ਲੰਡਨ, 4 ਅਗਸਤ (ਪੋਸਟ ਬਿਊਰੋ)- ਬ੍ਰਿਟੇਨ ਦੀ ਮਹਾਰਾਣੀ ਐਲਿਜ਼ਾਬੈਥ ਦੀ ਸ਼ਾਹੀ ਰਿਹਾਇਸ਼ ਵਿੰਡਸਰ ਕੈਸਲ ਵਾਲੇ ਮੈਦਾਨ ਵਿੱਚ ਪਿਛਲੇ ਸਾਲ ਕ੍ਰਿਸਮਸ ਵਿੱਚ ਗੈਰ ਕਾਨੂੰਨੀ ਦਾਖ਼ਲ ਹੋਣ ਵਾਲੇ 20 ਸਾਲਾ ਇੱਕ ਬ੍ਰਿਟਿਸ਼ ਸਿੱਖ ਉੱਤੇ ਬੀਤੇ ਦਿਨੀਂ ਰਾਜ-ਧ੍ਰੋਹ ਦੇ ਦੋਸ਼ ਲਾਏ ਗਏ ਹਨ। ਸਾਊਥੈਂਟਨ ਦੇ ਵਾਸੀ ਜਸਵੰਤ ਸਿੰਘ ਚੈਲ ਨੂੰ ਹੱਤਿਆ ਦੀ ਧਮਕੀ ਦੇਣ ਵਾਲੇ ਖਤਰਨਾਕ ਹਥਿਆਰ ਰੱਖਣ ਦੇ ਮਾਮਲੇ ਵਿੱਚ ਵੀ ਦੋਸ਼ੀ ਬਣਾਇਆ ਗਿਆ ਹੈ।
ਚੈਲ ਖੁਦ ਨੂੰ ਇੱਕ ‘ਭਾਰਤੀ ਸਿੱਖ’ ਦੱਸਦਾ ਹੈ ਤੇ ਉਸ ਦਾ ਕਹਿਣਾ ਹੈ ਕਿ ਉਹ 1919 ਵਿੱਚ ਹੋਏ ਜੱਲ੍ਹਿਆਂਵਾਲਾ ਬਾਗ ਕਤਲੇਆਮ ਦਾ ਬਦਲਾ ਲੈਣ ਲਈ ਮਹਾਰਾਣੀ ਦਾ ਕਤਲ ਕਰਨਾ ਚਾਹੁੰਦਾ ਸੀ। ਉਹ ਇਸ ਸਮੇਂ ਪੁਲਸ ਹਿਰਾਸਤ ਵਿੱਚ ਹੈ ਅਤੇ ਉਸ ਨੂੰ ਲੰਡਨ ਦੀ ਵੈਸਟਮਿੰਸਟਰ ਮੈਜਿਸਟਰੇਟ ਕੋਰਟ ਵਿੱਚ 17 ਅਗਸਤ ਨੂੰ ਪੇਸ਼ ਕੀਤਾ ਜਾਏਗਾ। ਪੁਲਸ ਨੇ ਦੱਸਿਆ ਮੈਟਰੋਪਾਲੀਟਨ ਪੁਲਸ ਦੀ ਅੱਤਵਾਦ ਵਿਰੋਧੀ ਕਮਾਨ ਦੀ ਜਾਂਚ ਦੇ ਬਾਅਦ ਜਸਵੰਤ ਉੱਤੇ ਇਹ ਦੋਸ਼ ਲਾਏ ਗਏ ਹਨ। ਉਸ ਉੱਤੇ 1842 ਦੇ ਰਾਜ ਧ੍ਰੋਹ ਕਾਨੂੰਨ ਦੀ ਧਾਰਾ ਦੋ (ਮਹਾਰਾਣੀ ਨੂੰ ਨੁਕਸਾਨ ਪਹੁੰਚਾਉਣ ਦੇ ਇਰਾਦੇ ਨਾਲ ਹਥਿਆਰ ਜਾਂ ਕੋਈ ਖਤਰਨਾਕ ਵਸਤੂ ਰੱਖਣ ਜਾਂ ਉਸ ਤੋਂ ਨਿਸ਼ਾਨਾ ਲਾਉਣ) ਦੇ ਦੋਸ਼ ਵੀ ਲਾਏ ਗਏ ਹਨ।