ਨਵੀਂ ਦਿੱਲੀ, 16 ਮਈ (ਪੋਸਟ ਬਿਊਰੋ)- ਈ ਡੀ (ਇਨਫੋਰਸਮੈਂਟ ਡਾਇਰੈਕਟੋਰੇਟ) ਨੇ ਮਨੀ ਲਾਂਡਰਿੰਗ ਦੇ ਦੋਸ਼ ਵਿੱਚ ਛੇ ਬੰਗਲਾਦੇਸ਼ੀ ਨਾਗਰਿਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਜਾਅਲੀ ਪਛਾਣ ਪੱਤਰ ਦੇਨਾਲ ਭਾਰਤ ਵਿੱਚ ਲੁਕ ਕੇ ਰਹਿੰਦੇ ਸਨ। ਗ੍ਰਿਫਤਾਰ ਲੋਕਾਂ ਵਿੱਚ ਗੈਂਗ ਦਾ ਸਰਗਣਾ ਪ੍ਰਸ਼ਾਂਤ ਕੁਮਾਰ ਹਲਦਰ ਵੀ ਹੈ। ਉਸ ਉੱਤੇ ਬੰਗਲਾ ਦੇਸ਼ ਵਿੱਚ ਬੈਂਕ ਨਾਲ ਧੋਖਾਧੜੀ ਕਰਨ ਦਾ ਦੋਸ਼ ਹੈ। ਪ੍ਰਸ਼ਾਂਤ ਫਰਜ਼ੀ ਨਾਂਅ ਸ਼ਿਵ ਸ਼ੰਕਰ ਹਲਦਰ ਦੀ ਵਰਤੋਂ ਕਰਦਾ ਸੀ।
ਇੰਟਰਪੋਲ ਨੇ ਪ੍ਰਸ਼ਾਂਤ ਕੁਮਾਰ ਹਲਦਰਦੇ ਖਿਲਾਫ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤਾ ਸੀ। ਜਾਂਚ ਏਜੰਸੀ ਮੁਤਾਬਕ ਉਸ ਕੋਲ ਬੰਗਲਾਦੇਸ਼ੀ ਤੇ ਭਾਰਤੀ ਪਾਸਪੋਰਟ ਹਨ। ਇਹੀ ਨਹੀਂ, ਉਸ ਨੇ ਇੱਕ ਪਾਸਪੋਰਟ ਕੈਰੇਬੀਆਈ ਦੇਸ਼ ਗ੍ਰੇਨਾਡਾ ਤੋਂ ਬਣਾਇਆ ਹੋਇਆ ਸੀ। ਸਰਗਣੇ ਦੇ ਨਾਲ ਸਵਪਨ ਮੈਤਰਾ ਉਰਫ ਸਵਪਨ ਮਿਸਤਰੀ, ਉਤਮ ਮੈਤਰਾ ਉਰਫ ਉਤਮ ਮਿਸਤਰੀ, ਇਮਾਮ ਹੁਸੈਨ ਉਰਫ ਇਮਾਨ ਹਲਦਰ, ਆਮਨਾ ਸੁਲਤਾਨਾ ਉਰਫ ਸ਼ਰਮੀ ਹਲਦਰ ਅਤੇ ਪ੍ਰਨੇਸ਼ ਕੁਮਾਰ ਹਲਦਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਬੰਗਾਲ ਵਿੱਚ ਬੰਗਲਾਦੇਸ਼ੀ ਨਾਗਰਿਕ ਪ੍ਰਸ਼ਾਂਤ ਕੁਮਾਰ ਹਲਦਰ, ਪ੍ਰੀਤਿਸ਼ ਕੁਮਾਰ ਹਲਦਰ ਅਤੇ ਉਸ ਦੇ ਭਾਈਵਾਲਾਂ ਦੇ 11 ਟਿਕਾਣਿਆਂ ਉੱਤੇ ਛਾਪੇਮਾਰੀ ਕੀਤੀ ਗਈ। ਈ ਡੀ ਮੁਤਾਬਕ ਪ੍ਰਸ਼ਾਂਤ ਕੁਮਾਰ ਹਲਦਰ ਭਾਰਤੀ ਨਾਗਰਿਕ ਵਜੋਂ ਸ਼ਿਵ ਸ਼ੰਕਰ ਹਲਦਰ ਦੇ ਨਾਂਅ ਨਾਲ ਲੁਕ ਕੇ ਰਹਿ ਰਿਹਾ ਸੀ। ਜਾਂਚ ਮੁਤਾਬਕ ਪ੍ਰਸ਼ਾਂਤ ਤੇ ਉਸ ਦੇ ਭਾਈਵਾਲਾਂ ਨੇ ਫਰਜ਼ੀਵਾੜਾ ਕਰ ਕੇ ਬੰਗਾਲ ਤੋਂ ਰਾਸ਼ਨ ਕਾਰਡ, ਵੋਟਰ ਕਾਰਡ, ਪੈਨ ਕਾਰਡ ਤੇ ਆਧਾਰ ਕਾਰਡ ਹਾਸਲ ਕੀਤਾ ਸੀ। ਦੱਸਿਆ ਗਿਆ ਹੈ ਕਿ ਇਨ੍ਹਾਂ ਨੇ ਜਾਅਲੀ ਪਛਾਣ ਪੱਤਰਾਂ ਨਾਲ ਭਾਰਤ ਵਿੱਚ ਇੱਕ ਕੰਪਨੀ ਸ਼ੁਰੂ ਕਰਨ ਦੇ ਨਾਲ ਹੀ ਬੰਗਾਲ ਵਿੱਚ ਜਾਇਦਾਦ ਵੀ ਖਰੀਦੀ ਸੀ।