ਨਵੀਂ ਦਿੱਲੀ, 11 ਮਾਰਚ (ਪੋਸਟ ਬਿਊਰੋ): ਹੋਲੀ ਦੇ ਦਿਨ ਦਿੱਲੀ ਵਿੱਚ ਇੱਕ ਜਾਪਾਨੀ ਔਰਤ ਨਾਲ ਕੁਝ ਲੜਕਿਆਂ ਵੱਲੋਂ ਜਬਰਦਸਤੀ ਕੀਤੇ ਜਾਣ ਦੀ ਵੀਡੀਓ ਸਾਹਮਣੇ ਆਈ ਹੈ। ਇਸ ਵੀਡੀਓ ‘ਚ ਕੁਝ ਲੜਕੇ ਜਾਪਾਨੀ ਔਰਤ ਨੂੰ ਜਬਰਦਸਤੀ ਰੰਗ ਲਗਾਉਂਦੇ ਨਜ਼ਰ ਆ ਰਹੇ ਹਨ। ਇਸ ਵੀਡੀਓ ਦੇ ਸਾਹਮਣੇ ਆਉਣ ਤੋਂ ਬਾਅਦ ਸੋਸ਼ਲ ਮੀਡੀਆ ’ਤੇ ਪੀੜਤ ਔਰਤ ਨੂੰ ਇਨਸਾਫ਼ ਦਿਵਾਉਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਹੁਣ ਇਸ ਸਭ ਦੇ ਵਿਚਕਾਰ ਪੀੜਤ ਜਾਪਾਨੀ ਔਰਤ ਨੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਹਾਲਾਂਕਿ ਅਜੇ ਤੱਕ ਇਸ ਮਾਮਲੇ ਸਬੰਧੀ ਪੀੜਤ ਵੱਲੋਂ ਪੁਲਿਸ ਨੂੰ ਕੋਈ ਸ਼ਿਕਾਇਤ ਨਹੀਂ ਦਿੱਤੀ ਗਈ ਹੈ। ਪਰ ਪੁਲਿਸ ਵਾਇਰਲ ਵੀਡੀਓ ਦੇ ਆਧਾਰ ‘ਤੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਭਾਰਤ ਛੱਡਣ ਤੋਂ ਬਾਅਦ ਪੀੜਤਾ ਨੇ ਘਟਨਾ ‘ਤੇ ਆਪਣੀ ਪ੍ਰਤੀਕਿਰਿਆ ‘ਚ ਕਿਹਾ ਕਿ ਉਸ ਦਿਨ ਜੋ ਹੋਇਆ ਉਹ ਬਹੁਤ ਮੰਦਭਾਗਾ ਸੀ। ਮੈਂ ਸੁਣਿਆ ਸੀ ਕਿ ਹੋਲੀ ‘ਤੇ ਔਰਤਾਂ ਦਾ ਇਕੱਲੇ ਬਾਹਰ ਜਾਣਾ ਬਹੁਤ ਖਤਰਨਾਕ ਹੁੰਦਾ ਹੈ। ਇਸ ਕਰਕੇ ਮੈਂ ਆਪਣੇ 35 ਦੋਸਤਾਂ ਨਾਲ ਹੋਲੀ ਦੇ ਜਸਨ ਵਿੱਚ ਹਿੱਸਾ ਲਿਆ ਸੀ। ਪਰ ਫਿਰ ਵੀ ਇਹ ਮੇਰੇ ਨਾਲ ਹੋਇਆ।
ਪੀੜਤਾ ਨੇ ਅੱਗੇ ਲਿਖਿਆ ਕਿ ਮੈਨੂੰ ਭਾਰਤ ਦੀ ਹਰ ਚੀਜ ਪਸੰਦ ਹੈ, ਇਸੇ ਲਈ ਮੈਂ ਇੱਥੇ ਤਿੰਨ ਵਾਰ ਆਈ ਹਾਂ। ਭਾਰਤ ਅਤੇ ਜਾਪਾਨ ਹਮੇਸਾ ਦੋਸਤ ਰਹਿਣਗੇ। ਔਰਤ ਨੇ ਲਿਖਿਆ ਕਿ ਜਿਵੇਂ ਹੀ ਮੈਂ 9 ਮਾਰਚ ਨੂੰ ਉਸ ਘਟਨਾ ਬਾਰੇ ਟਵੀਟ ਕੀਤਾ, ਮੈਨੂੰ ਵੱਡੀ ਗਿਣਤੀ ਵਿੱਚ ਲੋਕਾਂ ਵੱਲੋਂ ਰੀਟਵੀਟ ਅਤੇ ਡੀਐਮ ਮਿਲਣੇ ਸੁਰੂ ਹੋ ਗਏ। ਇਸ ਤੋਂ ਬਾਅਦ ਮੈਂ ਉਸ ਟਵੀਟ ਨੂੰ ਖੁਦ ਡਿਲੀਟ ਕਰ ਦਿੱਤਾ।