ਨਵੀਂ ਦਿੱਲੀ, 23 ਮਈ (ਪੋਸਟ ਬਿਊਰੋ)- ਦੱਖਣੀ ਦਿੱਲੀ ਦੇ ਵਸੰਤ ਵਿਹਾਰ ਦਾ ਇੱਕ ਫਲੈਟ ਗੈਸ ਚੈਂਬਰ ਵਿੱਚ ਬਦਲ ਕੇ ਇੱਕ ਪੰਜਾਹ ਸਾਲ ਦੀ ਔਰਤ ਨੇ ਆਪਣੀਆਂ ਦੋ ਧੀਆਂ ਸਣੇ ਖੁਦਕੁਸ਼ੀ ਕਰ ਲਈ। ਸੂਚਨਾ ਮਿਲਣ ਮਗਰੋਂ ਮੌਕੇ ਉੱਤੇਗਈ ਦਿੱਲੀ ਪੁਲਸ ਨੇ ਮਾਂ ਮੰਜੂ ਤੇ ਉਸ ਦੀਆਂ ਦੋ ਧੀਆਂ ਅੰਸ਼ਿਕਾ ਤੇ ਅੰਕੂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ। ਇਸ ਦੌਰਾਨ ਪੁਲਸ ਨੇ ਫਲੈਟ ਦੀ ਕੰਧ ਉੱਤੇ ਚਿਪਕਿਆ ਇੱਕ ਖੁਦਕੁਸ਼ੀ ਨੋਟ ਵੀ ਬਰਾਮਦ ਕੀਤਾ ਹੈ।
ਪੁਲਸ ਮੁਤਾਬਕ ਸਾਰੇ ਦਰਵਾਜ਼ੇ, ਖਿੜਕੀਆਂ ਤੇ ਵੈਂਟੀਲੇਟਰ ਪੋਲੀਥੀਨ ਨਾਲ ਭਰੇ ਹੋਏ ਸਨ, ਰਸੋਈ ਗੈਸ ਚਾਲੂ ਕੀਤੀ ਹੋਈ ਸੀ ਅਤੇ ਕੋਲੇ ਦੀ ਅੰਗੀਠੀ ਬਲ ਰਹੀ ਸੀ, ਜਿਸ ਕਾਰਨ ਕਮਰੇ ਵਿੱਚ ਜ਼ਹਿਰੀਲੀ ਕਾਰਬਨ-ਮੋਨੋਆਕਸਾਈਡ ਗੈਸ ਇਕੱਠੀ ਹੋ ਗਈ ਅਤੇ ਤਿੰਨਾਂ ਦੀ ਮੌਤ ਹੋ ਗਈ। ਪੁਲਸ ਜਦੋਂ ਫਲੈਟ ਵਿੱਚ ਗਈ ਤਾਂ ਤਿੰਨੇ ਲਾਸ਼ਾਂ ਇੱਕ ਬੈਡਰੂਮ ਵਿੱਚ ਪਈਆਂ ਸਨ, ਜਿਨ੍ਹਾਂ ਕੋਲ ਕੋਲੇ ਦੀ ਅੱਗ ਭਖ ਰਹੀ ਸੀ। ਖੁਦਕੁਸ਼ੀ ਨੋਟ ਵਿੱਚ ਫਲੈਟ ਵਿੱਚਆਉਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਸਪੱਸ਼ਟ ਹਦਾਇਤਾਂ ਦਿੱਤੀਆਂ ਗਈਆਂ ਸਨ ਕਿ ਉਹ ਮਾਚਿਸ਼ ਨਾ ਜਗਾਉਣ, ਕਿਉਂਕਿ ਇਸ ਤੋਂ ਅੱਗ ਲੱਗ ਸਕਦੀ ਹੈ। ਅੰਗਰੇਜ਼ੀ ਵਿੱਚ ਲਿਖੇ ਖੁਦਕੁਸ਼ੀ ਨੋਟ ਵਿੱਚ ਲਿਖਿਆ ਸੀ, ‘ਬਹੁਤ ਖਤਰਨਾਕ ਗੈਸ ਕਾਰਬਨ ਮੋਨੋਆਕਸਾਈਡ ਅੰਦਰ, ਇਹ ਜਲਣਸ਼ੀਲ ਹੈ। ਕ੍ਰਿਪਾ ਕਰ ਕੇ ਖਿੜਕੀ ਖੋਲ੍ਹ ਕੇ ਅਤੇ ਪੱਖਾ ਚਲਾ ਕੇ ਇਸ ਨੂੰ ਹਵਾਦਾਰ ਕਰੋ। ਮਾਚਿਸ਼, ਮੋਮਬੱਤੀ ਜਾਂ ਕਿਸੇ ਚੀਜ਼ ਦੀ ਰੋਸ਼ਨੀ ਨਾ ਕਰੋ। ਪਰਦਾ ਹਟਾਉਣ ਵੇਲੇ ਸਾਵਧਾਨ ਰਹੋ ਕਿਉਂਕਿ ਕਮਰਾ ਖਤਰਨਾਕ ਗੈਸ ਨਾਲ ਭਰਿਆ ਹੋਇਆ ਹੈ। ਸਾਹ ਨਾ ਲਓ।''
ਗੁਆਂਢੀਆਂ ਨੇ ਪੁਲਸ ਨੂੰ ਦੱਸਿਆ ਕਿ ਔਰਤ ਦੇ ਪਤੀ ਦੀ ਪਿਛਲੇ ਸਾਲ ਕੋਰੋਨਾ ਕਾਰਨ ਮੌਤ ਹੋ ਗਈ ਸੀ ਅਤੇ ਪਰਵਾਰ ਉਦੋਂ ਤੋਂ ਪ੍ਰੇਸ਼ਾਨ ਸੀ। ਪੁਲਸ ਨੂੰ ਪਤਾ ਲੱਗਾ ਕਿ ਔਰਤ ਬਿਮਾਰ ਅਤੇ ਲੰਬੇ ਸਮੇਂ ਤੋਂ ਮੰਜੇ ਉੱਤੇ ਸੀ। ਨਿਗਮ ਦੇ ਕੌਂਸਲਰ ਤੇ ਗੁਆਂਢੀ ਮਨੀਸ਼ ਅਗਰਵਾਲ ਨੇ ਦੱਸਿਆ ਕਿ ਵਸੰਤ ਅਪਾਰਟਮੈਂਟਸ ਵਿੱਚ ਗਰਾਊਂਡ ਫਲੋਰ ਉਤੇ ਪਰਵਾਰ ਦੇ ਨਾਂਅ ਉੱਤੇ ਦੋ ਫਲੈਟ ਸਨ, ਪਰ ਕੁਝ ਦੇਰ ਪਹਿਲਾਂ ਇੱਕ ਫਲੈਟ ਖਾਲੀ ਹੋ ਗਿਆ ਸੀ।