ਮੁੰਬਈ, 16 ਜੁਲਾਈ (ਪੋਸਟ ਬਿਊਰੋ): ਮੁੰਬਈ ਤੋਂ ਚੋਰੀ ਦਾ ਇੱਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ। ਇਥੇ ਚੋਰੀ ਕਰਨ ਤੋਂ ਬਾਅਦ ਜਦੋਂ ਚੋਰ ਨੂੰ ਪਤਾ ਲੱਗਾ ਕਿ ਉਸ ਨੇ ਸਮਾਨ ਪ੍ਰਸਿੱਧ ਕਵੀ ਦੇ ਘਰੋਂ ਚੋਰੀ ਕੀਤੀ ਹੈ ਤਾਂ ਉਸ ਨੇ ਕੀਮਤੀ ਸਮਾਨ ਵਾਪਿਸ ਕਰ ਦਿੱਤਾ।
ਮੁੰਬਈ ਪੁਲਿਸ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਚੋਰ ਰਾਏਗੜ੍ਹ ਜਿ਼ਲੇ ਦੇ ਨੇਰਲ 'ਚ ਸਥਿਤ ਨਾਰਾਇਣ ਸੁਰਵੇ ਦੇ ਘਰ 'ਚੋਂ ਐੱਲਈਡੀ ਸਮੇਤ ਕੀਮਤੀ ਸਮਾਨ ਚੋਰੀ ਕਰ ਲਏ ਸਨ। ਨਾਰਾਇਣ ਸੁਰਵੇ ਇੱਕ ਮਸ਼ਹੂਰ ਮਰਾਠੀ ਕਵੀ ਅਤੇ ਸਮਾਜ ਸੇਵਕ ਸਨ।
ਸੁਰਵੇ ਦੇ ਦੇਹਾਂਤ ਤੋਂ ਬਾਅਦ, ਉਨ੍ਹਾਂ ਦੀ ਬੇਟੀ ਸੁਜਾਤਾ ਅਤੇ ਉਨ੍ਹਾਂ ਦੇ ਪਤੀ ਗਣੇਸ਼ ਹੁਣ ਇਸ ਘਰ ਵਿੱਚ ਰਹਿੰਦੇ ਹਨ। ਹਾਲ ਹੀ ਵਿੱਚ ਉਹ ਆਪਣੇ ਬੇਟੇ ਨੂੰ ਮਿਲਣ ਵਿਰਾਰ ਗਏ ਸਨ ਅਤੇ ਉਨ੍ਹ ਦਾ ਘਰ 10 ਦਿਨਾਂ ਤੋਂ ਬੰਦ ਸੀ। ਉਨ੍ਹਾਂ ਦੀ ਗੈਰ-ਮੌਜੂਦਗੀ ਵਿੱਚ ਚੋਰ ਘਰ ਵਿੱਚ ਦਾਖਲ ਹੋਏ ਅਤੇ ਐੱਲਈਡੀ ਟੀਵੀ ਸਮੇਤ ਹੋਰ ਕੀਮਤੀ ਸਾਮਾਨ ਚੋਰੀ ਕਰ ਲਿਆ।
ਅਗਲੇ ਦਿਨ ਜਦੋਂ ਚੋਰ ਕੁਝ ਹੋਰ ਸਾਮਾਨ ਚੋਰੀ ਕਰਨ ਆਇਆ ਤਾਂ ਉਸ ਨੇ ਇਕ ਕਮਰੇ ਵਿਚ ਨਾਰਾਇਣ ਸੁਰਵੇ ਦੀ ਫੋਟੋ ਅਤੇ ਉਸ ਨਾਲ ਸਬੰਧਤ ਯਾਦਗਾਰੀ ਸਾਮਾਨ ਦੇਖਿਆ। ਫਿਰ ਚੋਰ ਨੂੰ ਪਤਾ ਲੱਗਾ ਕਿ ਇਹ ਕਿਸੇ ਮਸ਼ਹੂਰ ਕਵੀ ਦਾ ਘਰ ਹੈ। ਇਸ ਤੋਂ ਬਾਅਦ ਚੋਰ ਨੇ ਪਛਤਾਵਾ ਕੀਤਾ ਅਤੇ ਜੋ ਵੀ ਸਾਮਾਨ ਉਸ ਨੇ ਚੁੱਕਿਆ ਸੀ, ਵਾਪਿਸ ਰੱਖ ਦਿੱਤਾ।