ਵਾਸਿ਼ੰਗਟਨ, 25 ਮਾਰਚ (ਪੋਸਟ ਬਿਊਰੋ): ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਜੇਡੀ ਵੈਂਸ ਦੀ ਪਤਨੀ ਊਸ਼ਾ ਵੈਂਸ 27 ਮਾਰਚ ਤੋਂ 29 ਮਾਰਚ ਤੱਕ ਗ੍ਰੀਨਲੈਂਡ ਦੀ ਯਾਤਰਾ 'ਤੇ ਜਾਣ ਵਾਲੇ ਹਨ, ਪਰ ਉਨ੍ਹਾਂ ਦੀ ਯਾਤਰਾ ਤੋਂ ਪਹਿਲਾਂ ਇੱਕ ਨਵਾਂ ਵਿਵਾਦ ਖੜ੍ਹਾ ਹੋ ਗਿਆ ਹੈ।
ਗ੍ਰੀਨਲੈਂਡ ਦੇ ਪ੍ਰਧਾਨ ਮੰਤਰੀ ਮਿਯੂਟ ਏਗੇਡੇ ਨੇ ਊਸ਼ਾ ਵੈਂਸ ਦੀ ਫੇਰੀ ਦਾ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ। ਉਨ੍ਹਾਂ ਨੇ ਇਸ ਹਾਈ ਪ੍ਰੋਫਾਈਲ ਦੌਰੇ ਨੂੰ ਉਕਸਾਵਾ ਦੱਸਿਆ ਹੈ।
ਏਗੇਡੇ ਨੇ ਕਿਹਾ ਕਿ ਅਮਰੀਕਾ ਨਾਲ ਹੋਏ ਸੌਦੇ ਕਾਰਨ, ਊਸ਼ਾ ਵੈਂਸ ਦੇ ਗ੍ਰੀਨਲੈਂਡ ਵਿੱਚ ਅਮਰੀਕੀ ਫੌਜੀ ਅੱਡੇ ਦੇ ਦੌਰੇ ਨੂੰ ਰੋਕਣਾ ਸੰਭਵ ਨਹੀਂ ਹੈ, ਪਰ ਅੰਤਰਿਮ ਸਰਕਾਰ ਅਮਰੀਕੀ ਵਫ਼ਦ ਨੂੰ ਨਹੀਂ ਮਿਲੇਗੀ।
ਅਮਰੀਕਾ ਦੇ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਮਾਈਕ ਵਾਲਟਜ਼ ਅਤੇ ਊਰਜਾ ਸਕੱਤਰ ਕ੍ਰਿਸ ਰਾਈਟ ਊਸ਼ਾ ਵੈਂਸ ਦੇ ਨਾਲ ਗ੍ਰੀਨਲੈਂਡ ਪਹੁੰਚਣਗੇ। ਇਸ ਫੇਰੀ ਤੋਂ ਦੋ ਮਹੀਨੇ ਪਹਿਲਾਂ, ਰਾਸ਼ਟਰਪਤੀ ਟਰੰਪ ਦੇ ਵੱਡੇ ਪੁੱਤਰ ਡੋਨਾਲਡ ਟਰੰਪ ਜੂਨੀਅਰ ਨੇ ਵੀ ਗ੍ਰੀਨਲੈਂਡ ਦਾ ਦੌਰਾ ਕੀਤਾ ਸੀ, ਉਸ ਸਮੇਂ ਉਸ ਫੇਰੀ ਨੂੰ ਇੱਕ ਨਿੱਜੀ ਫੇਰੀ ਦੱਸਿਆ ਗਿਆ ਸੀ।
ਆਪਣੀ ਯਾਤਰਾ ਤੋਂ ਪਹਿਲਾਂ, ਊਸ਼ਾ ਵੈਂਸ ਨੇ ਇੱਕ ਵੀਡੀਓ ਸੰਦੇਸ਼ ਸਾਂਝਾ ਕੀਤਾ। ਉਨ੍ਹਾਂ ਕਿਹਾ ਕਿ ਗ੍ਰੀਨਲੈਂਡ ਦੀ ਉਨ੍ਹਾਂ ਦੀ ਫੇਰੀ ਦਾ ਉਦੇਸ਼ ਦੋਨਾਂ ਦੇਸ਼ਾਂ ਵਿਚਕਾਰ ਆਪਸੀ ਸਤਿਕਾਰ ਅਤੇ ਸਹਿਯੋਗ ਦੇ ਲੰਬੇ ਇਤਿਹਾਸ ਦਾ ਜਸ਼ਨ ਮਨਾਉਣਾ ਸੀ।
ਵ੍ਹਾਈਟ ਹਾਊਸ ਦੇ ਬੁਲਾਰੇ ਬ੍ਰਾਇਨ ਹਿਊਜ਼ ਨੇ ਕਿਹਾ ਕਿ ਇਸ ਫੇਰੀ ਦਾ ਉਦੇਸ਼ ਇੱਕ ਅਜਿਹੀ ਭਾਈਵਾਲੀ ਬਣਾਉਣਾ ਹੈ ਜੋ ਗ੍ਰੀਨਲੈਂਡ ਦੇ ਸਵੈ-ਨਿਰਣੇ ਦਾ ਸਤਿਕਾਰ ਕਰੇ ਅਤੇ ਆਰਥਿਕ ਸਹਿਯੋਗ ਨੂੰ ਉਤਸ਼ਾਹਿਤ ਕਰੇ।
ਰਾਈਟਰਜ਼ ਅਨੁਸਾਰ, ਅਮਰੀਕਾ ਪਹਿਲਾਂ ਹੀ ਦੋ ਅਮਰੀਕੀ ਹਰਕਿਊਲਿਸ ਫੌਜੀ ਟਰਾਂਸਪੋਰਟ ਜਹਾਜ਼ ਗ੍ਰੀਨਲੈਂਡ ਭੇਜ ਚੁੱਕਾ ਹੈ, ਜਿਨ੍ਹਾਂ ਵਿੱਚ ਸੁਰੱਖਿਆ ਕਰਮਚਾਰੀ ਅਤੇ ਬੁਲੇਟਪਰੂਫ ਵਾਹਨ ਹਨ। ਡੈਨਮਾਰਕ ਨੇ ਵੀ ਅਮਰੀਕੀ ਵਫ਼ਦ ਦੀ ਸੁਰੱਖਿਆ ਲਈ ਵੱਡੀ ਗਿਣਤੀ ਵਿੱਚ ਪੁਲਿਸ ਕਰਮਚਾਰੀ ਗ੍ਰੀਨਲੈਂਡ ਭੇਜੇ ਹਨ।