ਨੈਰੋਬੀ, 16 ਜਨਵਰੀ (ਪੋਸਟ ਬਿਊਰੋ)- ਕੀਨੀਆ ਦੀ ਰਾਜਧਾਨੀ ਨੈਰੋਬੀ ਵਿੱਚ ਅੱਤਵਾਦੀਆਂ ਨੇ ਇਕ ਆਲੀਸ਼ਾਨ ਹੋਟਲ ਨੂੰ ਨਿਸ਼ਾਨਾ ਬਣਾਇਆ ਅਤੇ ਇਸ ਹਮਲੇ 14 ਲੋਕਾਂ ਦੀ ਮੌਤ ਹੋ ਗਈ ਹੈ।
ਅੱਜ ਬੁੱਧਵਾਰ ਨੂੰ ਕੀਨੀਆ ਦੇ ਰਾਸ਼ਟਰਪਤੀ ਉਹਰੂਕ ਕੇਨਿਆਟਾ ਨੇ ਕਿਹਾ ਕਿ 20 ਘੰਟੇ ਚੱਲੀ ਮੁਹਿੰਮ ਦੇ ਦੌਰਾਨ ਸਾਰੇ ਅੱਤਵਾਦੀਆਂ ਨੂੰ ਮਾਰ ਦਿੱਤਾ ਗਿਆ ਤੇ ਕਰੀਬ 700 ਲੋਕਾਂ ਨੂੰ ਬਚਾ ਲਿਆ ਹੈ। ਇਸ ਹਮਲੇ ਦੀ ਜ਼ਿੰਮੇਵਾਰੀ ਅਲ ਕਾਇਦਾ ਨਾਲ ਜੁੜੇ ਅੱਤਵਾਦੀ ਗਰੁੱਪ ਅਲ-ਸ਼ਬਾਬ ਨੇ ਲੈ ਲਈ ਹੈ। ਸਥਾਨਕ ਮੀਡੀਆ ਅਨੁਸਾਰ ਅੱਤਵਾਦੀ ਮੰਗਲਵਾਰ ਦੁਪਹਿਰ ਕਰੀਬ ਬਾਅਦ ਹੋਟਲ ਵਿੱਚ ਦਾਖ਼ਲ ਹੋਏ। ਕਈ ਧਮਾਕਿਆਂ ਤੇ ਗੋਲ਼ੀਆਂ ਦੀ ਆਵਾਜ਼ ਪਿੱਛੋਂ 101 ਕਮਰਿਆਂ ਦੇ ਇਸ ਹੋਟਲ ਵਿੱਚ ਭਾਜੜ ਮੱਚ ਗਈ ਤੇ ਫਸੇ ਹੋਏ ਲੋਕ ਮਦਦ ਲਈ ਟਵਿਟਰ ਉੱਤੇ ਪੁਕਾਰ ਕਰਨ ਲੱਗੇ। ਮੀਡੀਆ ਨੇ ਸੀ ਸੀ ਟੀ ਵੀ ਦੇ ਹਵਾਲੇ ਨਾਲ ਦੱਸਿਆ ਕਿ ਕਾਲੇ ਕੱਪੜਿਆਂ ਵਿੱਚ ਚਾਰ ਅੱਤਵਾਦੀ ਭਾਰੀ ਹਥਿਆਰਾਂ ਨਾਲ ਹੋਟਲ ਕੰਪੈਲਕਸ ਵਿਚ ਦਾਖ਼ਲ ਹੋਏ ਸਨ। ਇਨ੍ਹਾਂ ਵਿਚੋਂ ਇਕ ਨੇ ਸ਼ੁਰੂ ਵਿੱਚ ਖ਼ੁਦ ਨੂੰ ਧਮਾਕੇ ਨਾਲ ਉਡਾ ਲਿਆ ਤੇ ਦੋਂਹ ਨੂੰ ਬੁੱਧਵਾਰ ਸਵੇਰੇ ਸੁਰੱਖਿਆ ਬਲਾਂ ਨੇ ਮਾਰ ਦਿੱਤਾ। ਹਮਲੇ ਵਿੱਚ ਮਾਰੇ ਗਏ ਲੋਕਾਂ ਵਿਚ ਅਮਰੀਕਾ ਤੇ ਬ੍ਰਿਟੇੇਨ ਦਾ ਇਕ-ਇਕ ਨਾਗਰਿਕ ਵੀ ਹੈ। ਬਾਕੀ 11 ਜਣੇ ਕੀਨੀਆ ਦੇ ਨਾਗਰਿਕ ਦੱਸੇ ਗਏ ਹਨ। ਇਕ ਦੀ ਪਛਾਣ ਨਹੀਂ ਹੋ ਸਕੀ। ਅਲ-ਸ਼ਬਾਬ ਨੇ 2013 ਵਿੱਚ ਵੀ ਨੈਰੋਬੀ ਦੇ ਵੈਸਟਗੇਟ ਮਾਲ `ਤੇ ਵੱਡਾ ਹਮਲਾ ਬੋਲਿਆ ਸੀ। ਇਸ ਵਿਚ 67 ਲੋਕ ਮਾਰੇ ਗਏ ਸਨ। ਚਾਰ ਦਿਨ ਤਕ ਚੱਲੇ ਮੁਕਾਬਲੇ ਪਿੱਛੋਂ ਮਾਲ ਨੂੰ ਮੁਕਤ ਕਰਵਾਇਆ ਗਿਆ ਸੀ।