ਟੋਰਾਂਟੋ, 11 ਅਪ੍ਰੈਲ (ਪੋਸਟ ਬਿਊਰੋ) : ਜਨਰਲ ਮੋਟਰਜ਼ ਨੇ ਆਪਣੇ ਓਸ਼ਾਵਾ ਪਲਾਂਟ ਵਿੱਚ ਸੋਮਵਾਰ ਤੱਕ ਸਿ਼ਫਟਾਂ ਰੱਦ ਕਰ ਦਿੱਤੀਆਂ ਹਨ। ਅਸੈਂਬਲੀ ਪਲਾਂਟ ਦੇ ਮੁਲਾਜ਼ਮਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਯੂਨੀਫੋਰ, ਜੋ ਕਿ ਓਸ਼ਾਵਾ ਸਹੂਲਤ ਵਿੱਚ ਲਗਭਗ 3 ਹਜ਼ਾਰ ਮੁਲਾਜ਼ਮਾਂ ਦੀ ਨੁਮਾਇੰਦਗੀ ਕਰਦੀ ਹੈ, ਨੇ ਕਿਹਾ ਕਿ ਇਹ ਮੁੱਦਾ ਟ੍ਰਾਂਸਮਿਸ਼ਨ ਪਾਰਟਸ ਦੀ ਘਾਟ ਨਾਲ ਸਬੰਧਤ ਹੈ। ਯੂਨੀਫੋਰ ਨੇ ਬਿਆਨ ਵਿੱਚ ਕਿਹਾ ਕਿ ਜਨਰਲ ਮੋਟਰਜ਼ ਨੇ ਯੂਨੀਅਨ ਨੂੰ ਸੂਚਿਤ ਕੀਤਾ ਹੈ ਕਿ ਟੋਲੇਡੋ ਤੋਂ ਟ੍ਰਾਂਸਮਿਸ਼ਨ ਦੀ ਘਾਟ ਕਾਰਨ ਓਸ਼ਾਵਾ ਅਸੈਂਬਲੀ ਪਲਾਂਟ ਵਿੱਚ ਹਫ਼ਤੇ ਦੇ ਬਾਕੀ ਸਮੇਂ ਲਈ ਸ਼ਿਫਟਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਕੰਪਨੀ ਦੇ ਇੱਕ ਬਿਆਨ ਵਿੱਚ ਕਿਹਾ ਗਿਆ ਕਿ ਘਾਟ ਕਾਰਨ ਉਤਪਾਦਨ ਅਸਥਾਈ ਤੌਰ 'ਤੇ ਪ੍ਰਭਾਵਿਤ ਹੈ। ਕਿਹਾ ਗਿਆ ਕਿ ਉਹ ਇਸ ਮੁੱਦੇ ਨੂੰ ਹੱਲ ਕਰਨ ਅਤੇ ਨਿਯਮਤ ਕਾਰਜਾਂ 'ਤੇ ਵਾਪਸ ਆਉਣ ਲਈ ਕੰਮ ਕਰ ਰਹੇ ਜਨ।

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਟੈਰਿਫਾਂ ਦੇ ਓਨਟਾਰੀਓ ਦੇ ਆਟੋ ਨਿਰਮਾਣ ਉਦਯੋਗ ‘ਤੇ ਹੋਣ ਵਾਲੇ ਪ੍ਰਭਾਵ ਨੂੰ ਦੇਖਦਿਆਂ ਸ਼ਿਫ਼ਟਾਂ ਰੱਦ ਕਰਨ ਦਾ ਫ਼ੈਸਲਾ ਲਿਆ ਗਿਆ ਹੈ। ਪਿਛਲੇ ਹਫ਼ਤੇ, ਜੀਐਮ ਨੇ ਆਪਣੇ ਫੋਰਟ ਵੇਨ, ਇੰਡੀਆਨਾ ਦੇ ਅਸੈਂਬਲੀ ਪਲਾਂਟ ਵਿੱਚ ਅਸਥਾਈ ਮੁਲਾਜ਼ਮਾਂ ਦੀ ਇੱਕ ਅਣ-ਨਿਰਧਾਰਤ ਗਿਣਤੀ ਨੂੰ ਨਿਯੁਕਤ ਕਰਨ ਦੀਆਂ ਯੋਜਨਾਵਾਂ ਦਾ ਐਲਾਨ ਕੀਤਾ ਤਾਂ ਜੋ ਆਯਾਤ ਕੀਤੇ ਵਾਹਨਾਂ 'ਤੇ ਅਮਰੀਕੀ ਟੈਰਿਫ ਦੇ ਵਿਚਕਾਰ ਉਤਪਾਦਨ ਵਧਾਇਆ ਜਾ ਸਕੇ। ਫੋਰਟ ਵੇਨ ਵਿੱਚ ਜੀਐਮ ਸਹੂਲਤ ਜੀਐਮਸੀ ਸੀਅਰਾ ਟਰੱਕ ਅਤੇ ਸ਼ੈਵਰਲੇਟ ਸਿਲਵੇਰਾਡੋ ਦਾ ਨਿਰਮਾਣ ਕਰਦੀ ਹੈ, ਜੋ ਕਿ ਵਰਤਮਾਨ ਵਿੱਚ ਓਸ਼ਾਵਾ ਵਿੱਚ ਅਸੈਂਬਲੀ ਪਲਾਂਟ ਵਿੱਚ ਪੈਦਾ ਹੋਣ ਵਾਲਾ ਇੱਕੋ ਇੱਕ ਵਾਹਨ ਹੈ।