ਰਾਜਸਥਾਨ, 18 ਮਾਰਚ (ਪੋਸਟ ਬਿਊਰੋ): ਰਾਜਸਥਾਨ ਦੇ ਕਰੌਲੀ ਜ਼ਿਲੇ ਦੇ ਮੰਡਾਇਅਲ ਥਾਣਾ ਖੇਤਰ ’ਚ ਸ਼ਨੀਵਾਰ ਨੂੰ ਮੱਧ ਪ੍ਰਦੇਸ਼ ਤੋਂ ਕੈਲਾ ਦੇਵੀ ਦੇ ਦਰਸ਼ਨਾਂ ਲਈ ਜਾ ਰਹੇ 7 ਸ਼ਰਧਾਲੂ ਚੰਬਲ ਨਦੀ ’ਚ ਡੁੱਬ ਗਏ। ਪੁਲਸ ਸੁਪਰਡੰਟ ਨਰਾਇਣ ਲਾਲ ਤੋਗਸ ਨੇ ਦੱਸਿਆ ਕਿ ਮੱਧ ਪ੍ਰਦੇਸ ਦੇ ਸਵਿਪੁਰੀ ਜ਼ਿਲੇ ਦੇ ਦੋ ਪਰਿਵਾਰਾਂ ਦੇ 17 ਲੋਕ ਸ਼ਨੀਵਾਰ ਸਵੇਰੇ ਕਰੌਲੀ ਦੀ ਕੈਲਾਦੇਵੀ ਦੇ ਦਰਸ਼ਨ ਕਰਨ ਲਈ ਚੰਬਲ ਨਦੀ ਪਾਰ ਕਰ ਗਏ ਸਨ। ਉਨ੍ਹਾਂ ਦੱਸਿਆ ਕਿ ਪਾਣੀ ਦੇ ਵਹਾਅ ਕਾਰਨ 7 ਲੋਕ ਡੂੰਘੇ ਜਾਣ ਕਾਰਨ ਡੁੱਬ ਗਏ, ਜਦਕਿ 10 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਚੰਬਲ ਨਦੀ ਵਿਚ ਡੁੱਬਣ ਵਾਲੇ 7 ਲੋਕਾਂ ਵਿਚੋਂ 2 ਦੀਆਂ ਲਾਸ਼ਾਂ ਬਰਾਮਦ ਕਰ ਲਈਆਂ ਗਈਆਂ ਹਨ, ਜਦਕਿ 5 ਲੋਕਾਂ ਦੀ ਭਾਲ ਜਾਰੀ ਹੈ। ਉਨ੍ਹਾਂ ਦੱਸਿਆ ਕਿ ਨਦੀ ’ਚੋਂ ਮਿਲੀਆਂ ਲਾਸ਼ਾਂ ਦੀ ਪਛਾਣ ਦੇਵਕੀਨੰਦਨ ਅਤੇ ਕਾਲੋ ਵਜੋਂ ਹੋਈ ਹੈ। ਕਰੌਲੀ ਦੇ ਜ਼ਿਲਾ ਮੈਜਿਸਟ੍ਰੇਟ ਅੰਕਿਤ ਕੁਮਾਰ ਨੇ ਦੱਸਿਆ, ‘‘ਮੱਧ ਪ੍ਰਦੇਸ ਤੋਂ 17 ਲੋਕ ਕੈਲਾਦੇਵੀ ਮੇਲੇ ’ਚ ਹਿੱਸਾ ਲੈਣ ਲਈ ਆ ਰਹੇ ਸਨ ਅਤੇ ਚੰਬਲ ਨਦੀ ਪਾਰ ਕਰਦੇ ਸਮੇਂ ਕਰੰਟ ਲੱਗਣ ਕਾਰਨ ਰੁੜ੍ਹ ਗਏ। ਇਨ੍ਹਾਂ ’ਚੋਂ 10 ਲੋਕਾਂ ਨੂੰ ਜ਼ਿੰਦਾ ਬਚਾਇਆ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਨਦੀ ’ਚੋਂ ਦੋ ਲਾਸ਼ਾਂ ਕੱਢੀਆਂ ਗਈਆਂ ਹਨ, ਜਦਕਿ ਬਾਕੀ ਪੰਜ ਲਾਪਤਾ ਲੋਕਾਂ ਨੂੰ ਲੱਭਣ ਲਈ ਬਚਾਅ ਕਾਰਜ ਜਾਰੀ ਹਨ। ਮੰਡਾਇਅਲ ਥਾਣੇ ਦੇ ਪੁਲਸ ਸਬ-ਇੰਸਪੈਕਟਰ ਜਗਦੀਸ਼ ਨੇ ਦੱਸਿਆ ਕਿ ਲਾਪਤਾ ਪੰਜ ਲੋਕਾਂ ਦੀ ਭਾਲ ਲਈ ਗੋਤਾਖੋਰਾਂ ਦੀ ਟੀਮ ਦੇ ਨਾਲ ਸਥਾਨਕ ਪਿੰਡ ਵਾਸੀਆਂ ਅਤੇ ਹੋਰਨਾਂ ਦੀ ਮਦਦ ਲਈ ਜਾ ਰਹੀ ਹੈ।