾਨ ਅਲਘਬਰਾ ਨੇ ਆਖਿਆ ਸੀ ਕਿ ਜੋ ਕੁੱਝ ਵਾਪਰਿਆ ਉਸ ਦੀ ਪਹਿਲਾਂ ਹੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਫੈਡਰਲ ਸਰਕਾਰ ਇਸ ਜਾਂਚ ਦੇ ਨਤੀਜਿਆਂ ਤੋਂ ਬਾਅਦ ਕਾਰਵਾਈ ਕਰੇਗੀ।