ਨਵੀਂ ਦਿੱਲੀ, 20 ਮਾਰਚ (ਪੋਸਟ ਬਿਊਰੋ):ਦਿੱਲੀ ਦੇ ਸ਼ਰਧਾ ਵਾਕਰ ਮਰਡਰ ਮਾਮਲੇ 'ਚ ਦਿੱਲੀ ਪੁਲਸ ਨੇ ਸੋਮਵਾਰ ਨੂੰ ਅਦਾਲਤ 'ਚ ਆਪਣੀ ਦਲੀਲ ਪੂਰੀ ਕਰ ਲਈ। ਇਸ ਦੌਰਾਨ ਪੁਲੀਸ ਨੇ ਮੁਲਜ਼ਮ ਆਫਤਾਬ ਅਮੀਨ ਪੂਨਾਵਾਲਾ ਨੂੰ ਵੀ ਪੇਸ਼ ਕੀਤਾ। ਦਿੱਲੀ ਪੁਲਿਸ ਦੇ ਵਕੀਲ ਨੇ ਅਦਾਲਤ ਵਿੱਚ ਕਿਹਾ ਕਿ ਸ਼ਰਧਾ ਪ੍ਰੈਕਟੋ ਐਪ ਰਾਹੀਂ ਡਾਕਟਰਾਂ ਦੀ ਸਲਾਹ ਵੀ ਲੈ ਰਹੀ ਸੀ। ਔਨਲਾਈਨ ਕਾਉਂਸਲੰਿਗ ਦੀ ਪੇਸ਼ ਕੀਤੀ ਗਈ ਆਡੀਉ-ਵੀਡੀਉ ਰਿਕਾਰਡਿੰਗ ਵਿੱਚ, ਸ਼ਰਧਾ ਨੇ ਆਪਣੇ ਡਾਕਟਰ ਨੂੰ ਕਿਹਾ, "ਉਹ ਮੈਨੂੰ ਲੱਭ ਕੇ ਮਾਰ ਦੇਵੇਗਾ"। ਆਫਤਾਬ ਪੂਨਾਵਾਲਾ ਦੇ ਕਾਨੂੰਨੀ ਸਹਾਇਤਾ ਵਕੀਲ ਜਾਵੇਦ ਹੁਸੈਨ ਨੇ ਦਿੱਲੀ ਪੁਲਿਸ ਦੀਆਂ ਦਲੀਲਾਂ ਦਾ ਜਵਾਬ ਦੇਣ ਲਈ ਸਮਾਂ ਮੰਗਿਆ ਹੈ। ਇਸ ਮਾਮਲੇ ਦੀ ਅਗਲੀ ਸੁਣਵਾਈ ਸਾਕੇਤ ਅਦਾਲਤ ਵਿੱਚ 25 ਮਾਰਚ ਨੂੰ ਹੋਵੇਗੀ।
ਪੁਲੀਸ ਨੇ ਸਾਕੇਤ ਅਦਾਲਤ ਵਿੱਚ ਸ਼ਰਧਾ ਕਤਲ ਕੇਸ ਨਾਲ ਸਬੰਧਤ ਰਿਕਾਰਡਿੰਗ ਵੀ ਪੇਸ਼ ਕੀਤੀ। ਇਸ 'ਚ ਸ਼ਰਧਾ ਆਪਣੇ ਡਾਕਟਰ (ਕਾਊਂਸਲਰ) ਨੂੰ ਦੱਸ ਰਹੀ ਸੀ ਕਿ ਇਕ ਦਿਨ ਉਸ ਦੇ ਲਿਵ-ਇਨ ਪਾਰਟਨਰ ਆਫਤਾਬ ਨੇ ਉਸ ਦਾ ਗਲਾ ਫੜ ਲਿਆ ਸੀ। ਇਸ ਦੌਰਾਨ ਉਹ ਬੇਹੋਸ਼ ਹੋ ਗਈ ਅਤੇ ਸਾਹ ਵੀ ਨਹੀਂ ਲੈ ਸਕੀ। ਦਿੱਲੀ ਪੁਲਿਸ ਨੇ ਕਿਹਾ ਕਿ ਸ਼ਰਧਾ ਕਤਲ ਕਾਂਡ ਦੇ ਮੁਲਜ਼ਮ ਆਫਤਾਬ ਪੂਨਾਵਾਲਾ ਖਿਲਾਫ ਠੋਸ ਸਬੂਤ ਮੌਜੂਦ ਹਨ। ਗਵਾਹਾਂ ਦੇ ਬਿਆਨਾਂ ਅਤੇ ਹੋਰ ਸਬੂਤਾਂ ਦੇ ਆਧਾਰ 'ਤੇ ਉਸ ਦਾ ਦੋਸ਼ ਸਾਬਤ ਹੁੰਦਾ ਹੈ। ਸਾਕੇਤ ਅਦਾਲਤ ਵਿੱਚ ਵਧੀਕ ਸੈਸ਼ਨ ਜੱਜ ਮਨੀਸ਼ ਖੁਰਾਣਾ ਦੇ ਸਾਹਮਣੇ ਪੇਸ਼ ਹੋਏ, ਵਿਸ਼ੇਸ਼ ਸਰਕਾਰੀ ਵਕੀਲ ਅਮਿਤ ਪ੍ਰਸਾਦ ਨੇ ਆਪਣੀਆਂ ਦਲੀਲਾਂ ਵਿੱਚ ਗਵਾਹਾਂ ਦੇ ਬਿਆਨਾਂ, ਪੁਲਿਸ ਦੁਆਰਾ ਇਕੱਠੇ ਕੀਤੇ ਇਲੈਕਟ੍ਰਾਨਿਕ ਸਬੂਤ, ਸੀਐਸਐਫਐਲ ਰਿਪੋਰਟ ਅਤੇ ਹੋਰ ਦਸਤਾਵੇਜ਼ੀ ਸਬੂਤਾਂ ਦਾ ਹਵਾਲਾ ਦਿੱਤਾ।