ਹਾਪੁੜ, 18 ਮਈ (ਪੋਸਟ ਬਿਊਰੋ): ਹਾਪੁੜ (ਉੱਤਰ ਪ੍ਰਦੇਸ਼) ਦੇ ਗੜ੍ਹਮੁਕਤੇਸ਼ਵਰ ਇਲਾਕੇ ਵਿੱਚ 26 ਬਾਂਦਰਾਂ ਨੂੰ ਗੁੜ ਵਿੱਚ ਸਿਉਂਕ ਮਾਰਨ ਵਾਲੀ ਦਵਾਈ ਨਾਲ ਮਾਰ ਦਿੱਤਾ ਗਿਆ। ਇਹ ਖੁਲਾਸਾ ਹਾਪੁੜ ਦੇ ਐਡੀਸ਼ਨਲ ਐੱਸਪੀ ਮੁਕੇਸ਼ ਮਿਸ਼ਰਾ ਨੇ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੁਲਿਸ ਨੇ ਦੋ ਮੁਲਜ਼ਮਾਂ ਨੂੰ ਗਿ੍ਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਪਾਸੋਂ ਸਿਉਂਕ ਦੀ ਦਵਾਈ ਬਰਾਮਦ ਹੋਈ ਹੈ। ਫੜੇ ਗਏ ਮੁਲਜ਼ਮਾਂ ਨੇ ਦੱਸਿਆ ਕਿ ਬਾਂਦਰ ਖੇਤਾਂ ਵਿੱਚ ਫਸਲਾਂ ਦਾ ਨੁਕਸਾਨ ਕਰ ਰਹੇ ਸਨ, ਜਿਸ ਕਾਰਨ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ। ਪੁਲੀਸ ਨੇ ਕਾਬੂ ਕੀਤੇ ਮੁਲਜ਼ਮਾਂ ਖ਼ਿਲਾਫ਼ ਜੰਗਲੀ ਜੀਵ ਸੁਰੱਖਿਆ ਐਕਟ 1972 ਅਤੇ ਧਾਰਾ 429 ਤਹਿਤ ਕਾਰਵਾਈ ਕਰਦਿਆਂ ਜੇਲ੍ਹ ਭੇਜ ਦਿੱਤਾ ਹੈ।
ਐਡੀਸ਼ਨਲ ਐੱਸਪੀ ਮੁਕੇਸ਼ ਮਿਸ਼ਰਾ ਅਤੇ ਸੀਉ ਸਤੂਤੀ ਸਿੰਘ ਨੇ ਮੇਰਠ ਰੋਡ 'ਤੇ ਸਥਿਤ ਪੁਲਸ ਲਾਈਨ 'ਚ ਪ੍ਰੈੱਸ ਕਾਨਫਰੰਸ 'ਚ ਦੱਸਿਆ ਕਿ ਪੁਲਸ ਅਤੇ ਜੰਗਲਾਤ ਵਿਭਾਗ ਦੀ ਟੀਮ ਨੂੰ ਗੜ੍ਹਮੁਕਤੇਸ਼ਵਰ ਇਲਾਕੇ ਦੇ ਝੜੀਨਾ ਪਿੰਡ 'ਚ ਵੱਡੀ ਗਿਣਤੀ 'ਚ ਬਾਂਦਰਾਂ ਦੇ ਮਰੇ ਹੋਣ ਦੀ ਸੂਚਨਾ ਮਿਲੀ ਸੀ। ਸੂਚਨਾ ਮਿਲਣ ਤੋਂ ਬਾਅਦ ਜੰਗਲਾਤ ਵਿਭਾਗ ਦੀ ਟੀਮ ਨੇ ਬਾਂਦਰਾਂ ਦੀਆਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਬਰੇਲੀ ਭੇਜ ਦਿੱਤਾ, ਜਦਕਿ ਪੁਲਸ ਆਪਣੀ ਜਾਂਚ 'ਚ ਜੁੱਟ ਗਈ। ਪੁਲਿਸ ਨੇ ਬਾਂਦਰਾਂ ਦੀਆਂ ਲਾਸ਼ਾਂ ਤੋਂ ਗੁੜ ਅਤੇ ਤਰਬੂਜ ਬਰਾਮਦ ਕੀਤਾ ਹੈ, ਜਿਸ ਤੋਂ ਜਾਪਦਾ ਸੀ ਕਿ ਗੁੜ ਜਾਂ ਤਰਬੂਜ ਵਿੱਚ ਕੋਈ ਜ਼ਹਿਰੀਲਾ ਪਦਾਰਥ ਮਿਲਾ ਕੇ ਬਾਂਦਰਾਂ ਨੂੰ ਦਿੱਤਾ ਗਿਆ ਸੀ।
ਮੁਲਜ਼ਮਾਂ ਨੇ ਪੁਲੀਸ ਨੂੰ ਦੱਸਿਆ ਕਿ ਬਾਂਦਰ ਲਗਾਤਾਰ ਖੇਤਾਂ ਦਾ ਨੁਕਸਾਨ ਕਰ ਰਹੇ ਹਨ। ਜਿਸ ਕਾਰਨ ਉਹ ਇੱਕ ਕਿੱਲੋ ਫਰਾਡੋਨ ਸਿਉਂਕ ਦੀ ਦਵਾਈ ਲੈ ਕੇ ਆਇਆ ਅਤੇ ਇਸ ਵਿੱਚ ਗੁੜ ਮਿਲਾ ਕੇ ਬਾਂਦਰਾਂ ਨੂੰ ਦੇ ਦਿੱਤਾ। ਉਨ੍ਹਾਂ ਨੇ ਸੋਚਿਆ ਕਿ ਬਾਂਦਰ ਬੇਹੋਸ਼ ਹੋ ਜਾਣਗੇ ਅਤੇ ਬਾਅਦ ਵਿੱਚ ਇੱਥੋਂ ਚਲੇ ਜਾਣਗੇ, ਪਰ ਦਵਾਈ ਖਾਣ ਨਾਲ ਬਾਂਦਰਾਂ ਦੀ ਮੌਤ ਹੋ ਗਈ।