ਨਵੀਂ ਦਿੱਲੀ, 4 ਅਪਰੈਲ, (ਪੋਸਟ ਬਿਊਰੋ)-ਭਾਰਤ ਸਰਕਾਰ ਦੀਆਂ ਬਹੁਤ ਕੋਸ਼ਿਸ਼ਾਂ ਦੇ ਬਾਵਜੂਦ ਕੋਰੋਨਾ ਮਹਾਮਾਰੀ ਦੀ ਮਾਰ ਵਧਣ ਤੋਂ ਰੋਕਣ ਵਿਚ ਨਾਕਾਮੀ ਅਤੇ ਟੀਕਾਕਰਨ ਵਿਚ ਤੇਜ਼ੀ ਨਾ ਆਉਣ ਕਾਰਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਐਤਵਾਰ ਨੂੰ ਉੱਚ ਅਧਿਕਾਰੀਆਂ ਨਾਲ ਹਾਲਾਤ ਦੀ ਸਮੀਖਿਆ ਕੀਤੀ ਅਤੇ ਇਸ ਮੌਕੇ ਟੈਸਟਿੰਗ, ਟਰੇਸਿੰਗ, ਸਹੀ ਕੋਵਿਡ ਵਿਹਾਰ ਤੇ ਟੀਕਾਕਰਨ ਨੂੰ ਜ਼ਰੂਰੀਦੱਸਿਆ। ਇਸ ਮੌਕੇ ਵੱਧ ਕੇਸਾਂਤੇ ਵੱਧ ਮੌਤ ਦਰ ਵਾਲੇ ਰਾਜਾਂ ਮਹਾਰਾਸ਼ਟਰ, ਪੰਜਾਬ ਅਤੇ ਛੱਤੀਸਗੜ੍ਹ ਲਈ ਕੇਂਦਰੀ ਟੀਮਾਂ ਫੌਰੀ ਭੇਜਣ ਲਈ ਕਿਹਾ ਅਤੇ ਮਹਾਮਾਰੀ ਨਾਲ ਹੋਣ ਵਾਲੀਆਂ ਮੌਤਾਂ ਨੂੰ ਹਰ ਹਾਲਤ ਰੋਕਣ ਲਈ ਸਾਰੇ ਜ਼ਰੂਰੀ ਕਦਮ ਚੁੱਕਣ ਉੱਤੇ ਜ਼ੋਰ ਦਿੱਤਾ।
ਅੱਜ ਦੀ ਪ੍ਰਧਾਨ ਮੰਤਰੀ ਦੀ ਹਾਈ ਲੈਵਲ ਮੀਟਿੰਗ ਵਿਚ ਕੇਂਦਰੀ ਸਿਹਤ ਮੰਤਰਾਲੇ ਵੱਲੋਂ ਸਿਹਤ ਸੈਕਟਰੀ ਰਾਜੇਸ਼ ਭੂਸ਼ਣ ਨੇ ਕੋਰੋਨਾ ਵਿਰੋਧੀ ਵੈਕਸੀਨ ਦੀ ਮੌਜੂਦਗੀ, ਵੈਕਸੀਨ ਉਤਪਾਦਕਾਂ ਦੀ ਸਮਰੱਥਾ ਤੇ ਨਵੀਂ ਵੈਕਸੀਨ ਉੱਤੇ ਹੋ ਰਹੇ ਟਰਾਇਲਬਾਰੇ ਸਾਰੀ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਭਾਰਤ ਵਿਚ ਵੈਕਸੀਨ ਦੀ ਕੋਈ ਕਮੀ ਨਹੀਂ ਅਤੇ ਵੈਕਸੀਨ ਨਿਰਮਾਤਾ ਆਪਣੀ ਉਤਪਾਦਨ ਸਮਰੱਥਾ ਵਧਾਉਣ ਦੇ ਯਤਨ ਕਰ ਰਹੇ ਹਨ।
ਇਸ ਦੌਰਾਨ ਪੰਜਾਬ ਵਿਚ ਕੋਰੋਨਾ ਦੇ ਕੇਸਾਂ ਦਾ ਅੰਕੜਾ ਇਕੋ ਦਿਨ ਤਿੰਨ ਹਜ਼ਾਰ ਤੋਂ ਟੱਪ ਗਿਆ ਹੈ। ਐਤਵਾਰ ਪੰਜਾਬ ਵਿੱਚ ਕੋਰੋਨਾ ਦੇ 3019 ਨਵੇਂ ਕੇਸ ਮਿਲੇ ਤੇ 51 ਲੋਕਾਂ ਦੀ ਮੌਤ ਹੋ ਗਈ।ਅੰਮ੍ਰਿਤਸਰ ਵਿਚ 10, ਹੁਸ਼ਿਆਰਪੁਰ, ਜਲੰਧਰ, ਲੁਧਿਆਣਾ ਅਤੇ ਗੁਰਦਾਸਪੁਰ ਵਿਚ ਸੱਤ-ਸੱਤ, ਰੂਪਨਗਰ ਵਿਚ ਚਾਰ, ਮੋਹਾਲੀ ਅਤੇ ਪਟਿਆਲਾ ਵਿਚ ਤਿੰਨ-ਤਿੰਨ, ਤਰਨਤਾਰਨ ਵਿਚ ਦੋ ਤੇ ਬਠਿੰਡਾ ਵਿਚ ਕੋਰੋਨਾ ਨਾਲ ਮੌਤ ਹੋਈ ਹੈ। ਐਤਵਾਰ ਲੁਧਿਆਣਾ ਵਿਚ ਕੋਰੋਨਾ ਦੇ ਸਭ ਤੋਂ ਵੱਧ 466 ਕੇਸ, ਜਲੰਧਰ 387, ਮੋਹਾਲੀ 329, ਅੰਮ੍ਰਿਤਸਰ 271, ਪਟਿਆਲਾ 213, ਹੁਸ਼ਿਆਰਪੁਰ 172, ਬਠਿੰਡਾ 166, ਫ਼ਰੀਦਕੋਟ 152, ਰੂਪਨਗਰ 136, ਕਪੂਰਥਲਾ 135 ਅਤੇ ਗੁਰਦਾਸਪੁਰ ਵਿਚ 104 ਕੇਸ ਨਵੇਂ ਮਿਲੇ ਹਨ।