ਓਨਟਾਰੀਓ, 30 ਜਨਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਗ੍ਰੀਨ ਪਾਰਟੀ ਦੇ ਆਗੂ ਮਾਈਕ ਸ਼ਰੇਨਰ ਨੇ ਓਨਟਾਰੀਓ ਦੀ ਲਿਬਰਲ ਪਾਰਟੀ ਦੀ ਲੀਡਰਸਿ਼ਪ ਦੌੜ ਵਿੱਚ ਖੜ੍ਹੇ ਹੋਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਹੈ।
ਚੋਣਾਂ ਵਿੱਚ ਘਾਟਾ ਪੈਣ ਤੋਂ ਬਾਅਦ ਪਿਛਲੇ ਸਾਲ ਸਟੀਵਨ ਡੈਲ ਡੂਕਾ ਵੱਲੋਂ ਅਹੁਦਾ ਛੱਡ ਦਿੱਤੇ ਜਾਣ ਮਗਰੋਂ ਲਿਬਰਲਾਂ ਕੋਲ ਕੋਈ ਪਰਮਾਨੈਂਟ ਲੀਡਰ ਨਹੀਂ ਹੈ। ਕਈ ਲਿਬਰਲ ਇਸ ਦੌੜ ਵਿੱਚ ਹਿੱਸਾ ਲੈਣ ਦੇ ਚਾਹਵਾਨ ਹਨ। ਇਨ੍ਹਾਂ ਵਿੱਚ ਐਮਪੀ ਤੇ ਓਨਟਾਰੀਓ ਦੇ ਸਾਬਕਾ ਕੈਬਨਿਟ ਮੰਤਰੀ ਯਾਸਿਰ ਨਕਵੀ, ਐਮਪੀ ਨਥਾਨੀਅਲ ਅਰਸਕੀਨ-ਸਮਿੱਥ ਤੇ ਓਨਟਾਰੀਓ ਦੀ ਲਿਬਰਲ ਕਾਕਸ ਦੇ ਮੌਜੂਦਾ ਮੈਂਬਰ ਟੈੱਡ ਸੂ ਸ਼ਾਮਲ ਹਨ।
ਪਰ ਲਿਬਰਲਾਂ ਦੇ ਇੱਕ ਗਰੁੱਪ, ਜਿਸ ਵਿੱਚ ਸਾਬਕਾ ਕੈਬਨਿਟ ਮੰਤਰੀ ਡੈੱਬ ਮੈਥਿਊਜ਼ ਤੇ ਲਿਜ਼ ਸੈਂਡਲਜ਼ ਸ਼ਾਮਲ ਹਨ, ਵੱਲੋਂ ਐਤਵਾਰ ਨੂੰ ਇੱਕ ਪੱਤਰ ਜਾਰੀ ਕਰਕੇ ਸ਼ਰੇਨਰ ਨੂੰ ਪਾਰਟੀ ਵਿੱਚ ਸ਼ਾਮਲ ਹੋਣ ਤੇ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਦਾ ਸੱਦਾ ਦਿੱਤਾ ਗਿਆ। ਜਵਾਬ ਵਿੱਚ ਸ਼ਰੇਨਰ ਨੇ ਆਖਿਆ ਕਿ ਉਹ ਇਸ ਬਾਰੇ ਸੋਚਣ ਲਈ ਕੁੱਝ ਸਮਾਂ ਚਾਹੁੰਦੇ ਹਨ।